21 верасня, панядзелак

Вы тут

Не дазваляйце сабе быць моцнай


Што б мужчыны ні казалі, кожны з іх у душы марыць пра рамантычную асобу, якая нагадвае тургенеўскую паненку, нават калі ў гэты адрэзак часу ён сустракаецца з дзяўчынай «без комплексаў». Не верце, што прадстаўнікам моцнага полу падабаюцца практычныя жанчыны, рэалісткі, якія цвёрда стаяць на нагах! Сімбіёз кухоннага камбайна, пральнай машыны і пыласоса патрэбен толькі мужчыну-спажыўцу. Але такі мужчына не патрэбен вам!


Між іншым, роля непрактычнай асобы, далёкай ад штодзённасці і рэальнага свету, не толькі значна больш выйгрышная, але і прыносіць вельмі адчувальныя выгоды. Дайце мужчыну магчымасць аб вас клапаціцца. Будзьце крыху актрысай, паказвайце бездапаможнасць і збянтэжанасць у любой цяжкай (і не вельмі цяжкай!) сітуацыі. Жанчыны, якія выглядаюць слабымі і бездапаможнымі, дазваляюць нават не вельмі мужнаму мужчыну адчуць сябе моцным. А таму заўсёды выйграюць у яго вачах.

Любоў да сябе — ідэйны змест прынцыпу разумнага эгаізму, а яго практычнае выражэнне заключаецца ў тым, каб перакласці на плечы мужчыны як мага больш разнастайных абавязкаў, у тым ліку і тых, якія раней былі вашымі. Прымяняючы прынцып разумнага эгаізму з самых першых дзён вашага знаёмства з мужчынам, вы выхаваеце ў ім пачуццё адказнасці, якое вельмі спатрэбіцца, калі вы надумаеце выйсці за яго замуж.

Што для гэтага трэба?

  • Любіце сябе больш, чым свайго мужчыну. Чым больш вы будзеце зведваць цёплых пачуццяў да сябе, тым больш шанцаў, што ваш партнёр пакахае вас з той жа сілай.
  • Рабіце толькі тое, да чаго ляжыць душа, што вам цікава і выклікае станоўчыя эмоцыі. Ніколі не рабіце таго, чаго вам актыўна не хочацца рабіць. Калі вам не хочацца ехаць на дачу капаць градкі — не едзьце. Загубіўшы ўік-энд для таго, каб пасеяць пятрушку і кроп, вы, магчыма, упрыгожыце свой стол, але не сваё жыццё.
  • Не хадзіце ў госці да людзей, якія вам непрыемныя. Свайму абранніку вы гэтага, вядома, не кажыце, прымайце запрашэнне і... спакойна займайцеся сваімі справамі.
  • Калі ў вас назбіраўся поўны кошык бруднай бялізны, а вам хочацца пачытаць дэтэктыў або паглядзець любімы серыял — не адмаўляйце сабе ні ў чым. Калі муж бурчыць, што ў яго няма чыстых кашуль, — хай перыядычна мые іх сам. Рашыўшыся на сумеснае жыццё, вы не падпісвалі абавязацельствы па «бытавым абслугоўванні» яго персоны.
  • Увільваць ад непрыемных спраў можна такім чынам: ніколі не спрачайцеся з мужчынам, не кажыце, што вы лянуецеся або вам не хочацца, на словах згаджайцеся, што ўсё будзе зроблена, але пры гэтым... нічога не рабіце. А потым — разгубленая ўсмешка і: «Прабач, мілы, я зусім забылася!» або «Ах, як мне шкада, не сярдуй, калі ласка!». Ну як ён можа не дараваць?!
  • Ніколі не забывайце, што ў вас ёсць не толькі абавязкі, але і правы. Адваёўвайце сабе пабольш правоў і паціху пазбаўляйцеся ад абавязкаў.
  • Фізічная, брудная праца — не для вас. Калі са сцяны звалілася карціна — не спяшайцеся зноў яе павесіць. Любая жанчына ў стане ўбіць цвік у сцяну, але навошта ёй гэта рабіць?! Калі ў вашым доме ёсць істота мужчынскага полу — гэта яе прэрагатыва. Карціна няхай так і стаіць, прыхіленая да сцяны, да таго часу, пакуль істота, якая ганарліва называе сябе «мужчынам», не зробіць ласку дастаць драбінкі, малаток і цвік. Калі капае водаправодны кран, не спяшайцеся тэлефанаваць у дыспетчарскую, каб выклікаць слесара. Калі ў вашага спадарожніка жыцця рукі не з таго месца растуць, каб замяніць пракладку, дык хай хоць бы выкліча слесара. Заадно і павучыцца, як паправіць кран. (Дарэчы, ніякіх прамудрасцяў у гэтым няма, такую аперацыю цалкам можа здужаць мужчына нават з трыма вышэйшымі адукацыямі.)
  • Мужчын не трэба занадта шкадаваць. Любая нагрузка ім толькі на карысць. Праца ж, як вядома, малпу ператварыла ў чалавека, значыць і прадстаўніка мужчынскага полу можа ператварыць у мужчыну.
  • Беражліва стаўцеся да ўласнага добрага настрою. Ніколі не павышайце голасу, не крычыце, не спрачайцеся і не скандальце з мужчынам. Не марнуйце эмоцыі! Памятайце, што адмоўныя эмоцыі негатыўна адбіваюцца на знешнасці жанчыны.
  • Навучыцеся гаварыць «не». Праблема многіх жанчын у тым, што яны вельмі лёгка кажуць «так» і не ўмеюць прамаўляць «не». Адмаўляючы каму-небудзь, абгрунтуйце прычыну. Калі ваша матывіроўка апанента не задаволіць — яму ж горш.
  • Ніколі не вяслуйце, седзячы ў лодцы з мужчынам (сказанае, вядома ж, не варта разумець толькі літаральна). Вобразна кажучы, будзьце па жыцці штурманам, але не весляром.
  • І самае галоўнае: НЕ ПСУЙЦЕ мужчын тым, што бераце на сябе іх функцыі!

