Змяненні, унесеныя ўрадам у "Парадак разліку сродкаў, выдаткаваных дзяржавай на падрыхтоўку навуковага работніка вышэйшай кваліфікацыі, спецыяліста, рабочага, служачага" не распаўсюдзяцца на выпускнікоў бягучага года, патлумачыла прэс-сакратар Міністэрства адукацыі Юлія Барадун, каментуючы Пастанову Савета Міністраў. Змяненні тычацца тых, хто яшчэ толькі рыхтуецца паступаць у ВНУ, ССНУ і ПТВ.
Цяпер, калі выпускнік бюджэтнай формы навучання вырашыць адмовіцца ад прадастаўленага яму дзяржавай першага працоўнага месца, яму не давядзецца кампенсаваць выдаткі на яго сацыяльную падтрымку падчас усіх гадоў навучання: маюцца на ўвазе выплачаныя яму стыпендыяльныя сродкі, прадастаўленне бясплатнага харчавання і выдаткі на ўтрыманне інтэрната. А выпускнікі прафесійна-тэхнічных і сярэдніх спецыяльных навучальных устаноў, якія паступілі пасля 9 класа, не будуць аплачваць тую частку вучобы, якая забяспечвала ім атрыманне агульнай сярэдняй адукацыі, але будуць кампенсаваць выдаткі на атрыманне прафесійных навыкаў. Такім чынам, дзякуючы ўнесеным у палажэнне змяненням, сума кампенсацыі можа істотна зменшыцца.
Нагадаем, што абавязковаму размеркаванню падлягаюць усе, хто правучыўся на дзённай бюджэтнай форме навучання не менш за палову ад агульнага тэрміну навучання. Гэта значыць, што студэнт, які навучаўся за кошт бюджэтных сродкаў і быў адлічаны, напрыклад, на трэцім курсе, а затым аднавіўся і давучваўся ўжо за кошт уласных сродкаў, таксама можа быць размеркаваны. Пры гэтым тэрмін працы па размеркаванні не змяншаецца прапарцыянальна часу навучання за кошт уласных сродкаў. Гэта значыць, што выпускнік абавязаны адпрацаваць па размеркаванні два гады, як і яго аднакурснікі-"бюджэтнікі". А вось пры разліку сумы, якую выпускнік абавязаны будзе вярнуць дзяржаве ў якасці кампенсацыі за сваё нежаданне працаваць па размеркаванні, гады яго платнага навучання не ўключаюцца.
Калі студэнт больш за палову тэрміну вучыўся за кошт бюджэтных сродкаў, а затым перавёўся на платнае завочнае аддзяленне, то ён таксама трапляе пад размеркаванне. За выключэннем выпадку, калі ён ужо працуе па сваёй спецыяльнасці.
Выпускнік мае права адмовіцца ад работы па размеркаванні (пераразмеркаванні) ці накіраванні і добраахвотна вярнуць дзяржаве сродкі, выдаткаваныя на яго падрыхтоўку. Зрабіць гэта можна яшчэ на этапе размеркавання. Выпускнік павінен звярнуцца па разлік сумы сродкаў, выдаткаваных на яго навучанне. Пасля ўнясення сродкаў ён можа атрымаць даведку аб свабодным працаўладкаванні. У тым выпадку, калі малады спецыяліст не прыступіў да працы ці звольніўся да заканчэння тэрміну абавязковай адпрацоўкі і не жадае вяртаць у бюджэт сродкі добраахвотна, грошы спаганяюцца з яго ў судовым парадку.
Надзея НІКАЛАЕВА
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.