На абмеркаванне сваёй працы над двухтомным паэтычным праектам «Праз восеньскі ажур» сабраліся ўдзельнікі народнага клуба кампазітараў і паэтаў «Жывіца» Мінскага абласнога цэнтра народнай творчасці.
Адзін, а часам і два зборнікі паэзіі і песень выдаюць штогод удзельнікі гэтага творчага клуба. Ён мае аматарскі статус, але гэтая планка даўно засталася ў мінулым. Многія з тых, хто калісьці прыносіў сюды свае першыя творы, сёння з'яўляюцца прызнанымі аўтарамі, членамі Саюза пісьменнікаў Беларусі і Беларускага саюза музычных дзеячаў.
— У двух зборніках вершаў, якія мы сёння прэзентуем, сабраны творы пяцідзесяці сямі аўтараў з гарадоў і вёсак Мінскай вобласці і сталіцы, — зазначыла кіраўнік клуба «Жывіца» Ірына КАРНАВУХАВА. — Па нашай традыцыі кожнаму клубнаму выданню даецца назва ад цікавага паэтычнага радка. На гэты раз для кніжнай вокладкі быў прапанаваны радок «Праз восеньскі ажур».
Трэба дадаць, што нагаданы вышэй радок можна знайсці ў вершах многіх аматараў паэзіі з «Жывіцы». І гэта не выпадкова, бо летась тут быў праведзены своеасаблівы літаратурны конкурс, умовай якога было выкарыстаць гэты радок згодна з аўтарскім падыходам да тэмы. Лепшым прафесійнае журы назвала верш інжынера Сяргея Махнача. Так быў дадзены новы імпульс да пошуку. А там, дзе ёсць настойлівы пошук, — абавязкова трэба чакаць знаходак.
Для чытачоў «Звязды» некаторыя аўтары гэтых зборнікаў даўно знаёмыя, І не толькі таму, што іх вершы часта гучаць у літаратурных праграмах радыё і тэлебачання, друкуюцца на старонках часопісаў і газет. Яны — сярод аўтараў нашай газеты. Напрыклад, Галіна Нічыпаровіч з вёскі Магільна Уздзенскага раёна. Яна аўтарка шасці асабістых зборнікаў, член Саюза пісьменнікаў Беларусі. Да пенсіі працавала паштальёнкай. «Звязда» змяшчае яе гісторыі ў падборках пад рубрыкай «Алё, народ на провадзе!» Там наша сталая аўтарка дзеліцца з чытачамі радкамі, напоўненымі яскравым гумарам і народнай мудрасцю. Што датычыцца выхаду новых зборнікаў «Жывіцы», то тут да месца будзе прывесці радкі з надрукаванага там верша Галіны Нічыпаровіч пра яе малую радзіму:
«Мой родны кут…» —
пісаў так Колас.
У кожнага ён родны, свой,
Дзе ўпершыню падаў ты голас,
Дзе віць пачаў жыцця сувой…
Яўген ПЯСЕЦКІ. Фота аўтара.
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.