Новы будынак, у які не так даўно пераехаў музей, ужо паспелі ахрысціць храмам памяці. Тысячы экспанатаў, змешчаных у дзесяці асобных залах, расказваюць наведвальнікам пра падзеі кароткага перадваеннага перыяду, гадоў самай крывавай вайны ў гісторыі чалавецтва і пасляваенных дзесяцігоддзяў. Каб даведацца пра гісторыю кожнага прадмета, неабходна не раз наведаць экспазіцыю. Або пагартаць старонкі кнігі, якая распавядае пра экспазіцыю, фонды і філіялы Беларускага дзяржаўнага музея гісторыі Вялікай Айчыннай вайны.
У кнізе, якая пры падтрымцы Міністэрства інфармацыі ўбачыла свет у Выдавецкім доме «Звязда», можна знайсці хрэстаматыйныя эпізоды з ваеннай гісторыі, а таксама адшукаць і малавядомыя або ўвогуле невядомыя дагэтуль дэталі. Перад чытачом паўстаюць як ключавыя фігуры, героі той вайны, пра подзвіг якіх напісаны не адзін твор, так і асобы, пра якіх мы чуем упершыню і, напэўна, ужо не забудзем ніколі. Як не забудзем і тое, адкуль у музеі з'явіўся дыван, падораны Канстанціну Ракасоўскаму туркменскімі ткачыхамі, хто стварыў дыяраму «Мінскі кацёл» і якія рэчы ў імправізаванай канспіратыўнай кватэры належалі Таццяне Якавенцы, у доме якой друкавалася падпольная «Звязда»...
Як расказала рэдактар кнігі Наталля КАРАСЁВА, аб'ём матэрыялу быў настолькі вялікі, што яго хапіла б яшчэ не на адну кнігу: «Але мы не ўпусцілі самага галоўнага і расказалі пра найбольш цікавыя музейныя экспанаты грунтоўна і разам з тым лаканічна».
— Разам з Выдавецкім домам «Звязда» Беларускі дзяржаўны музей гісторыі Вялікай Айчыннай вайны выдаў цудоўную кнігу-альбом, якая якраз працягвае такую высакародную справу, як патрыятычнае выхаванне, і прыцягвае ўсё новыя колы зацікаўленых да экспазіцыі музея і ўвогуле да нашай вялікай гісторыі, — адзначыў міністр культуры Беларусі Барыс СВЯТЛОЎ. — Каб ажыццявіць гэты праект, спатрэбіліся не толькі фінансавыя сродкі, а і вялікая навукова-даследчыцкая праца. Гэтую функцыю якраз на сябе ўзялі адпаведныя структуры музея, якія зрабілі ўсё дзеля таго, каб канцэптуальна склад гэтага выдавецкага праекта адпавядаў нашым уяўленням, якія звязваюць нашу гісторыю з сучаснасцю і трансліруюць для будучых пакаленняў тыя асноўныя каштоўнасці, якія сёння сабраны пад дахам музея і знаходзяцца ў яго фондасховішчах.
Міністр культуры падзякаваў і Выдавецкаму дому «Звязда», які, па яго словах, пастаянна спрыяе культурным, музейным ініцыятывам.
— Сімвалічна, што выданне выйшла літаральна праз год пасля адкрыцця новай экспазіцыі Беларускага дзяржаўнага музея гісторыі Вялікай Айчыннай вайны, — пераканана намеснік дырэктара музея па навуковай працы Ганна ГАЛІНСКАЯ. — Увогуле культура, сусветная, нацыянальная, духоўная — спецыяльная галіна выдавецкіх інтарэсаў. Апошнім часам вялікая ўвага надаецца вялікім праектам з выдавецкім суправаджэннем шматлікіх мерапрыемстваў як міжнароднага, так і рэспубліканскага ўзроўню, якія штогод праводзяцца ў розных рэгіёнах Беларусі. У выдавецтве нараджаюцца новыя арыгінальныя праекты, накіраваныя на папулярызацыю культуры. Менавіта такім праектам стала выданне «Беларускі дзяржаўны музей гісторыі Вялікай Айчыннай вайны».
Фота Яўгена ПЯСЕЦКАГА
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!