Вы тут

Рост беспрацоўя спыніўся, а большасць новых вакансій — у сферы паслуг


Напружанасць на рынку працы зніжаецца, канстатуюць эксперты. Калі летась у чэрвені на адну вакансію прыпадала 1,7 беспрацоўнага, то сёлета — 1,5. Заяўлена амаль 35 тысяч свабодных месцаў, што на траціну больш, чым было год таму. «Значнага павелічэння ўзроўню беспрацоўя (на сёння ён складае 1,1 працэнта) мы не чакаем. У нас у прагнозах — не больш за два працэнты да канца года. Пры гэтым ужо другі месяц запар адзначаецца зніжэнне зваротаў у службу занятасці і рост попыту на работнікаў. У эканоміцы адбылося пэўнае ажыўленне», — каментуюць у Міністэрстве працы і сацыяльнай абароны.


Прывабныя месцы

Зменшыліся маштабы вымушанай няпоўнай занятасці. У студзені—маі гэтага года ў такім рэжыме працавала 208,4 тысячы чалавек (каля сямі працэнтаў ад спісачнай колькасці работнікаў). У параўнанні з аналагічным перыядам 2015-га паказчык знізіўся амаль на 12 працэнтаў.

Ці актуальная сёння праблема раздзьмутых штатаў? Згодна з кадравай дыягностыкай (яе правялі больш за тры тысячы прадпрыемстваў), залішняя колькасць работнікаў складае 4,3 працэнта.

Што да новых працоўных месцаў, то за студзень—сакавік на адкрытыя ўпершыню вакансіі ўладкавана 15,8 тысячы чалавек. З іх за кошт стварэння выключна новых прадпрыемстваў — 9 тысяч. Большасць месцаў з'яўляецца ў сферы паслуг. Прырастае кадрамі таксама айці-галіна і швейная вытворчасць.

— У цэлым у Беларусі забяспечана выкананне пастаўленай задачы, — кажа начальнік упраўлення палітыкі занятасці Міністэрства працы і сацыяльнай абароны Алег ТОКУН. 

— Памер заработнай платы на новых вакансіях прыкладна ў 1,5 раза перавышае сярэдні ўзровень па краіне. Ствараюцца сапраўды добрыя, прывабныя месцы, а не працоўныя месцы для галачкі.

Усяго з пачатку года службы занятасці ўладкавалі на пастаянную работу амаль 55 тысяч чалавек.

Кладаўшчыкі з «вышкай»

Каб павысіць канкурэнтаздольнасць, беспрацоўным прапануюць прайсці бясплатныя адукацыйныя курсы. Сёлета на навучанне накіравалі ўжо 5,1 тысячы чалавек.

— Мы зыходзім з сітуацыі ў канкрэтным рэгіёне. Якія спецыяльнасці там цяпер запатрабаваны, па тых служба занятасці і рыхтуе. Больш за тое, у нас існуе апераджальнае навучанне. Наймальнік, ведаючы, што будзе скарачаць работнікаў, можа навучыць іх новым прафесіям, якія яму патрэбны, а потым звярнуцца ў службу занятасці, і там кампенсуюць выдаткі на перанавучанне, — тлумачыць Алег Токун.

Спіс курсаў перыядычна абнаўляецца. Сёлета, напрыклад, адкрыліся такія навучальныя кірункі, як «Сакратар, іспектар аддзела кадраў» (прафесію можна засвоіць за 3 месяцы), «Калькулятар» (1,8 месяца), «Спецыяліст па арганізацыі закупак» і «Тэсціроўшчык праграмнага забеспячэння» (і там, і там заняткі доўжацца 4 тыдні). А суіскальнікам з вышэйшай адукацыяй за 9 месяцаў прапануюць стаць лагістамі.

— Самым запатрабаваным на працягу апошніх пяці гадоў застаецца навучанне беспрацоўных прадпрымальніцкай дзейнасці, справаводству, аўтаматызацыі бухуліку, распрацоўцы праграмнага забеспячэння, — адзначае рэктар Рэспубліканскага інстытута павышэння кваліфікацыі і перападрыхтоўкі работнікаў Алег ЛІСЕЙЧЫКАЎ.

Што цікава, большасць тых, хто прыходзіць на курсы (57 працэнтаў), маюць дыплом універсітэта. У той час калі ў асноўнай часткі беспрацоўных за плячыма толькі школьны атэстат ці прафесійна-тэхнічная адукацыя. Так, кожны чацвёрты, хто вучыцца на кладаўшчыка (гэта спецыяльнасць таксама сярод папулярных), — з вышэйшай адукацыяй.

Наталля ЛУБНЕЎСКАЯ

lubneuskaya@zvіazda.by

Фота БЕЛТА

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».