Касмічныя турысты — сем'і блізнят і двайнят, вучоныя-астранаўты ў асобах журы, а таксама астатнія пасажыры касмічнага карабля: балельшчыкі і госці — усе накіраваліся ў міжгалактычную экспедыцыю для вывучэння нябесных свяцілаў сузор'я Блізнят. На шляху яны сустрэлі касмічнага карэспандэнта Спейскора, пазнаёміліся з жыхарамі Залюстроўя і паласаваліся прысмакамі на Гасціннай планеце. У такім казачным фармаце ў Стоўбцах прайшоў першы гарадскі конкурс «Адразу дзве ўсмешкі маме».
За званне самай гасціннай сям'і, самых чароўных маленькіх блізнят, самых непадобных двайнят спаборнічала пяць сем'яў. Няшмат, аднак тое, што зрабілі героі свята, колькі патрацілі на гэта энергіі і часу, вартае шчырага прызнання.
— Рыхтуючы сцэнарый, мы хацелі дадаць мерапрыемству сваю разынку, якой не было ні ў кога, бо кожная сям'я — гэта ўнікальны свет, — расказала арганізатар свята дырэктар раённага цэнтра культуры Ала СУШЧ. — Удзельнікі прыходзілі на рэпетыцыі, з імі працаваў прафесійны харэограф над тэхнікай дэфіле. Усе нашы спецыялісты дапамагалі ствараць відэавізіткі і трымацца на сцэне. А яшчэ ім трэба было нагатаваць для салодкага конкурсу прысмакаў...
Падчас салодкага застолля, дарэчы, вырашылася, чый здымак стаў лепшым. Трохгадовыя Кірыл і Данііл ЮРАСЫ сталі самымі фотагенічнымі блізнятамі. Іх тата Аляксандр, дарэчы, адзіны з удзельнікаў мужчын выступаў са сцэны і чытаў вершы разам з жонкай Дзінай.
Самай гасціннай прызналі сям'ю блізнят Аліны і Паліны ГРЫШАН, чыя мама Валянціна разам з дочкамі выканала песню, словы да якой напісала сама. Глядацкія сімпатыі, дарэчы, таксама дасталіся ім.
— Рыхтавацца аказалася не так проста, як мы думалі. Было і цяжкавата месцамі, але як выйшлі на сцэну, усё забылася — застаўся толькі святочны настрой, — кажа яна. — А натхняюць мяне мае дочкі — мае музы. Гляджу на іх, і словы самі складваюцца ў тэкст песні.
Самымі непадобнымі двайнятамі аднагалосна і без варыянтаў сталі 11-гадовыя Ксенія і Кірыл ГАНЧАРОНКІ. Іх салодкі стол з тортам, тарталеткамі ды хрушчыкамі маме Ірыне дапамагалі ствараць не толькі дзеці, а і бабулі.
Блізняты Кірыл і Ілья КРЫВЕГІ зачаравалі журы і сталі пераможцамі адпаведнай намінацыі. «Хоць тата і не змог прысутнічаць на свяце, аднак ён актыўна разам з хлопцамі дапамагаў рыхтаваць і гатаваць усё. Вось сэрцайкі з мармеладу яны разам выразалі», — смяецца мама блізнят Марына.
Двайняты Ангеліна і Міла ШАЎЧЭНКі, якім вось-вось павінна споўніцца толькі два гады, таксама без канкурэнцыі сталі пераможцамі ў намінацыі самыя маленькія блізняты. Пры гэтым у шматдзетнай сям'і Шаўчэнка ёсць яшчэ старэйшая дачка, а мама чакае чацвёртае дзіця. «Хацелася, каб дочкі прывыкалі да людзей і стасункаў, не баяліся дзетак і дарослых, развіваліся — нам хутка ў садзік ужо», — расказала пра намер удзельнічаць у конкурсе Таццяна.
Тата гэтага ўнікальнага сямейства будуе дом сваімі рукамі і спадзяецца, што наступным членам сям'і будзе сын.
Ірына СІДАРОК
Фота Надзеі БУЖАН
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».