Фонды Дзяржаўнага музея ваеннай гісторыі папоўніліся вельмі каштоўнымі экзэмплярамі. Вядомыя беларускія гісторыкі, калекцыянеры, актыўныя ўдзельнікі праекта «У пошуках страчанага» Уладзімір Ліхадзедаў, Уладзімір Пефціеў і Уладзімір Багданаў перадалі ў дар музею дзве рэдкія нямецкія кнігі, карты і паштоўкі, выдадзеныя сто гадоў таму. У іх змешчаны сотні ўнікальных здымкаў гарадоў і мястэчкаў Заходняй Беларусі, што трапілі ў аб'ектывы кайзераўскіх фатографаў падчас Першай сусветнай вайны. Сярод іх — Брэст, Гродна, Баранавічы, якія зведалі на сабе цяжар ваеннага ліхалецця.
— Такія экспанаты ў нашых музеях — вялікая рэдкасць, — гаворыць дырэктар Музея ваеннай гісторыі Сяргей Азаронак. — У кнігах падрабязна апісваюцца падзеі Баранавіцкай і Нарачанскай аперацый. Напрыклад, у кнізе пра Баранавіцкую аперацыю змешчана цікавая інфармацыя па тактыцы і стратэгіі нямецкіх і расійскіх войскаў, надрукаваны падрабязныя карты. На іх паказаны вёскі, вайсковыя ўмацаванні, нанесены ход вайсковых дзеянняў.
Кніга выдавалася ў Германіі двойчы: у 1917 і 1925 гадах. Нягледзячы на тое, што падчас Баранавіцкай аперацыі царскія войскі не здолелі прарваць абарону немцаў, кніга была перакладзена на рускую мову і выдадзена ў РСФСР у 1921 годзе як дапаможнік для будучых камандзіраў.
Акрамя таго, Музей ваеннай гісторыі, Музей Першай сусветнай вайны, што знаходзіцца ў вёсцы Заброддзе на Вілейшчыне, сумесна з Уладзімірам Ліхадзедавым, Уладзімірам Пефціевым і Уладзімірам Багданавым рыхтуюць у красавіку маштабную выстаўку, прысвечаную падзеям 1914—1918 гадоў на тэрыторыі Беларусі. Бо налета споўніцца сто гадоў з часу заканчэння той вайны.
— Пра падзеі тых часоў у нас помняць не так добра, — кажа Уладзімір Ліхадзедаў. — І мы спадзяёмся, што наша сумесная праца дапаможа ліквідаваць гэты прабел.
Валяр'ян ШКЛЕННІК
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».