Вы тут

«Лёс даў нам такога дырэктара»


Шчыры дзякуй газеце за артыкул «Вяртанне старажытнага вадаліва», змешчаны ў нумары за 2 красавіка.

Нам сапраўды пашчасціла ў жыцці: вядомы беларускі пісьменнік Аляксей Нічыпаравіч Карпюк некалькі гадоў быў дырэктарам Рэспубліканскага музея гісторыі рэлігіі. Ствараючы яго і потым папаўняючы экспанатамі, мы аб'ездзілі амаль усю Беларусь, збіралі абразы, жывапіс, дакументы, старадрукі, паштоўкі з выявамі культавых будынкаў...

У нашым музейным жыцці не абышлося без недарэчнасцяў, нам сустракаліся выпадковыя, далёкія ад мастацтва людзі. Адзін з іх, напрыклад, ацэньваючы сучасны твор вядомага беларускага мастака, з разумным тварам казаў: «Так, сюжэт на графіку падобны». Другая — пра вадаліў XII стагоддзя гаварыла, што яна такую рэч сабе «ў сервант не паставіла б». Трэці лямантаваў: «Навошта вам тыя слуцкія паясы! Ды ў кожнай вёсцы натчэ іх кожная бабуля». І толькі дырэктар музея супакойваў нас, казаў: «Ну, што вы хвалюецеся! Неадукаваныя людзі. Іх трэба вучыць, дык вы і вучыце...»

Аляксей Нічыпаравіч — гэта асаблівая старонка ў гісторыі музея ў Гародні. Ён быў нашым першым дырэктарам, нашым бацькам, сябрам, паплечнікам. Ён вучыў нас збірацца ў камандзіроўку за хвіліны, у экспедыцыю — за некалькі гадзін. Ён быў эталонам учынкаў і паводзінаў. Ён вучыў нас глядзець і бачыць, думаць і аналізаваць, вучыў любіць нашу справу.

Ён усё рабіў хутка, нічога не адкладваў на потым і ніколі не быў стомленым ці хворым... А як ён размаўляў! Як мог пасмяяцца! Якой бліскучай і высакароднай была яго мова! Усе святы ў музеі мы адзначалі разам з нашым дырэктарам. Ён апекаваў нас, клапаціўся, знаёміў з пісьменнікамі і мастакамі, з цікавымі людзьмі.

Нам дужа пашанцавала: лёс звёў нас з такім чалавекам, такім кіраўніком!.. Сёлета 14 красавіка Аляксею Нічыпаравічу споўнілася б 95.

Ніна Ляшчонак, былы галоўны захавальнік Беларускага дзяржаўнага музея гісторыі рэлігіі, г. Гродна

Выбар рэдакцыі

Калейдаскоп

Вясёлыя гісторыі чытачоў

Вясёлыя гісторыі чытачоў

Галаву можна вешаць, ламаць, сушыць, намыльваць... Але не губляць!

Грамадства

Як шматдзетная сям’я будуе жыллё з дапамогай дзяржаўнай субсідыі

Як шматдзетная сям’я будуе жыллё з дапамогай дзяржаўнай субсідыі

Святлана, шматдзетная мама з вёскі Чарнаўчыцы, што пад Брэстам, падзялілася гісторыяй іх сям'і і дома.

Грамадства

Камень Узнясення, «Стопачка» і «Руская свечка». Што паглядзець у Іерусаліме?

Камень Узнясення, «Стопачка» і «Руская свечка». Што паглядзець у Іерусаліме?

Аўтобусы з паломнікамі і турыстамі ніколі не праязджаюць міма гэтых знакавых, і не толькі для хрысціян, святынь.