Вы тут

Горад засынае, прачынаюцца музеі


Чэргі на акцыю «Ноч музеяў» у Мінску ўспамінаюцца з гонарам. Такія ініцыятывы набліжаюць да грамадства высокую, «акадэмічную» культуру. Стэрэатып пра нуднасць у вялікіх залах пад акампанемент настойлівага «таварышы, цішэй» паспяхова разбураецца. Музейная справа здолела не проста зацікавіць шырокія масы, але і стварыць моду на свае мерапрыемствы. Асноўная частка «начэй» пройдзе 21 мая — у нашай краіне ўжо дванаццаты раз (увогуле першая акцыя была арганізавана ў Берліне ў 1997 годзе). Гарады ў гэтую ноч ажывяцца, па вуліцах засноўдаюць вялікія кампаніі, у музеях будзе шумна. Праўда, «ноч» у гэтым выпадку — перабольшванне: асноўная частка пляцовак разлічвае свае праграмы да дванаццаці гадзін. Але гуляць да раніцы, як у песні Цоя, нішто не замінае. Няхай у вокнах гаснуць агні і з'язджае апошні трамвай.

Прадстаўляем пяць пляцовак, куды варта завітаць, каб далучыцца да трэнда і высокай культуры адначасова.


1. Нацыянальны мастацкі музей у Мінску

Стрыт-арт, гульні, медытацыі, партал паміж мінуўшчынай і будучыняй. Музей, які знаходзіцца ў працэсе пашырэння і аднаўлення, назваў сваю праграму «Учора+заўтра». Знак «+» — гэта сённяшні дзень: сам музей знаходзіцца на пэўным памежжы, прытым фантастычная тэма парталаў праз час і прастору прывабная сама па сабе. Тут можна будзе ўбачыць тэатральныя эксперыменты, паслухаць жывую музыку, паўдзельнічаць у гульнях, памедытаваць і, зразумела, яшчэ раз зірнуць на сцены музея з экспанатамі.


2. Музей гісторыі беларускага кіно

Мода, дэфіле, фота ў кінавобразе, эксклюзіўная кава. На афішы «Моднай ночы» Музея гісторыі беларускага кіно кадр з фільма «Снеданне ля Ціфані» з сімвалам кіно, стылю і сваёй эпохі Одры Хэпберн. Тэматыка «Ночы» з гэтым і звязана — са стылем. На пляцоўцы арганізуюць кінадэфіле, якое будуць суправаджаць каментарыі гісторыка моды Таццяны Церашковіч, а крыху пазней можна будзе паслухаць лекцыю яшчэ аднаго эксперта ў гэтай сферы — Сашы Варламава. Тут жа адбудзецца паказ калекцый адзення і аксесуараў. Жывая музыка, здымкі ў кіношных вобразах у спецыяльна арганізаваных фотазонах, лекцыі — усё на фоне выстаўкі адзення ручной работы, упрыгажэнняў і аксесуараў з Беларусі, Украіны, Літвы, Расіі і ЗША.


3. Нацыянальны цэнтр сучасных мастацтваў (дзве пляцоўкі — на праспекце Незалежнасці, 47 і на Някрасава, 3)

Майстар-класы, спектакль, шоу светлавых карцін, DJ-сэты, Эндзі Уорхал. НЦСМ у праграме «Будзь геніем» прысвячае «Ноч музеяў» тым мастакам, якія сталі трывалай часткай масавай культуры, — папулярным класікам, чые карціны часцяком цытуюцца ў сучасным кантэксце. Марк Шагал, Рэнэ Магрыт, Эндзі Уорхал, Сальвадор Далі, Фрыда Кало. Апошняй прысвяціла сваю калекцыю, якая будзе паказана на Някрасава, дызайнер Natasha Tsu Ran. А ў будынку на праспекце пройдзе шоу светлавых карцін, якое распавядзе пра вядомую мастачку. На першай пляцоўцы пакажуць спектакль пра Эндзі Уорхала «Нічога асаблівага», а на столь будуць праецыравацца слайды і відэа з ажыўшымі карцінамі. На другой пройдуць майстар-класы па жывапісе і танцах, запрацуе творчая студыя па стварэнні скульптур, да якой можна будзе далучыцца.


4. Літаратурна-мемарыяльны музей Якуба Коласа

Рок, квэст, рэтра-аўтамабілі, паэзія, беларускамоўныя настольныя гульні. Кажуць, дом Якуба Коласа быў заўсёды адкрыты для гасцей. Але пасля таго, як пачыналася ноч і ў акне творцы запальвалася святло, пісьменніка ніхто не турбаваў, бо гараджане ведалі: паэт заняты. Сваю праграму музейцы назвалі «Святло ў акне», а тэмай абазначылі падарожжы. Па папярэднім запісе можна паўдзельнічаць у квэсце, у якім адначасова са спаборніцтвам камандаў убачыць горад часоў класіка і месцы, апісаныя ў яго творах. У музеі пройдзе выстаўка рэтра-аўтамабіляў 1950-х гадоў, у гаражы пісьменніка будзе адкрыта экспазіцыя «У хвалях няспыннага руху: аўтамабільнымі шляхамі Коласа», адкрыюцца паэтычныя і музычныя пляцоўкі. Тут можна будзе паслухаць гурты Markuts Band, RECHA, Re1іkt і запісаць запаветнае жаданне чарніламі, пяром і за сталом Якуба Коласа.


Традыцыйна да акцыі далучаюцца музеі па ўсёй краіне. Апроч сталіцы, выключныя праграмы ў «Ноч музеяў» правядуць у Полацку, Віцебску, Брэсце, Магілёве (дзе будуць арганізаваны нават дзве «ночы»), Гомелі, Браславе, Лідзе і іншых гарадах. Даты і час правядзення вар'іруюцца.

katsyalovіch@zvіazda.by

Выбар рэдакцыі

Культура

Больш за 100 літаратараў з усіх рэгіёнаў краіны возьмуць удзел у мерапрыемствах Дня беларускага пісьменства

Больш за 100 літаратараў з усіх рэгіёнаў краіны возьмуць удзел у мерапрыемствах Дня беларускага пісьменства

Свята, якое ўжо традыцыйна ладзіцца ў першую нядзелю верасня, сёлета прымае Слонім.

Грамадства

Як працуюць сядзелкі

Як працуюць сядзелкі

Попыт на сядзелак ці медсясцёр, якія могуць даглядаць цяжка хворых людзей на даму, пастаянна расце.

Культура

Алесь Родзім: Рабілі «афармілаўку» для калгасаў, вярталіся ў свае падвалы і працягвалі маляваць

Алесь Родзім: Рабілі «афармілаўку» для калгасаў, вярталіся ў свае падвалы і працягвалі маляваць

Беларускаму складніку Тахелеса прысвечаны арт-фестываль «Міфалагема тысячагоддзя», што адкрыўся ў прасторы Ок16 15 жніўня.