Працягваецца музычна-адукацыйны праект «Беларусь-тур»

У яго межах ужо прайшло 38 канцэртаў і майстар-класаў для навучэнцаў музычных школ у розных гарадах краіны. Сёлета запланавана яшчэ каля 80 імпрэзаў, у тым ліку — вялікія гала-канцэрты ў абласных цэнтрах і сталіцы.

Праект быў ініцыяваны спеваком і кампазітарам, лаўрэатам спецыяльнага фонду Прэзідэнта Беларусі, акардэаністам-віртуозам Ігарам Квашэвічам і падтрыманы Міністэрствам культуры і грамадскай арганізацыяй «Белая Русь».

— Сімвалічна, што мы распачалі «Беларусь-тур» летась, у Год культуры, — расказаў намеснік старшыні грамадскай арганізацыі «Белая Русь» Аляксандр ШАЦЬКО. — У нашай рабоце стараемся больш увагі ўдзяляць культуры, таму і намер паказаць музыкантам-пачаткоўцам, як віртуозна можна валодаць інструментам, даць магчымасць жыхарам маленькіх гарадоў наведваць культурніцкія імпрэзы надзвычай высокага ўзроўню, мы з радасцю падтрымалі.

Хоць гэты маштабны музычна-адукацыйны праект скіраваны ў асноўным на аўдыторыю юных музыкантаў, ён карысны і дарослым. Так, канцэрт становіцца ці не адзінай магчымасцю для жыхароў розных гарадоў краіны далучыцца да высокай культуры класічнай музыкі. Акардэаніст Ігар Квашэвіч падкрэсліў, што для прадстаўлення на канцэртах ён адмыслова падбірае творы беларускіх кампазітараў, каб знаёміць з імі шырокую публіку. І, па словах Ігара Міхайлавіча, фактычна кожная імпрэза знаходзіць добрыя водгукі ў публікі. Часам замест запланаванага аднаго канцэрта ў невялікіх гарадах даводзілася арганізоўваць два выступленні запар: маленькія залы дамоў культуры проста не маглі змясціць усіх ахвотных.

Сёння каманда «Беларусь-тур» кіруецца ў Зэльву, што на Гродзеншчыне. На чарзе — Іўе і Слонім, тут канцэрты і майстар-класы пройдуць 21 і 22 лютага.

Марына ВЕСЯЛУХА

vеsіаluhа@zvіаzdа.bу