Вы тут

Махляры не грэбуюць нічым у спробах завалодаць чужымі грашыма


Якімі ж даверлівымі бываюць нашы людзі, калі самі аддаюць у рукі махлярам значныя сумы грошай! А калі ўжо становіцца канчаткова ясна, што даўжнік і не збіраецца вяртаць, ідуць у міліцыю. Трэба аддаць належнае і майстрам аферы: яны нярэдка выступаюць здольнымі псіхолагамі і сапраўднымі артыстамі, калі раскручваюць перад наіўнымі патэнцыяльнымі ахвярамі свае гісторыі, а сюжэты складаюць літаральна на хаду. Потым усё гэта абарочваецца стратамі і слязамі для пацярпелых людзей, часта — крымінальнымі справамі для махляроў.


Колькасць крымінальных спраў па артыкуле «Махлярства» апошнім часам істотна расце ў Брэсцкай вобласці. Паводле інфармацыі старшага памочніка пракурора рэгіёна Ліліі СМАЛЯРУК, за 2016 год заведзена 530 такіх спраў, тым часам як у папярэднім годзе іх было 384. І ўжо за студзень гэтага года колькасць махлярскіх спраў вырасла на 80 працэнтаў у параўнанні з леташнім паказчыкам. Махляры яўна робяць поспехі ў асяродку даверлівых грамадзян.

...38-гадовая жыхарка Брэсцкага раёна расказвала ўсім знаёмым пра свой паспяховы бізнес. Але ж на яго развіццё патрабаваліся сродкі, якія жанчына абяцала вярнуць з прыбыткам. Прадпрымальная махлярка здолела падмануць 38 чалавек. Ёй перадалі суму, эквівалентную 630 тысячам долараў!

Яшчэ адна «бізнес-лэдзі», брастаўчанка 25 гадоў, таксама апавядала пра свае ўдалыя праекты. Паводле яе легенды, камерцыйная дзейнасць вельмі хутка прыносіць вялікія дывідэнды, трэба толькі своечасова ўкладваць сродкі ў развіццё і станавіцца сузаснавальнікамі. Дзевяць чалавек паддаліся на ўгаворы і ўклалі сродкі, а таксама маёмасць на суму 240 тысяч дэнамінаваных рублёў. На выручаныя грошы махлярка гуляла ў казіно. Цяпер гэтым прадпрымальным падманшчыцам пагражае да 10 гадоў пазбаўлення волі.

Такія майстры афер, вядома, дзейнічаюць найбольш у вялікіх гарадах. З усіх махлярстваў, зафіксаваных у вобласці, 45 працэнтаў былі здзейснены ў Брэсце. Яно і зразумела. Тут лягчэй знайсці даверлівых кліентаў. Скажам, даў чалавек аб'яву ў газеце аб паслугах па перацяжцы мэблі. І цэны ў яго як быццам крыху ніжэйшыя за іншых майстроў. Знайшліся ахвотныя. Ён прыехаў, мэблю забраў, узяў грошы за работу, і на тым «прадпрыемства» скончылася... Другі абяцаў пастаўляць новыя дзверы і браў грошы наперад. Гэта некаторыя са шматлікіх прыкладаў падобных махлярстваў па Брэсце.

Але і асобныя дзеячы раённага маштабу часам не адстаюць ва ўменні зарабіць на залішняй даверлівасці. Шматдзетная маці са Століна знаёмілася з мужчынамі па інтэрнэце. Паводле легенды, яна была адзінокай прывабнай дзяўчынай (фота прыгажуні знайшлося ў сеціве), якая чакае станоўчага, надзейнага сябра з сур'ёзнымі намерамі. І такіх на Беларусі знайшлося аж шасцёра. Мужчыны прапаноўвалі руку і сэрца пасля пэўнага перыяду стасункаў анлайн. Прыгажуня згаджалася... але ў яе раптам узнікалі матэрыяльныя цяжкасці, напрыклад, у выглядзе першага ўзносу на будучую кватэру. І закаханыя слалі грошы ў Столін. Выніковая сума перавысіла 24 тысячы рублёў.

А што наша «нявеста»? Наўрад ці яна думала, што ашуквае жывых людзей, яна бачыла перад сабой патэнцыйных кліентаў для «дойкі» і дзейнічала далей. Суд улічыў наяўнасць малых дзяцей і тое, што яна мае інваліднасць, што часткова кампенсавала ўрон. Ёй прызначылі пакаранне, не звязанае з пазбаўленнем волі. Ці зробіць маладая жанчына адпаведныя высновы на будучыню, ці навучыць сваіх дзяцей, што падманваць людзей брыдка і ганебна, ніхто не ведае.

Часцей за ўсё такія людзі замест сумлення маюць толькі імкненне да нажывы і азарт, падобны на паляўнічы. Яны любяць «працаваць» у асяродку пенсіянераў, бо пажылых людзей лягчэй падманваць. На дапамогу ім усё часцей прыходзяць камп'ютарныя тэхналогіі. Летась было зафіксавана некалькі выпадкаў, калі спекулянты здымалі пенсіі з банкаўскіх картак.

Начальнік упраўлення аховы правапарадку і прафілактыкі Брэсцкага абласнога УУС Генадзь ВАЙТОВІЧ расказаў пра выпадкі камп'ютарных афер, якія здзейснілі непаўналетнія «хакеры». Столінскі юнак так прызвычаіўся залазіць на асабістыя старонкі грамадзян у розных сацыяльных сетках, што за кароткі тэрмін украў грашовыя сродкі больш чым у 80 чалавек. Вядома, раённым аддзелам СК была заведзена крымінальная справа. А драгічынскія аператыўнікі і следчыя за галаву ўзяліся, калі ўбачылі доказы камп'ютарных махінацый 10-гадовага хлопчыка. Ён змог перагнаць сабе грошы з дабрачыннага рахунка, адкрытага ў Брэсце на лячэнне 3-гадовага хлопчыка. Дзіця мае анкалагічнае захворванне. На лячэнне за мяжой збіралі, што называецца, усёй грамадой. Але ў нейкі момант частка грошай з рахунка знікла. Спецыялісты змаглі прасачыць рух фінансавага патоку і такім чынам выйшлі на малалетняга жыхара Драгічына. А ён, аказваецца, украдзеныя сродкі пусціў на развіццё свайго акаўнта ў сеткавай гульні «Танкі Анлайн». У апошнім выпадку ўзрост парушальніка закона ўсё ж дазваляе спадзявацца, што яго несумненныя разумовыя здольнасці можна яшчэ накіраваць у станоўчае рэчышча.

А вось з дарослымі інтэрнэт-аферыстамі, як і з тымі, хто працуе ў жывым кантакце з патэнцыйнымі ахвярамі, размовы часта заканчваюцца ў зале судовых пасяджэнняў. Ды лепей усё ж ахвярай не станавіцца. І быць надзвычай уважлівымі, калі справа датычыцца ўласных грошай. Колькі нашых суграмадзян пацярпела праз сваю дабрыню, калі згаджаліся дапамагчы іншым у справе атрымання крэдыту! Сотнямі лічыў кожны банк паручыцеляў, якія выплачвалі чужыя пазыкі. Пра гэта шмат гаварылі і пісалі, і цяпер ахвотных паручыцца за чужую сумленнасць і плацежаздольнасць стала нашмат менш. Але, як паказвае практыка, у тым ліку крымінальных спраў, людзі зноў наступаюць на тыя ж граблі.

Святлана ЯСКЕВІЧ

yackevіch@zvіazda.by

Загаловак у газеце: Махляры не грэбуюць нічым

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.