Беларусы
Згараем мы ў варожым полымі —
і ўжо не ўратавацца быццам.
Ды нас не ўзяць рукамі голымі,
як і не ўзяць у рукавіцах.
Стараемся з агню звек выскачыць,
хоць, бы вуглі ў ім, пачарнелі,
ды, як ні паляць нас, мы звычныя —
дасюль яшчэ вунь не згарэлі.
І хоць адзін калі з нас выжыве,
дык не звядзецца род ніколі:
і мову не адымуць прышлыя,
і нас саміх не заняволяць…
Настальгія
Пры якім ні быў бы чыне,
хто б цябе як ні ўзвялічваў,
настальгія па Айчыне
за мяжой душу казыча.
Дух Айчыны, ён нязводны.
Наша ў тым і падабенства:
адтаем, як вее родным,
чым і веяла з маленства.
* * *
Па пашпарце і сын мой родам
з маёй Патапаўкі, адтуль,
дзе, як і ўсюды, з кожным годам
дзяцей нашмат менш, чым бабуль.
З адных крыніц пілі ваду мы,
адна нас песціла зямля,
ды мне і сыну часам сумна,
што згадваем яе здаля.
* * *
Дах для зямлі — не проста дах,
бо дахам — неба для зямлі.
Ды і зямля — не проста гмах,
які прапрашчуры ўзвялі.
Зямля для нас — агульны дом,
і ў доме тым нам жыць усім.
Калі ж дом раптам мы ўзарвём,
то і загінем разам з ім.
Не можам мы таго не знаць,
аднак, гуляючы з агнём,
ці не пара нам перастаць
падкладваць дровы
пад наш дом?
* * *
А гады ўжо ляцяць,
і за спінаю — смерць.
Шмат хацеў бы сказаць,
ды наўрад ці паспець,
і наўрад ці адкрыць
тое ўсё, што ў душы.
Век імкліва ляціць
да апошняй мяжы.
Для каго гэта ўжо
я жыццё ўсё бярог?
Што за тою мяжой,
адно й ведае Бог.
* * *
Не зарастае быллём
памяць
і голаў не тлуміць.
Жыць можна з сытым валлём
і ні пра што больш не думаць.
Ды як, не думаўшы, жыць,
памяць адрынуўшы раптам?
Жыць — як само набяжыць?
Можна і так.
А ці варта?
Акоп
Праўнукам ветэрана вайны
Івана Яўхімавіча Зэкава
Капаюць акоп у мірныя дні
нашчадкі ваеннага прадзеда.
Унукаў, бабуля, у тым не віні,
бо ім гэта ў спадчыну дадзена.
Калі ад блакады стагнаў Ленінград,
акоп не адзін прадзед выкапаў,
каб потым ніколі не трапіў снарад
ў акоп да Мацвея з Нічыпарам,
каб сніліся ім толькі мірныя сны
і каб іх мінулі часы неспакойныя…
Капаюць акоп у мірныя дні
Іванавы праўнукі —
праўнукі воіна.
Паэзія
А што паэзія?
Лязо.
Па ім, нібы па мінах, ходзіш
і, шапялявячы «няўзо?»,
«няўжо» сапраўднае знаходзіш.
Няўжо паэзія — лязо,
і, рыфмы кінуўшы на рыфы,
праз шапялявае «няўзо?»
яна жыве спрадвек для рыфмы?
* * *
Туга — хвароба невылечная,
і дні ўсе ёй спаўна аздоблены.
Пара задумацца пра вечнае
і дарабіць, што недароблена.
Пара, адкінуўшы мізэрнае,
на болей важным засяродзіцца,
бо ўжо і сілы не бязмерныя,
дый ці на ўсё іх раптам хопіць,
зрабіць яшчэ так многа хочацца
і ні на кроплю не раскаяцца,
пакуль жыццёвы век не скончыцца,
які імкліва ўсё ж канчаецца.
* * *
Адмераў веку Бог нямнога —
жыцця канчаецца сувой,
і ўжо жыццёвая дарога
вядзе мяне на фініш мой.
Я, зрэшты, смерці не баюся —
няхай ступае на парог! —
хіба што на сябе злуюся,
бо шмат чаго зрабіць не змог.
Шкадую сёння я пра тое,
што, непрыкаены ў жыцці,
я час разменьваў на пустое,
а штось галоўнае ўпусціў,
што, можа, быў зашмат лянівы,
у працы не згараў датла,
што не зрабіў цябе шчаслівай,
такой, якой ты быць магла.
І хоць вядуць мяне на фініш
мае жыццёвыя гады,
ды рады я, што свет не згіне —
і будзеш жыць на свеце ты.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».