Будзеш працаваць — будзеш нешта мець

«Прыдбаць свой кут» — мара са знакамітай «Новай зямлі». І, як на мой погляд, дык яна не страціла сваёй актуальнасці і да сёння.

Не скажу, што праца на зямлі кожнаму пад сілу. Наадварот — гэта справа для тых, хто не баіцца цяжкасцяў. Вялікіх грошай тут таксама не заробіш. І тым не менш: у гарадах ёсць багата людзей са сціплымі пенсіямі і такімі ж заробкамі. Ім трэба неяк пражыць самім. І дзецям дапамагчы часам хочацца...

У такіх умовах найлепшым выйсцем я бачу працу на зямлі.

Па сённяшнім часе атрымаць яе цалкам магчыма: шмат закінутых вёсак, шмат сядзіб, што зарастаюць бур'яном. Можна танна набыць жыллё і нават з патрэбнымі пабудовамі. А далей... Працуй, гадуй што можаш — кароў, свіней, птушку, вырошчвай гародніну, трымай пчол. Будзеш старацца — будзеш нешта мець.

Я, напрыклад, жыву на зямлі і з зямлі. Хацеў бы побач мець аднадумцаў. Гатовы нават падтрымаць...

Іосіф Квач, в. Жукоўшчына, Шаркаўшчынскі раён