Вы тут

Сёння стартуе чэмпіянат Еўропы па гандболе


Сёлета кантынентальнае першынство пройдзе ў Польшчы, яго прымуць чатыры гарады. Каманды разбітыя на чатыры квартэты, зборная Беларусі выступіць на групавым этапе ў Катавіцах на арэне «Сподэк», якая ўмяшчае адзінаццаць тысяч гледачоў. Сапернікамі дружыны Шаўцова стануць зборныя Ісландыі, Нарвегіі і Харватыі. Пасля першага этапу барацьбу за ўзнагароды працягнуць па тры найлепшыя каманды з кожнай групы.


Перад адказным стартам беларускія гандбалісты правялі зборы і прынялі ўдзел у двух турнірах. Спачатку яны выступілі ў Латвіі на Кубку рыжскай думы, а затым на Калядным турніры ў Маскве. Галоўны трэнер Юрый Шаўцоў нягледзячы на розныя вынікі сустрэч, заклікаў не рабіць паспешлівых высноў і сказаў, што перад камандай зусім не стаяла задача абавязкова перамагаць у таварыскіх матчах. Адзначым, што канкрэтных задач на еўрапейскае першынство, рулявы гандбалістаў таксама не агучыў.

— Зборная знаходзіцца ў рабочым стане. Пасля катарскага чэмпіянату свету мы абнавілі склад на 50 працэнтаў. Тым не менш паступова паляпшаем гульню. Калі ў Латвіі ў нас былі вялізныя праблемы, то ў Маскве саступілі аргенцінцам, згулялі ўнічыю з галандцамі і расіянамі, а маглі і перамагчы.

На чэмпіянаце Еўропы перад камандай канкрэтнай мэты не стаўлю. Наша галоўная задача — палепшыць уласную гульню. Рад бы сказаць, што да нас далучыліся Карабаціч і Хансэн і зараз мы фаварыты ЕURО. Але... Сёння наша каманда павінна здзейсніць подзвіг, каб выйсці з групы ў асноўны раўнд, — распавёў Юрый Шаўцоў перад ад'ездам у Польшчу.

У выязным складзе няма вопытнага галкіпера Віталя Чарапенькі, які яшчэ не змог аднавіцца пасля траўмы. Акрамя таго, з-за праблем са здароўем пад пытаннем і ўдзел у турніры лінейнага Арцёма Каралька. У цэлым жа склад сфарміраваны даволі роўны, як адзначыў кіраўнік федэрацыі гандбола Беларусі Уладзімір Канаплёў, каманда цяперашняга ўзору — гэта «сплаў вопыту і маладосці».

— Думаю, калі брэсцкія хлопцы згуляюць за зборную, як за БГК у Лізе чэмпіёнаў і СЕХА-лізе, а ўсе астатнія, як у матчы з расіянамі (Калядны турнір у Маскве), наша каманда будзе выглядаць годна. І зможа выканаць тыя задачы, якія мы зараз не агучваем, але якія сядзяць у нас у галаве. Я казаў хлопцам: перагледзьце, як гуляла наша «маладзёжка» ў Бразіліі. Вось такая павінна быць самааддача ад першай да апошняй хвіліны. Лічу, тады вынік будзе дасягнуты, — сказаў Уладзімір Мікалаевіч.

Пра такі ж падыход да кожнай гульні чэмпіянату заявіў і лідар зборнай, капітан Сяргей Рутэнка.

— Добрага выніку ў Польшчы мы дасягнем толькі ў тым выпадку, калі згуляем з поўнай выкладкай і максімальнай самааддачай. Ведаеце, можна атрымаць перамогу, што называецца, на адной назе — і застацца незадаволеным. А можна прайграць і сумленна сказаць сабе: мы змагаліся да канца. Дык вось, наша асноўная мэта — не адчуваць сораму перад сабой. Пры любых абставінах кожны гулец, пакідаючы пляцоўку, павінен шчыра сказаць нават не столькі партнёрам, колькі самому сабе: я зрабіў усё, што мог.

Нагадаем, беларускія гандбалісты чацвёрты раз будуць выступаць сярод наймацнейшых каманд Еўропы. У 1994 годзе пад кіраўніцтвам Спартака Мірановіча наша зборная заняла 8-е месца, а ў 2008-м у Нарвегіі спынілася на 15-й пазіцыі, у 2014-м стала 12-й.

Расклад:

15 студзеня Харватыя — Беларусь (18.00)

17 студзеня Беларусь — Ісландыя (18.00)

19 студзеня Беларусь — Нарвегія (20.00)

Склады астатніх папярэдніх груп:

А (Кракаў) — Францыя, Польшча, Македонія, Сербія; З (Вроцлаў) — Іспанія, Швецыя, Германія, Славенія; D (Гданьск) — Данія, Венгрыя, Расія, Чарнагорыя.

lobazhevich@zviazda.by

Загаловак у газеце:  Сёння стартуе чэмпіянат Еўропы па гандболе 

Выбар рэдакцыі

Грамадства

Тураўскі крыж упершыню будзе прадстаўлены 26 верасня

Тураўскі крыж упершыню будзе прадстаўлены 26 верасня

На свята Узнясення Крыжа Гасподняга, падчас вячэрняй службы ў Мінскім кафедральным саборы.

Грамадства

Як і чым жыве колішняя «памідорная сталіца» Беларусі?

Як і чым жыве колішняя «памідорная сталіца» Беларусі?

Каб адчуць, чым organіc food адрозніваецца ад звыклых для сучаснага гараджаніна прадуктаў, дастаткова пакаштаваць памідоры ў Савічах і параўнаць іх з таматамі з гіпермаркета.

Грамадства

Генеральны дырэктар РУП «Белпошта» Святлана Юркевіч: Мы будзем развіваць перш за ўсё паштаматы

Генеральны дырэктар РУП «Белпошта» Святлана Юркевіч: Мы будзем развіваць перш за ўсё паштаматы

На працягу многіх дзесяцігоддзяў пошта асацыіравалася з традыцыйным наборам паслуг — лістамі, пасылкамі, газетамі, пенсіямі... Але сучасныя тэхналогіі ўсё больш уваходзяць у наш побыт.