Вы тут

7 міфаў пра масаж


Ці праўда, што можна пахудзець... лежачы? Ці патрэбен масаж усім без выключэння? Як адрозніць добрага масажыста ад дрэннага? Ці могуць бацькі самі рабіць масаж свайму немаўляці? Адказы на гэтыя пытанні карэспандэнт «Звязды» знайшла на курсах «Асновы класічнага масажу» ў адукацыйным і кадравым цэнтры «Новае заўтра».


Міф 1. Калі балюча, значыць масажыст добры

Некаторыя пацыенты шчыра лічаць, што чым мацней ім мнуць цела — тым лепш. А пасля масажу (асабліва антыцэлюлітнага) абавязкова павінны заставацца сінякі — гэта паказчык эфектыўнасці працэдуры. Калі, маўляў, сінякоў няма, грошы выдаткаваныя дарэмна, масажыст няўмека ці слабак. Але гэта зусім не так. У добрага масажыста павінны быць адчувальныя рукі, а не вялікая сіла. Сіла яму наогул не патрэбна.

«БОЛЮ — «НЕ», СІНЯКАМ — «НЕ» — на першым жа занятку папрасіў запісаць вялікімі літарамі ў канспекце наш выкладчык, масажыст з больш як 15-гадовым стажам Леанід ЧУРЫЛАЎ. — Калі падчас працэдуры ваша самаадчуванне пагоршылася, з'явіўся боль, а на скуры — сінякі, раздражненне, рызыкаваць больш не варта. Вам проста не пашанцавала з масажыстам. Ёсць сярод калег і такія, якія з разумным выглядам будуць запэўніваць вас: «Цярпіце, так трэба». Не трэба: ні болю, ні сінякоў пры любым масажы быць не павінна».

Міф 2. З дапамогай масажу можна пахудзець

Сярод жанчын «лунае» яшчэ адна папулярная байка — пра тое, што масажам можна «раздушыць» альбо «падцягнуць» тлушч. «Насамрэч падцягнуць можна расслабленыя мышцы, але пры гэтым колькасць тлушчавых клетак у нас не зменшыцца, — развейвае чарговы міф Леанід Юр'евіч. — Хутчэй тут можна казаць пра аздараўленчы эфект антыцэлюлітнага масажу, які спрыяе нармалізацыі кровазвароту і лімфатоку, паляпшае абмен рэчываў у арганізме. У выніку за некалькі працэдур можна пахудзець кілаграма на паўтара-два. Аднак, калі вы не зменіце свайго ладу жыцця (не адмовіцеся ад салодкага, тлустага, вэнджанага, вострага і не пачняце займацца спортам), уся праца будзе марнай. Памятайце, масаж — гэта толькі адзін са складнікаў у працэсе пахудзення».

Міф 3. Мама не можа рабіць масаж свайму дзіцяці

Дзіцячы педыятр прызначае прайсці курс масажу амаль кожнаму дзіцяці да годзіка. Паколькі ў паліклініках вялікія чэргі, клапатлівыя мамы кідаюцца шукаць масажыста самі. Часта знаходзяць даволі сумніўных спецыялістаў. «Не рызыкуйце, — параіў нам (сярод курсантаў пераважная большасць — будучыя мамы) выкладчык. — Падыдзіце да выбару масажыста грунтоўна — давярайце сваю крывіначку толькі рукам прафесіянала. Памятайце, што лячэбны масаж — гэта не капрыз для задавальнення, а сур'ёзнае медыцынскае ўздзеянне. Разам з тым раю самім бацькам вывучыць некаторыя масажныя прыёмы. Псіхолагі лічаць, што масаж, зроблены блізкімі, часта дае большы эфект, чым масаж спецыяліста, бо няма пяшчотней дотыкаў мамы і таты. Адзінае, што тым бацькам, якія адважваюцца выконваць масаж дзіцяці самастойна, варта перш-наперш скончыць хоць бы мінімальныя курсы масажу, каб асвоіць тэхніку». Акрамя таго, што тычыцца дзетак, існуе шмат нюансаў. У прыватнасці, калі вы збіраецеся рабіць масаж немаўляці, ніколі не будзіце яго для гэтага. Пачакайце, пакуль дзіця само прачнецца. Нельга масіраваць, калі малое супраціўляецца і не ў захапленні ад працэдуры.

