Правілы для дзяўчат, якія носяць лінзы

Апошнім часам усё больш дзяўчат у акулярах аддаюць перавагу кантактным лінзам. Для таго каб у вас не было праблем з адчувальнасцю вачэй, трэба арыентавацца на наступныя правілы для тых, хто носіць лінзы:

• Каб мінімізаваць рызыку раздражнення слізістай абалонкі вачэй, выбірайце касметычныя сродкі, якія сумяшчальныя з лінзамі. На іх звычайна стаіць пазнака: «гіпаалергенны», «прайшоў афтальмалагічны кантроль», «прызначаны для тых, хто носіць лінзы».
• Туш трэба выбіраць на воднай аснове для адчувальных вачэй і мяняць яе кожныя тры месяцы. Старайцеся не купляць занадта вадкую туш.
• Аловак для вачэй мяняюць праз такі ж тэрмін. Ён павінен быць мяккім, воданепранікальным і не расцякацца. Не варта падводзіць алоўкам ўнутраны бок века.
• Цені выбірайце сухой структуры, якія добра кладуцца і не абсыпаюцца. Наносіць іх лепш аплікатарам. Небяспеку ўяўляюць цені з буйнымі бліскаўкамі, якія могуць патрапіць у вочы.
• Накладныя вейкі — не лепшы выбар для тых, хто носіць кантактныя лінзы.
• Макіяж наносяць пасля таго, як былі надзетыя лінзы, і здымаюць пасля таго, як знялі іх.