Першая сесія шостага склікання выдалася насычанай і цікавай. Сустрэча з Прэзідэнтам, выбары кіраўніцтва палат, фарміраванне пастаянных камісій, першыя перамовы з замежнымі дэлегацыямі і першыя візіты за мяжу — у складзе парламенцкіх дэлегацый. Трэба сказаць, што і дэпутаты, члены Савета Рэспублікі, якія працавалі ў мінулых скліканнях, і парламентарыі, абраныя ўпершыню, праявілі сябе як людзі, якія сапраўды гатовы ствараць якаснае прававое поле краіны. Законапраекты, прадстаўленыя падчас сесіі, важныя для самых розных слаёў грамадства, не меншую цікавасць маюць і дэпутацкія ініцыятывы...
Падчас апошняга пасяджэння дэпутат Валянцін МІЛАШЭЎСКІ, намеснік старшыні Пастаяннай камісіі Палаты прадстаўнікоў па ахове здароўя, фізічнай культуры, сямейнай і маладзёжнай палітыцы, прадстаўляў праект закона, што ўносіць змены і дапаўненні ў Закон «Аб якасці і бяспецы харчовай сыравіны і харчовых прадуктаў для жыцця і здароўя чалавека».
— Адпаведны закон быў прыняты 12 гадоў таму, — расказаў ён журналістам. — За гэты час некалькі змянілася нарматыўная база — у прыватнасці, Саюзнай дзяржавы, Мытнага саюза, Еўразійскага эканамічнага саюза. Для таго каб якасць нашых прадуктаў харчавання, харчовай сыравіны была не ніжэй, чым у суседніх краінах, яе неабходна прывесці ў адпаведнасць з міжнароднымі дагаворамі. Вызначаецца таксама парадак маркіроўкі — мы зможам убачыць, што ўваходзіць у гэты прадукт, якія суадносіны інгрэдыентаў. Калі ГМА-кампаненты будуць складаць больш за 0,9% ад усяго складу, гэта таксама будзе ўказана. Шэраг заўваг і прапаноў ад вытворцаў таксама ўвайшлі ў законапраект: ім далі больш правоў, у той жа час узмацнілі адказнасць у кантрольных тэхнічных пунктах.
* * *
Падчас заключнага пасяджэння першай сесіі Савета Рэспублікі сенатары разгледзелі дваццаць пытанняў. Сярод іх было і галасаванне за прызначэнне Лідзіі ЯРМОШЫНАЙ на пасаду Старшыні Цэнтральнай камісіі па выбарах і правядзенні рэспубліканскіх рэферэндумаў.
Шляхам таемнага галасавання былі абраны астатнія члены ЦВК. Акрамя таго, члены верхняй палаты беларускага парламента ўхвалілі законапраекты ў сферах міжнародных адносін, бяспекі, фінансаў, а таксама працы непасрэдна Савета Рэспублікі.
Фота БЕЛТА
Надзея ЮШКЕВІЧ
Вераніка ПУСТАВІТ
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.
«Мы зацікаўлены, каб да нас прыязджалі».
