Вы тут

Біятланістка Дар'я Юркевіч заваявала бронзавую ўзнагароду


У індывідуальнай гонцы на 15 км у шведскім Эстэрсундзе наша спартсменка заваявала бронзавую ўзнагароду. Апярэдзіць яе змаглі толькі немка Лаура Дальмайер і францужанка Анаіс Бяскон.


Галоўным козырам Дар'і ў гэтай гонцы стала стральба. У сувязі з моцным парывістым ветрам у Эстэрсундзе многія біятланісткі ў той дзень нарабілі шмат памылак на стрэльбішчы, але беларуску такія ўмовы надвор'я не напалохалі і не перашкодзілі паказаць сябе сапраўдным прафесіяналам. Юркевіч адзіная з усіх (у гонцы ўдзельнічала 101 спартсменка) змагла абысціся без промахаў на ўсіх чатырох агнявых рубяжах, што дазволіла ёй трапіць на п'едэстал Кубка свету ўпершыню ў сваёй кар'еры.

— Яшчэ да старту гонкі паставіла перад сабой задачу — страляць без памылак. Але на справе аказалася, што гэта вельмі цяжка, таму што моцна перашкаджаў вецер. У такой сітуацыі вырашыла не спяшацца і сканцэнтравацца на агнявых рубяжах. Асабліва гэта тычылася заключнай стральбы. Ні аб якім прызавым месцы на дыстанцыі не думала. Бронзавы медаль — гэта шчаслівы шок. Узнагарода за доўгае цярпенне. Зрабіла такі сюрпрыз і сабе, і камандзе, і балельшчыкам. Не скрыю, да галоўнага старту сезона, чэмпіянату свету, буду рыхтавацца менавіта да індывідуальнай гонкі: яна атрымліваецца ў мяне лепш за ўсё, — расказала Дар'я пасля ўзнагароджання.

Нагадаем, да поспеху Дар'і Юркевіч у апошні раз беларускія біятланісты падымаліся на п'едэстал у гонках Кубка свету ў сакавіку 2015 года.

Адзначым, што 28-гадовая Дар'я Юркевіч дэбютавала на Кубку свету ў 2010 годзе, але доўгі час не магла замацавацца ў асноўным складзе. Аж да леташняга сезона Дар'я выступала пераважна на этапах Кубка ІBU і толькі зрэдку трапляла на галоўныя старты.

Для іншых беларусак індывідуальная гонка склалася не так паспяхова. Надзея Скардзіна стала 43-й, Ірына Крыўко — 46-й, Анастасія Кінунен — 72-й, Хрысціна Ільчанка — 85-й.

Дар'я Лабажэвіч

lobazhevich@zviazda.by

Загаловак у газеце: У нас з'явіўся «бронзавы» снайпер

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».