Вы тут

Пад Новасібірскам загінула сям'я з Пружанскага раёна


Страшная аварыя пад Новасібірскам забрала жыцці чатырох жыхароў Брэстчыны, загінулі муж і жонка, іх сын і 9-гадовы ўнук. Як паведамілі інфармагенцтвы са спасылкай на расійскую Дзяржаўтаінспекцыю, беларускі аўтамабіль рухаўся па трасе Р254 з боку Омска ў бок Новасібірска. У нейкі момант ён выехаў на паласу сустрэчнага руху і ўрэзаўся ў велікагрузную фуру. Удар быў такой сілы, што легкавік ператварыўся ў месіва, яго вадзіцель і пасажыры памерлі на месцы здарэння. Паводле адной з версій расійскіх праваахоўнікаў, беларускі вадзіцель заснуў за рулём.


У машыне на момант аварыі знаходзіліся 58-гадовы жыхар вёскі Юндзілы (ён быў за рулём), яго 54-гадовая жонка, іх 32-гадовы сын і 9-гадовы ўнук — сын дачкі сужэнцаў, яна пражывае разам з бацькамі. Такім чынам, 30-гадовая жанчына страціла разам бацькоў, брата і адзінага сына.

— Аксана зараз у вельмі цяжкім псіхалагічным стане, — расказала карэспандэнту газеты Ніна ПРАТАСЕВІЧ, спецыяліст Ружанскага пасялковага Савета. — Суседзі, аднавяскоўцы стараюцца яе хоць неяк падтрымаць, але ж, самі разумееце, гэта складана.

Ніна Мікалаеўна да рэарганізацыі ўзначальвала сельсавет, у які ўваходзіла вёска, таму добра ведае гэту сям'ю. Паводле яе слоў, сям'ю можна назваць шчырымі, сумленнымі працаўнікамі і надзвычай прыстойнымі людзьмі. Галава сям'і Уладзімір Васільевіч больш за 20 гадоў працаваў галоўным аграномам гаспадаркі, якую пазней далучылі да ААТ «Ружаны-Агра». Цяпер у гэтым сельгаспрадпрыемстве працуе яго дачка Аксана. Жонка апошнім часам займалася асабістай гаспадаркай, у якой налічваецца толькі шэсць кароў. Сужэнцы выгадавалі чацвёра дзяцей.

Старэйшы сын ездзіў у заробкі ў Расію. Два гады таму ён загінуў пад Новасібірскам, там і быў пахаваны. І вось бацькі заказалі помнік тут, вырашылі яго завезці сваёй машынай і ўстанавіць на магіле сына.

Яшчэ ў пасялковым Савеце паведамілі, што дапамагчы прывезці на радзіму целы загінулых бярэцца сельгаспрадпрыемства «Ружаны-Агра». Дасягнутая дамоўленасць з адной з брэсцкіх арганізацый. Яе машына-рэфрыжэратар павінна выехаць 12 жніўня з Брэста ў Новасібірск. Упраўленне па працы і занятасці райвыканкама вырашае пытанне аб аказанні дапамогі на пахаванне сям'і.

...Уся вёска знаходзіцца ў шоку, — сказала Ніна Пратасевіч. Жанчыны цяпер прыгадваюць, як загінулая суседка расказвала, што ўвесь час сніўся сын і клікаў іх да сябе.

Святлана ЯСКЕВІЧ

yackevich@zviazda.by

Загаловак у газеце: Далёка ад дома

Выбар рэдакцыі

Грамадства

Пераможцы конкурсу «Сям'я года — 2019» пра галоўнае ў сямейным шчасці

Пераможцы конкурсу «Сям'я года — 2019» пра галоўнае ў сямейным шчасці

Алена і Сяргей Нікалаевы, а таксама іх пяцёра дзяцей усё яшчэ пад уплывам сваёй трыумфальнай перамогі.

Эканоміка

Падаткі на зямлю і нерухомасць трэба заплаціць да 15 лістапада

Падаткі на зямлю і нерухомасць трэба заплаціць да 15 лістапада

Тым, хто пратэрмінуе або забудзе ўнесці падатак, пагражаюць штраф, пені і ў выключных выпадках вас могуць не выпусціць з краіны.