Міф 4. Усё залежыць ад чароўных крэмаў

«Крэмам ды мазям у некаторых салонах прыгажосці прыпісваюцца ці не магічныя ўласцівасці. У сувязі з гэтым зусім абясцэньваецца праца спецыялістаў: масажыст там як бясплатны дадатак да цюбіка, — кажа Леанід Юр'евіч. — Калі шчыра, мяне як спецыяліста гэта раздражняе. Сюды ж можна аднесці міф пра антыцэлюлітныя крэмы. Гэта наогул поўная лухта. Рэдка які крэм пройдзе праз базальны пласт скуры. Антыцэлюлітны ж масаж дасягае свайго эфекту за кошт нармалізацыі гема- і лімфатоку. Галоўны інструмент масажыста ва ўсе часы — гэта рукі. Менавіта пры дапамозе асноўных прыёмаў масажу — пагладжвання, расцірання, размінання і вібрацыі — спецыяліст можа актывізаваць абмен рэчываў у арганізме, палегчыць боль, зняць напружанне ў цягліцах, палепшыць цыркуляцыю крыві і лімфы, разагрэць звязкі. І ў гэтым сэнсе масаж — важная частка лячэння многіх захворванняў». Замест «чароўных» крэмаў, састаў якіх часта надзвычай сумніўны, Леанід Чурылаў раіць выкарыстоўваць сумесі ўласнага прыгатавання, напрыклад аліўкавы алей з мёдам (карацей, усё, што можна ўжываць у ежу).

Міф 5. Добрага масажыста адрозніш толькі пасля ўсяго курса лячэння

Сапраўды, тэрапеўтычны эфект можна ацаніць толькі праз 6 месяцаў. Але знешнія прыкметы прафесіянала можна адсачыць і да пачатку лячэння. Акрамя акуратнага вонкавага выгляду, дагледжаных рук (без ранак, завусеніц), у добрага масажыста павінен быць спецыяльны масажны стол. Прапаноўваць вам масаж на звычайным ложку будзе толькі малакваліфікаваны чалавек. Калі гэта, вядома, не масаж шыйна-каўняровай зоны, рук, галавы, якія можна рабіць седзячы.

Падчас сеансу масажыст ніколі не стане агаляць вам усё цела. Калі масіруецца спіна, то ногі павінны быць накрытыя, і наадварот. Пра высокі ўзровень масажыста сведчыць тое, што ў яго ёсць методыка працы, калі адны рухі плаўна выцякаюць з іншых не толькі на адным сеансе, але і на працягу ўсяго курса масажу.

Міф 6. Масіраваць трэба толькі балючае месца

«А ведаеце, як яшчэ можна адрозніць добрага масажыста ад дрэннага? — запытвае у нас выкладчык і тут жа сам адказвае: Дрэнны масажыст, калі вам баліць мезенец, пачынае масіраваць палец, а добры — спіну. У арганізме чалавека ўсё ўзаемазвязана, і часцяком прычына болю або хваробы крыецца не там, дзе баліць, а ў іншым месцы. У прыватнасці, бывае так, што пацыент скардзіцца на ногі, а праблема ў паясніцы. Боль здольны перамяшчацца па целе ў залежнасці ад размяшчэння ўшчэмленых нервовых карэньчыкаў або парушэння кровазвароту ў тым ці іншым участку». Таму, каб выбраць правільную тактыку лячэння і не нашкодзіць, важна ведаць анатомію і фізіялогію. Масажыст павінен разумець, што будзе адбывацца ў выніку яго дзеянняў, а не рабіць стандартны набор масажных прыёмаў, не разумеючы для чаго ўсё гэта.

