Карэспандэнт «Звязды» дапамог чытачцы атрымаць планшэт у падарунак ад вядомай гандлёвай сеткі, якая актыўна рэкламавала свой «бонус»: магчымасць пры пакупцы тавару бясплатна займець яшчэ адно электроннае ўстройства.
Паколькі «канфліктная сітуацыя», як кажуць, вычарпана, не ўказваю назву гандлёвай сеткі, дзе прадаюць бытавыя прыборы. Яна актыўна рэкламуецца па тэлебачанні, у інтэрнэце, газетах, на бігбордах цэнтральных вуліц. Крамы працуюць у розных гарадах краіны.
Жыхарка Віцебска даўно хацела купіць сабе ноўтбук. Ды такі, каб і сыны маглі пагуляць на ім у папулярныя сярод дзятвы гульні. Так што планшэт, паабяцаны крамай у якасці бясплатнага бонусу, хлопчыкам быў бы патрэбны.
Жанчына з дзецьмі прыехала ў краму. Ветлівы гандляр растлумачыў, што рэкламная акцыя яшчэ не завершана, але планшэты... на жаль, скончыліся.
Па логіцы яна магла б не купляць нічога. Але прывабіла тое, што ноўтбук можна набыць, аформіўшы крэдыт банка непасрэдна ў краме... Пакупка абышлася прыкладна ў 12 мільёнаў рублёў (да дэнамінацыі). Плюс жанчына аплаціла сэрвіснае абслугоўванне на 3 гады — каля 1,9 мільёна. Такім чынам, выканала ўсе ўмовы акцыі, ведаючы, што бонусны планшэт не атрымае.
Логіку жанчын, вядома, растлумачыць цяжка. Але ж, думаю, па кансультацыю ў карпункт яна звярнулася, каб сумненняў не засталося, што яе правы як спажыўца не парушаныя. Пацікавілася: чаму ўсё ж рэкламуюць магчымасць атрымаць падарунак, а насамрэч планшэтаў мінімум? Няўжо не маглі прадугледзець, каб усім хапіла? Магчыма, такім чынам і прывабліваецца больш пакупнікоў?
У размове з прадстаўніком таварыства з дадатковай адказнасцю, якому належыць крама, высветлілася, што ўмовы рэкламнай акцыі не парушаны. Чытачка, як і іншыя, зрабіла пакупку ў перыяд з 1 па 31 ліпеня. Суразмоўца адзначыў, што ў распараджэнні аб правядзенні акцыі гаворыцца пра адпаведны «ліміт» планшэтаў.
У адказе журналісту з упраўлення гандлю і паслуг Віцебскага гарвыканкама таксама адзначаецца, што парушэнняў умоў акцыі няма.
Тым большы рэспект фірме, якая ўсё ж здзейсніла «звычайны цуд»: у якасці выключэння ў канцы жніўня планшэт жанчыне ўручылі! Задаволеная грамадзянка выказала падзяку і журналісту. Сказала, што і надалей будзе рабіць у гэтай краме пакупкі. Думаю, і фірма задаволеная.
...Калі артыкул рыхтаваўся да друку, знаёмы расказаў пра іншую рэкламную кампанію. Яго таварыш карыстаўся карткай банка, які гарантаваў пакупнікам у крамах-партнёрах пры пакупках шакаладку. Адпаведнае паведамленне прыйшло па sms. Якраз зрабіў пакупку — а шакаладку не далі... Дробязь — а чалавеку было непрыемна. Пайшоў да кіраўніцтва крамы і шакаладку ўрэшце атрымаў.
Наконт рэкламных акцый можна доўга разважаць, але з пункту гледжання спажыўца: калі нешта напісалі ў рэкламе, так яно і павінна быць! І не важна: планшэт або шакаладку павінны ўручыць.
Аляксандр ПУКШАНСКІ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
