Анатоль Зэкаў. Казёл і агарод

Байка

Казла пусцілі ў агарод

Праз год

Па дагаворы

У той канторы ў штат

Уладкаваў Казёл Казу

Даглядчыцай капусных град.

А там яшчэ праз нейкі год

У агарод

Перацягнуў Казёл

Увесь свой род.

Цяпер той агарод,

Хаця і лічыцца капусным,

Аднак чыя віна,

Што на градах

Ды на складах,

Усюды — пуста?

Няхай мараль і рэжа слых,

Я на Казла не маю зла.

А байка перш за ўсё пра тых,

Хто ў агарод пусціў Казла.