Міф 7. Масаж патрэбен усім

«Усім, за выключэннем тых, у каго ёсць супрацьпаказанні да масажу, — удакладніў Леанід Юр'евіч. — І калі ў вас не пытаюцца пра дыягназ, не аглядаюць вас перад тым, як пачаць рабіць масаж, — бяжыце».

Але ж калі я адпачывала на моры ў Егіпце і Балгарыі, то карысталася паслугамі пляжных масажыстаў. І ні разу ніводзін з іх не запытаўся, ці ёсць у мяне нейкія супрацьпаказанні. «Гэта сведчыць у першую чаргу пра тое, што для чалавека на першым месцы — зарабіць грошы, і не важна, якой цаной. З падобным падыходам вы можаце сустрэцца і ў буйных масажных салонах, SPA-цэнтрах. Таму раю не спадзявацца на сумленнасць масажыстаў, а перастрахавацца і запомніць пералік супрацьпаказанняў».

Такім чынам, масаж (і нават самамасаж!) супрацьпаказаны, калі ў вас:

1) варыкознае расшырэнне вен (Леанід Чурылаў: «Калі я бачу на нагах кліента варыкоз, ветліва адмаўляю, бо разумею, што сваім масажам магу справакаваць інсульт»);

2) захворванне шчытападобнай залозы;

3) вострая стадыя любога захворвання;

4) любыя пухліны, як злаякасныя, так і дабраякасныя (у тым ліку фібраміёма маткі ў жанчын);

5) міжпазваночныя грыжы;

6) розныя захворванні (альбо проста раздражненне) скуры (экзэмы, лішаі, гнайнікі, грыбок і г.д.);

7) любыя прастудныя захворванні або проста тэмпература цела, вышэйшая за 37,5°;

5) цяжарнасць (не рэкамендуецца, асабліва на ранніх тэрмінах);

6) менструацыя.

...Мы адразу засмуціліся. Прыйшлі на курсы, каб вучыцца рабіць масаж, а тут столькі супрацьпаказанняў. Леанід Юр'евіч супакоіў нас. «Пагладжванне (адзін з абавязковых элементаў класічнага масажу) ніхто не адмяняў — яно не мае супрацьпаказанняў. Нават звычайны лёгкі дотык да далоні можа рабіць цуды: супакоіць арганізм, зняць стрэс... Пагладжванне рукамі ўплывае ў першую чаргу на нервовую сістэму, павышае ўзровень эндарфіну (гармону шчасця)». Дарэчы, Боб Хоўп (вядомы галівудскі акцёр, які зняўся ў фільме «Форэст Гамп»), пражыў больш за сто гадоў толькі таму, што, як ён сам казаў, кожны дзень рабіў масаж.

Надзея ДРЫНДРОЖЫК

nadzіeja@zvіazda.by

Загаловак у газеце: 7 міфаў пра масаж, або Пагладжванне ніхто не адмяняў

Выбар рэдакцыі

Грамадства

У 72-м аб'яднаным вучэбным цэнтры юнакі атрымліваюць і грамадзянскія спецыяльнасці

У 72-м аб'яднаным вучэбным цэнтры юнакі атрымліваюць і грамадзянскія спецыяльнасці

72-і аб'яднаны вучэбны цэнтр, што ў Печах, — самая вялікая воінская часць у Беларусі. 

Грамадства

Распавядаем, як арганізавана меддапамога ў Паставах

Распавядаем, як арганізавана меддапамога ў Паставах

Самым аддаленым ад абласнога цэнтра раёне краіны.

У свеце

Чаму Дональд Трамп захацеў набыць Грэнландыю?

Чаму Дональд Трамп захацеў набыць Грэнландыю?

Цяпер гэтая аўтаномная тэрыторыя ўваходзіць у склад Каралеўства Данія.

Грамадства

Школы Гомельшчыны прайшлі праверку на гатоўнасць да навучальнага года

Школы Гомельшчыны прайшлі праверку на гатоўнасць да навучальнага года

Сё­ле­та ў да­школь­ныя ўста­но­вы ра­ё­на прый­дзе 2 700 ма­лых.