Урачыстая цырымонія была прымеркавана да Дня ўшанавання ветэранаў органаў унутраных спраў і ўнутраных войскаў МУС. Ветэранская арганізацыя аб’ядноўвае больш за 24 тысячы абаронцаў правапарадку, якія выйшлі на заслужаны адпачынак, у яе межах створана 455 пярвічак. Арганізацыя, якая сёлета адзначыла сваё 25-годдзе, па праву лічыцца адной з самых масавых і актыўных у рэспубліцы. Са сцэны прагучалі словы ўдзячнасці ветэранам, шмат гаварылася аб пераемнасці пакаленняў і значнасці конкурсу.
Намеснік Міністра ўнутраных спраў па ідэалагічнай працы і кадравым забеспячэнні генерал-маёр міліцыі Аляксандр Кобрусеў адзначыў: "Ветэраны - скарбніца вопыту і традыцый. Яны наш залаты фонд, своеасаблівы сплаў энергіі душ і сэрцаў". За шматгадовую добрасумленную і бездакорную службу ў органах унутраных спраў і ўнутраных войсках шэраг ветэранаў ўдастоіліся грамат і ўзнагарод.
Зараз вядзецца актыўная падрыхтоўка да 100-годдзя беларускай міліцыі - яго святкаванне адбудзецца 4 сакавіка налета. Конкурс стаў стартам насычанай праграмы, якая разгорнецца напярэдадні юбілею. Усяго на суд журы даслалі парадку 900 работ у 7 катэгорыях: дзіцячы малюнак, твор выяўленчага мастацтва, фотаработа, плакат, літаратурна-мастацкі і паэтычны твор, песня.
Пераможцам у намінацыі “Твор выяўленчага мастацтва” стаў прафесіянал двойчы. Андрэй Шугай - оперупаўнаважаны крымінальнага вышуку з горада Кобрына, у якога, да таго ж, ёсць мастацкая адукацыя.
- Я вучыўся па спецыяльнасці настаўнік малявання і чарчэння. Адзін год прапрацаваў у школе. З 2004 года - у міліцыі. Цяпер малюю ў сваё задавальненне, аддаю перавагу краявідам. На мой погляд, карціна павінна дарыць станоўчыя эмоцыі, таму за працу бяруся толькі ў добрым настроі. Часам калегі або знаёмыя просяць намаляваць партрэт у падарунак, мне прыемна гэта рабіць. У аснову маёй працы, якая перамагла на конкурсе, лёг рэальны выпадак: каля 10 гадоў таму я выцягнуў з вады хлапчука, які праваліўся пад лёд, - расказаў Андрэй.
Сярод удзельнікаў як аматары, так і прафесіяналы, аднак перад журы яны ўсе роўныя. Так лаўрэатамі конкурсу ў намінацыі «Лепшы літаратурна-мастацкі твор у прозе» сталі вучаніца 7 класа Маргарыта Садоўская, падпалкоўнік міліцыі Мікалай Аўтухоў і загадчык аддзялення для састарэлых і інвалідаў тэрытарыяльнага цэнтра сацыяльнага абслугоўвання Уладзімір Мажылоўскі. Пераможцам сярод паэтаў стала дзевяцікласніца Ангеліна Далганава. Акрамя таго, адбылася прэм'ера песень лаўрэатаў конкурсу.
Як паведаміў Аляксандр Кобрусеў, незадоўга да даты святкавання юбілею міліцыі запланавана адкрыццё ў абноўленым выглядзе музея МУС, які зараз зачынены на рэстаўрацыю. Нацыянальны банк і РУП "Белпошта" рыхтуюць памятныя манеты і маркі. Будзе выпушчаны 8-серыйны дакументальны цыкл пра гісторыю беларускай міліцыі, а таксама зняты мастацкі фільм.
Дар’я КАСКО.
Фота прадастаўлена прэс-службай МУС.
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».