Стартуе тыдзень 22 лістапада. У гэты дзень пройдуць "Геаграфічныя сустрэчы" (вул. Ленінградская, 16, ауд. 211). Пачатак у 14.00. Іх удзельнікамі стануць старшакласнікі мінскіх школ. Для падлеткаў адчыняць дзверы ўсіх навучальных аўдыторый, лабараторый і дэканата факультэта. Школьнікі змогуць паглядзець, як арганізаваны на геафаку адукацыйны працэс, наведаць лекцыі і семінарскія заняткі.
Акрамя таго цягам трох дзён (з 22 па 24 лістапада), студэнты-географы і самі будуць наведваць сталічныя школы. Тэма сустрэч - "Геаграфічны факультэт - наш выбар". Вучням прадаставіцца магчымасць даведацца пра студэнцкае жыццё на факультэце, прыёмную кампанію і ўступныя іспыты, так бы мовіць, з першых рук - ад людзей, якія яшчэ самі нядаўна былі абітурыентамі.
У чацвер, 24 лістапада, на геаграфічным факультэце будуць сустракаць удзельнікаў школьных алімпіяд па геаграфіі і іх кіраўнікоў. Ім раскажуць пра сучасныя тэндэнцыі ў алімпіядным руху. Акрамя таго, госці пад кіраўніцтвам выкладчыкаў факультэта старанна прааналізуюць заданні і вынікі апошняй Міжнароднай алімпіяды па геаграфіі, якая праходзіла ў гэтым годзе ў Кітаі.
Дэталёвая прэзентацыя спецыяльнасцяў геаграфічнага факультэта будзе праходзіць 23, 24, 25, 28 і 29 лістапада. У гэтыя дні ўсіх ахвотных чакаюць на кафедрах факультэта. У прыватнасці, 23 лістапада выкладчыкі кафедры агульнага землязнаўства і гідраметэаралогіі раскажуць пра спецыяльнасць "гідраметэаралогія", а прадстаўнікі кафедры геаэкалогіі прадставяць 24 лістапада спецыяльнасць "геаэкалогія". Пра важнасць геаграфічных ведаў школьнікі даведаюцца 25 лістапада, стаўшы гасцямі кафедры геаграфіі свету і адукацыйных тэхналогій. А наведаўшы 28 лістапада кафедры глебазнаўства і ЗІС, а таксама геадэзіі і картаграфіі, яны змогуць стварыць сваю геаграфічную карту на аснове касмічных здымкаў і пазнаёміцца са спецыяльнасцямі "геаінфармацыйныя сістэмы" і "космааэракартаграфія".
Завершыцца цыкл прэзентацыйных мерапрыемстваў 29 лістапада сустрэчай з выкладчыкамі кафедраў дынамічнай геалогіі, інжынернай геалогіі і эканамічнай геаграфіі замежных краін. Юныя госці даведаюцца пра геалогію і геадэмаграфію ў сучасным свеце. Пачатак усіх прэзентацыйных мерапрыемстваў ў 15.30.
А лагічнай кропкай у правядзенні "Тыдня геаграфіі" стане 30 лістапада семінар з удзелам кіраўнікоў метадычных аб'яднанняў і настаўнікаў геаграфіі сталічных школ. Пачатак у 14.00. Для іх будзе арганізаваны круглы стол з аўтарамі падручнікаў па геаграфіі. Плануецца таксама абмеркаваць пытанні сумеснага супрацоўніцтва ў арганізацыі педагагічнай практыкі студэнтаў-географаў з магчымасцю іх далейшага працаўладкавання.
Надзея НІКАЛАЕВА
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».