Асвоіўшы гэтыя прынцыпы, вы зразумееце, што можна атрымліваць задавальненне ад жыцця, не расчароўваючы іншых, не ўшчамляючы іх інтарэсы, але пры гэтым і не крыўдзячы сябе.

Загаловак у газеце: Уключаем... эгаізм

Выбар рэдакцыі

Культура

У выдавецтве «Мастацкая лiтаратура» выйшла кнiга Аляксандра Радзькова «Мой фiзмат»

У выдавецтве «Мастацкая лiтаратура» выйшла кнiга Аляксандра Радзькова «Мой фiзмат»

Пра калег — настаўнiкаў, старэйшых таварышаў, паплечнiкаў распавядае доктар педагагiчных навук, прафесар матэматыкi, заслужаны дзеяч навукi Рэспублiкi Беларусь.

Грамадства

Тураўскі крыж упершыню будзе прадстаўлены 26 верасня

Тураўскі крыж упершыню будзе прадстаўлены 26 верасня

На свята Узнясення Крыжа Гасподняга, падчас вячэрняй службы ў Мінскім кафедральным саборы.

Грамадства

Як і чым жыве колішняя «памідорная сталіца» Беларусі?

Як і чым жыве колішняя «памідорная сталіца» Беларусі?

Каб адчуць, чым organіc food адрозніваецца ад звыклых для сучаснага гараджаніна прадуктаў, дастаткова пакаштаваць памідоры ў Савічах і параўнаць іх з таматамі з гіпермаркета.

Грамадства

Генеральны дырэктар РУП «Белпошта» Святлана Юркевіч: Мы будзем развіваць перш за ўсё паштаматы

Генеральны дырэктар РУП «Белпошта» Святлана Юркевіч: Мы будзем развіваць перш за ўсё паштаматы

На працягу многіх дзесяцігоддзяў пошта асацыіравалася з традыцыйным наборам паслуг — лістамі, пасылкамі, газетамі, пенсіямі... Але сучасныя тэхналогіі ўсё больш уваходзяць у наш побыт.