Іх чацвёрты год запар напярэдадні навагодніх свят дорыць вясковым старажылам Дзяржынскай выбарчай акругі дэпутат Палаты прадстаўнікоў Нацыянальнага сходу Уладзіслаў Цыдзік.
— З валёнкамі вы нам і зіму прывезлі, — сустракаюць гасцей ля варот свайго дома баба Шура і дзед Франц Доўнары. Жывуць яны ў вёсцы Старына Дзяржынскага раёна. Выйшлі падзівіцца доўгачаканаму беламу покрыву, а тут — на парозе госці, ды яшчэ з сюрпрызам. Валёнкі заўсёды на вёсцы былі ў пашане. Цяпер шапавалы робяць іх асабліва цёплымі і прыгожымі. Нярэдка, гледзячы на абноўкі, старыя ўспамінаюць маладыя гады. «Вось бы такую прыгажосць на той час. Ад кавалераў адбою не было б», — часам жартуюць бабулі.
Ала Губарэвіч, старшыня Дзяржынскай пярвічнай арганізацыі грамадскага аб'яднання «Беларуская асацыяцыя дапамогі дзецям-інвалідам і маладым сем'ям», дэпутат мясцовага Савета, добра ведае ўсю акругу і яе жыхароў. Таму Ала Браніславаўна і прапануе зазірнуць у хаты тых людзей, якім дапамога асабліва патрэбна. Яна прыдумала і наступныя прывітальныя словы: «З цяплом і радасцю ідзём. Валёнкі файныя нясём».
Чарговы прыпынак — вёска Мелькавічы, дзе жыве Аляксей Пятровіч Гаркач, былы чыгуначнік. Хату напаўняе вясёлая гамонка, прымяраюцца валёнкі. Ад амаль дзевяностагадовага ўсхваляванага гаспадара гучаць словы вялікай удзячнасці.
Вёска Пажэжына. Стукаем у дзверы Ніны Сцяпанаўны Гарбуз. Ведаем, чакае і Леакадзія Антонаўна Носікава. Дэпутат, перш чым уручыць падарунак, цікавіцца лёсам жанчын, іх сённяшнімі патрэбамі. Кожная амаль сорак гадоў спраўна працавала ў калгасе. Родная зямля і зараз надае доўгажыхаркам сілы. Яны кажуць, што ніколі не мелі зайздрасці, не растрачвалі сябе марна. З прыездам гасцей засвяціліся ў іх вачах агеньчыкі радасці. Валёнкі, як навагодняя ёлка, заззялі ў хатах святлом людскога цяпла.
Уладзіслаў Цыдзік мае ўжо 85 вось такіх незабыўных навагодніх сустрэч. Гэта не проста падарунак ад дэпутата. Гэта цёплыя крокі ад душы да душы.
— Радуе, што ў сваім намеры несці дабро я не адзінокі, — гаворыць Уладзіслаў Станіслававіч. — Дапамаглі набыць валёнкі кіраўнікі дзяржынскага прадпрыемства «Араматык». І было яшчэ шмат неабыякавых людзей, з якімі на працягу года ў Дзяржынскім і Уздзенскім раёнах удалося зрабіць многа карыснага.
Дэпутат дадае:
— Калі гарады патонуць у свеце феерычных агнёў, а на святочным стале не будзе месца для новых пачастункаў, успомніце пра тое, што недзе ў аддаленай вёсцы да цёплай печкі туліцца старая бабуля і яна таксама загадвае свае жаданні...
Алена Стэльмах
Фота аўтара
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
