Якія дызайнерскія знаходкі маюць права на прымяненне ў адзенні для школы, каб не парушыць школьны «дрэс-код»? Ці можна знайсці кампраміс паміж строгасцю і індывідуальнасцю? Наколькі апраўдана захапляцца фурнітурай і аксесуарамі ў дзявочых мадэлях? Як увогуле можна дагадзіць дзяўчатам-падлеткам? Адказы на гэтыя пытанні можна было знайсці падчас прэзентацыі новай калекцыі адзення дзелавога стылю для школьнікаў канцэрна «Беллегпрам», што адбылася ў рамках выставы «Свет дзяцінства — 2016».
Стваральнікі калекцыі ЗАТ «Калінка» сцвярджаюць, што пры рабоце над дзявочым адзеннем улічылі ўсе модныя тэндэнцыі будучага сезона. Мадэлі (жакеты, камізэлькі, спадніцы, сарафаны, штаны) гарманічна дапоўненыя дэталямі з тканін у клетку і палоску, а таксама трыкатажнымі палотнамі. Вырабы дэкарыраваны аксамітавай тасьмой, строчкамі, якія імітуюць ручное шво, залатой металічнай фурнітурай і рамянямі кантраснага колеру. Камплекты, у якія ўваходзіць адразу некалькі адзінак адзення, страхуюць ад аднастайнасці і дазваляюць дзяўчатам карэкціраваць штодня свой дзелавы вобраз.
У калекцыі для дзяўчат ААТ «Славянка» знайшлося месца і карункам, і тасьме, што ўнесла «разыначку» ў строгі дзелавы стыль. У сваёй хлапчуковай калекцыі мадэльеры «Славянкі» зрабілі стаўку на прыталены сілуэт і завужаныя штаны — гэта адпавядае апошнім тэндэнцыям моды. Модныя мадэлі выкананы ў сінім колеры з полівіскознай тканіны, якая ўтрымлівае 35% віскозы. А натуральная лінія ад «Славянкі» прадстаўлена касцюмамі для хлопчыкаў і сарафанамі і касцюмамі для дзяўчат і пашытая з шарсцяных і паўшарсцяных тканін Мінскага камвольнага камбіната.
Лаканічнасць і мінімалізм, строгасць і какецтва, камфорт і прыгажосць з'яўляюцца галоўнымі характарыстыкамі калекцыі ААТ «Знамя індустрыялізацыі». Рамантычныя натуры павінны ацаніць мадэлі з валанамі, фальбонамі і аздабленнем карункамі. Асаблівую ўвагу на прадпрыемстве надаюць якасці і камфортнасці, а таму выкарыстоўваць тканіны з высокім утрыманнем натуральных валокнаў.
Самыя разнастайныя фасоны джэмпераў, жакетаў, камізэлек, світараў і сарафанаў з паўшарсцяных і баваўняна-нітронавых тканін прадставіла на суд маленькіх экспертаў ААТ «Палессе». Дыхтоўнасць, практычнасць, зручнасць, якасць і даступныя цэны — гэта менавіта тое, што робіць прадукцыю «Палесся» запатрабаванай у шырокага кола спажыўцоў.
Калекцыя адзення дзелавога стылю ад ААТ «Элод» спалучае модныя тэндэнцыі і традыцыйныя элементы класічнага школьнага касцюма. Усё адзенне лёгка спалучаецца паміж сабой, што аблягчае выбар дзецям і іх бацькам.
Калекцыя «Разумнікі і разумніцы» ад ААТ «БелКрэда» — гэта сучасны крой і высокая якасць выканання, якія забяспечваюць добрую пасадку. Для нестандартных фігур падлеткаў гэта асабліва важна. А ісці ў нагу з часам дапамагае выкарыстанне прыгожых і якасных сучасных тканін.
Яркую калекцыю адзення для заняткаў спортам прадставіла ААТ «Світанак». Палатно, якое спалучае паліэстар з эластанам, лепш за ўсё падыходзіць для спартыўнага адзення. Яно прыемнае навобмацак, не камячыцца, добра захоўвае форму і прапускае паветра, што дазваляе скуры дыхаць.
ААТ «8 сакавіка», у сваю чаргу, прадставіла спартыўную падлеткавую калекцыю «Рок-клаб». Універсальная і шамтфункцыянальная капсула ўключае штаны, легінсы, сукенкі, спадніцы, футболкі, майкі і джэмперы, у якіх будзе зручна займацца спортам. Яркая, але ў той жа час мяккая колеравая гама, робяць калекцыю жаноцкай, свежай і дынамічнай. Агульны стыль калекцыі фарміруюць геаметрычныя прынты і модныя сілуэты.
* * *
Як расказала прэс-сакратар канцэрна «Беллегпрам» Наталля КРАЎЦОВА, сёлета беларускія прадпрыемствы імкнуліся ўлічыць усе пажаданні і крытычныя заўвагі бацькоў. Бо як бы ні замілоўваліся гледачы на паказе малымі ў строгіх мужчынскіх касцюмах, аднак дастаткова толькі ўявіць сабе, як першакласнік будзе коўзацца ў ім кожны дзень, каб зразумець, што такое адзенне малапрыдатнае для штодзённага нашэння. Ва ўсялякім разе, у пачатковай школе. Галоўнае патрабаванне бацькоў — адзенне павінна быць адначасова і камфортным, і гігіенічным, і прэзентабельным. Яно не павінна камячыцца, даваць усадку пасля мыцця і хутка страчваць свой знешні выгляд.
Арганізацыі канцэрна «Беллегпрам» пазіцыянуюць сябе як вытворцаў тавараў для школьнікаў, якія клапоцяцца пра здароўе дзяцей. Пры распрацоўцы і вытворчасці новых калекцый выкарыстоўваюцца розныя інавацыі, улічваюцца папулярныя трэнды і кірункі сусветнай моды. Усяго ў вытворчасці тавараў для дзяцей школьнага ўзросту ў гэтым годзе будуць задзейнічаны 28 арганізацый канцэрна.
Яшчэ адзін кірунак працы — рэалізацыя пілотнага праекта «Школа будучыні». У бягучым навучальным годзе ім ахоплены больш як 700 школьнікаў з розных рэгіёнаў краіны. Ідэя аўтараў заключаецца ў тым, каб уніфікаваць адзенне дзелавога стылю для вучняў пачатковай школы і максімальна задзейнічаць пры гэтым патэнцыял айчынных прадпрыемстваў лёгкай прамысловасці.
Але гэта зусім не азначае, што ўсе дзеці будуць апранутыя аднолькава. Нават у адной школе вучні розных класаў могуць выбіраць разам з бацькамі форму на свой густ. Галоўнае, што гэта будзе дзелавое адзенне, а выбар застанецца за навучальнымі ўстановамі.
Фота Яўгена ПЯСЕЦКАГА
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.