Настасся НАРЭЙКА
нарадзілася 28 кастрычніка 1986 года ў Маладзечне. Працуе журналістам. Аўтар зборніка вершаў «Магдэбургскае права маёй душы» (2013). Рыхтуе да друку кніжку апавяданняў, у назве якой абавязкова будзе слова «вецер».
Жыві… Жыві!
* * *
Сняжынкі разбіваюцца аб шкло.
Завеі не відаць канца і краю.
Я ведаю: мінулае прайшло.
Я ведаю й на лёс не наракаю.
Я грэю ля агню ільдзінкі рук,
А слёз крышталь мне сыпле прама ў каву.
Я ведаю: ні крок, ні цень, ні гук
Не прывядуць сюды тваю аблаву.
Мне горка не ад кавы — ад цябе.
Ад вершаў, што ніколі не даходзяць,
Што стомлена вяртаюцца ў журбе
І вечарамі воч з мяне не зводзяць.
Я пісьмаў не паліла, а цяпер
Палю. І душыць попел іх гарачы.
І вые недзе вецер, нібы звер.
Я ўкленчыла ля полымя і плачу.
* * *
Ды за ім зачыняюцца дзверы
Бязгучна.
Бязгучна.
Я хілю галаву і не веру.
Не веру.
Не муч нас.
Я сяджу каля ложка.
Я дрэннаю буду сястрою.
Я вучылася трошкі
І, можа, цябе супакою.
Я трымаю руку,
Як апошні сярэбранік звонкі.
Ты даруй. На шнурку
Я нашу ўсе былыя пярсцёнкі.
Ты ніхто мне. А я… Я сястра.
Буду дрэннай сястрою.
Я глядач ля чужога кастра,
І твой боль я патрою.
Ты прабач. Не вучылі мяне
Ні лячыць, ні маліцца.
— Я памру? — Не памрэш.
І душа ў цішыні аж крыліцца.
За ўрачамі заўсёды
Бязгучна выстрэльваюць дзверы.
— Я памру? — Не памрэш…
І сама я ўжо ў гэта не веру.
* * *
А я, здаецца,
Ужо кахала…
І кава стыне.
А я, здаецца,
Заўсёды знала:
Ён вас не кіне.
А я, здаецца,
І не чакала —
Кахала проста.
Ды гэта мала.
Бязбожна мала!
Я сёння востаў.
Не верце, людзі,
Што не бывае
Каханне вечным.
Яно жывое.
І я жывая.
Падобны ў нечым.
І я, здаецца,
Калісьці згіну,
Сыду,
Растану.
Вы не кранайце
Слабую спіну —
Жывую
Рану.
Яна крывавіць,
Смыліць да нетраў,
Бо я ж ЖЫВАЯ!
Ды хто кахае,
Той крылы ветру
Не абрывае.
* * *
Ты стаміўся даўно ад мяне,
Недасяжна Вялікі…
Бачу словы бясконцыя ў сне.
Ды, на жаль, я — не Рыльке.
Мовай Гётэ пісаць да Цябе?
Толькі шэпты — не крыкі.
Я спрабую, спрабую ў журбе!
Ды, на жаль… я — не Рыльке.
Гэта Слова было — у Цябе.
Не вярну я пазыкі.
Выбачай. Завяршэнне сяўбе.
І няхай я не Рыльке!
* * *
Я гавару з Табой,
Нібыта ў цішыні
Адскокваюць ад сцен,
Як боб, пустыя словы.
Я гавару з Табой
І не прашу — ані.
Табе мяне судзіць.
Табе рабіць высновы.
Ты слухаеш мяне
Без гуку і без руху.
Нібыта нежывы.
А нежывая… я!
Ты слухаеш мяне.
О, слухай!
Толькі слухай!
Пакуль я гавару,
Жыве душа мая.
Я да Цябе пішу
Лісты мае і вершы.
І зоры за акном
Не зрушацца — ані.
Я да Цябе пішу.
Апошні мой і першы.
Чытай мяне. Услых!
Не трэба цішыні!
Ты адкладзеш убок
І сшыткі, і паперы.
І ўстанеш з-за стала…
І захлынецца сэрца.
Ты пойдзеш у цішы,
І ледзьве рыпнуць дзверы.
Я ж веру да канца:
Хто любіць — азірнецца.
І азірнешся Ты.
І зноўку я ўваскрэсну,
Як кожны раз, калі
Прыходзіць новы верш.
Як кожны раз, калі
Цвітуць пралескі ўвесну.
Як кожны раз, калі
Пішу Табе. Найперш.
* * *
Скідай вярыгі,
Дажджы і кнігі,
Ірві павуту
І зноў ляці.
Няма Нямігі.
Расталі крыгі.
Даруй! Прабач мне!
А не… «прости».
Ляці, дзяўчынка!
Без адпачынку.
Ляці і думаць
Не думай нат.
Ляці, дзяўчынка,
Як аблачынка.
І сонца ў рукі,
Нібы гранат…
Чырвоным сокам,
Як кінуць вокам,
Заліта неба.
Яно ў крыві?
Ды не. Дарэмна.
Не думай дрэнна.
Не думай проста.
Жыві.
Жыві.
* * *
Не чапайце вы вершаў маіх!
Гэта болей не я.
Ім самотна і страшна
Ляжаць на паперы маўклівай,
Як на снезе. Дзе бачная
Кожная рыска здаля.
Углядаюся ў іх
З неадольнай усмешкай шчаслівай.
Гэта болей не я.
Гэта болей, чым я. Гэта свет,
Увабраны ў карункі
Загадкавых слоў немінучых.
І сыходзяць яны.
І гляджу, і хрышчуся я ўслед.
Мне б адзіна глыток роднай мовы
З крынічак гаючых!
Не чапайце вы вершаў маіх.
Не судзіце дарма
Іх па мне. Не судзіце.
Яны за мяне не ў адказе.
Я пішу, адпускаю. І ўсё.
І мяне ў іх няма.
Я іду па дарозе далей,
Каб забыцца паразу.
Я малюся за іх
Да таго, хто мне шчасце дае
І пісаць, і карункі сплятаць,
І бязмежна дзівіцца.
Я малюся за іх.
І пачуты малітвы мае.
Ды цаною адной —
За сябе, пра сябе не маліцца.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».