Вы тут

Выстава да юбілею кнігадрукавання Беларусі працуе ў Савеце Рэспублікі


Кніжную выстаўку, прысвечаную 500-годдзю беларускага кнігадрукавання, сёлета пакажуць у Кітаі, Расіі, Сербіі, Чэхіі і Польшчы. Днямі яе адкрылі ў Савеце Рэспублікі. На ёй можна ўбачыць не толькі кніжныя навінкі, але і тое, як іх рабілі паўтысячагоддзя таму. Парламентарыі змаглі ўласнаручна стварыць паперу і афорт старонкі з Бібліі.


Міністр інфармацыі Лілія АНАНІЧ і член Савета Рэспублікі Мікалай РАДАМАН.

— Калі на ўзроўні парламента краіны, на высокім дзяржаўным узроўні разглядаюцца пытанні нацыянальнай культурнай, гістарычнай, кніжнай спадчыны, мы з поўнай упэўненасцю можам сказаць, што Беларусь дбае пра сваю будучыню і мацуе гэту будучыню менавіта на прынцыпах высокай духоўнасці, — адзначыла міністр інфармацыі Лілія АНАНІЧ.

Сёлета звыш двух мільёнаў рублёў дзяржава выдаткавала на падтрымку нацыянальнага кнігавыдання. Яны накіраваны на праекты ў мастацкай літаратуры і энцыклапедычным кнігавыданні. У гэты юбілейны год плануецца правесці звыш 70 мерапрыемстваў, прысвечаных круглай даце. У сакавіку кіраўнік дзяржавы падпісаў указ аб стварэнні шматтомнага выдання «Рэспубліка Беларусь: дасягненні апошніх 25 гадоў». Яно ўбачыць свет у 2018 годзе. «Мы цяпер працуем над стварэннем праекта электроннай энцыклапедыі Рэспублікі Беларусь, — паведаміла Лілія Ананіч. — Сёння энцыклапедыя — гэта пашпарт краіны. Тое, што мы здолелі захаваць у друкаваным выглядзе, і тое, што павінна развівацца з улікам сучасных электронных носьбітаў».

Падчас адкрыцця выстаўкі былі закрануты і пытанні абароны інтэлектуальнай уласнасці. Старшыня Пастаяннай камісіі Савета Рэспублікі па адукацыі, навуцы, культуры і сацыяльным развіцці Ірына СТАРАВОЙТАВА звярнула ўвагу на тое, што кніга — гэта вынік працы не толькі аўтара, але і выдаўца. «Упершыню Савет Рэспублікі ініцыюе ўнясенне змяненняў і дапаўненняў у Закон Рэспублікі Беларусь «Аб аўтарскім праве і сумежных правах», у рамках якіх будуць унесены вельмі важныя нормы для выдаўца. Адна з іх — норма аб свабодных ліцэнзіях. Свабодныя ліцэнзіі і нормы ў літаратуры даюць магчымасць аўтару дэлегаваць свае паўнамоцтвы ў рамках выключнага права на твор неабмежаванаму ліку асоб. Такія свабодныя ліцэнзіі з'яўляюцца прамежкавымі паміж класічнымі ліцэнзіямі, якія дазваляюць абараняць правы аўтара, і свабодным доступам да інфармацыі, у тым ліку і ў інтэрнэт-прасторы».

Генеральны пракурор Аляксандр КАНЮК, намеснік кіраўніка Адміністрацыі Прэзідэнта Валерый МІЦКЕВІЧ і старшыня Савета Рэспублікі Міхаіл МЯСНІКОВІЧ.

Нарматыўна-прававое рэгуляванне выдавецкай дзейнасці разглядзелі падчас першага пасяджэння вясновай сесіі Савета Рэспублікі. На ім жа абмеркавалі святкаванне 500-годдзя беларускага кнігадрукавання і правядзенне мерапрыемстваў, прымеркаваных да Года навукі. Старшыня Савета Рэспублікі Міхаіл Мясніковіч уручыў Ганаровую грамату Нацыянальнага сходу галоўнаму навуковаму супрацоўніку Інстытута гісторыі Нацыянальнай акадэміі навук Беларусі Георгію Галенчанку за вялікі ўклад у рэалізацыю сацыяльнай палітыкі Рэспублікі Беларусь і шматгадовую плённую навукова-даследчую дзейнасць. Ён аўтар шматлікіх даследаванняў па гісторыі беларускага кніжнага друку, духоўнай і кніжна-пісьмовай культуры Беларусі ХІV—ХVІІ ст.

Святкаванне 500-годдзя беларускага кнігадрукавання — гэта падзея не толькі нацыянальнага, але і сусветнага маштабу, лічыць рэктар Беларускай дзяржаўнай акадэміі музыкі, доктар мастацтвазнаўства, прафесар Кацярына ДУЛАВА: «Пра гэта сведчыць і той факт, што ЮНЕСКА адзначае гэту дату. Што датычыцца прадстаўленай тут экспазіцыі, яна так ці інакш расказвае пра гісторыю кнігі ў Беларусі. Дзякуй богу, што ў краіне ёсць энтузіясты, якія імкнуцца і могуць паказаць на станках, як кнігі рабіліся ў тыя часы. І нават даюць паспрабаваць сябе ў якасці першадрукара».

Надзея АНІСОВІЧ

аnіsоvісh@zvіаzdа.bу

Фота БЕЛТА

Загаловак у газеце: Па старонках першай кнігі

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.