Хацела зноў напісаць аб шкодзе шкоднай ежы і шкодных звычак. Аб тым, як паводзіць сябе за навагоднім сталом, каб худзець і здаравець на вачах у гасцей. Але... Упэўнена, няма чалавека, які б не ведаў, што трэба рабіць, каб быць здаровым: рухаў больш, ежы менш. Усе ведаюць, але... ніхто не робіць. Дакладней, мала хто.
Пра добрую і злую ежу ведаюць нават малыя. А сэнсу? Пакуль адным на ўсё гэта рацыянальнае, збалансаванае, паўнацэннае напляваць, у другіх ужо проста дах едзе — так яны намагаюцца нічога «страшнага» ў сябе не закінуць. У адказ на прапанаваны кубак зялёнага чаю можна пачуць ад маладога чалавека: «Святлана, а вы што, не ведаеце — мужчынам нельга зялёны чай!». Э-э-э-э...
А жанчыны любога ўзросту і памераў шукаюць у інтэрнэце рэцэпты пахудзення за адзін дзень. Лепш, вядома ж, за паўдня. Каб ужо сёння ўвечары ў сукенку студэнцкіх часоў уціснуцца. А як попыт ёсць, толькі дурань патыліцу не пачухае ды не прапануе. І чухаюць жа, і прапануюць! Хочаш пахудзець за 60 секунд? Няма праблем! Вось табе і пілюлі на аснове брамелайну, вось — з «экстрактам» бразільскай яблыні, а яшчэ проста комплексы спальвання тлушчу, стабілізатары метабалізму, глушыцелі апетыту, стымулятары абмену, блакатары-ін'екцыі, чаі-паскаральнікі, проста цудатворныя кактэйлі, дэтакс-праграмы... Карацей, купляй-глытай! «Каця, ты чаго трубку не бярэш?» — «Не магу, Святлана... Трэці дзень чаі ўсялякія п'ю, хоць пару кіло скінуць... Не да размоў мне, нават на працу не пайшла — з унітаза не злажу». Э-э-э-э...
Для лепшага выжывання чалавек, па легендзе, атрымаў дзіўную здольнасць — прыстасоўвацца і прыстасоўваць. Жанчыны ў гэтым сэнсе проста малайцы: трушчаць цукеркі, шакалад, тарты, сыркі... А прапануй ты ім дранік, адбіўную, салат з каўбасой... Кранты табе! Бо гэта ж тлу-устае!! Яно ж каларыйнае!! У Ленкі адзін дзень на тыдні — галодны, толькі зялёны чай. У астатнія дні — сімвалічнай Казе спадабалася б — лісцікі салату. Размаўляем па тэлефоне, чую плач яе малой. «Што ты там робіш з ёю? Чаго енчыць?» — «Ты разумееш, цётка Света, якая ў нас пачвара расце! Не хоча есці! Мама павінна мяса ў сметніцу з-за гэтага дрэннага дзіцяці выкідваць!». Э-э-э-э...
А цяпер як сапраўдны сябар кажу: расслабцеся! Мужчыны, жанчыны... Усе! Усім загадваю! Прыпыніцца, заплюшчыць вочы, паглядзець добры фільм... Гэта важна. Год заканчваецца, чарговы год вашага непаўторнага жыцця. У такія моманты абавязкова трэба азірнуцца, ацаніць, сцішыцца. Паверце, мітусня і кавардак у думках яшчэ не вырашылі ніводнай праблемы і тым больш нікога не зрабілі шчаслівым.
Можна, вядома, даць парады адносна таго, як накрыць «здаровы стол», як спалучаць прадукты, што чым не запіваць, якія перапынкі паміж аб'яданнямі рабіць... Толькі нічога новага ў гэтых парадах не будзе. Здаровае харчаванне або ёсць, або яго няма. Алкаголю колькі б вы ні выпілі, ён акажа сваё шкоднае ўздзеянне. Проста чым менш вы вып'еце, тым меншай будзе шкода. Калі на працягу года вашы блізкія ўжывалі ўсё без разбору, дык што — цяпер вучыць іх не запіваць гарачыя катлеты ледзяным шампанскім? З другога боку, ніколі не позна пачынаць жыць на карысць уласнага здароўя. Ці падыходзяць для такога пачатку святы? У мяне няма агульнага адказу для ўсіх.
Але ў мяне ёсць пэўнае меркаванне на гэты конт. Думаю, той, хто ўвесь год працаваў над сабой, хто намагаўся расці над сабой, пераадольваць сябе, можа, і расслабіцца на нейкі час. Працаголікам, разумным, выхаваным, стрыманым, цярплівым, мяркую, можна сабе дазволіць што-небудзь звыш звычайных, жорсткіх межаў. Можа быць, гэта будзе салодкае, калі чалавек амаль яго не ўжывае, можа быць, дарагое віно, курачка з духоўкі, селядзец з маянэзным «футрам»...
Але сярод нас ёсць такія, каму б што б ні паставілі на стол — усё будзе не смачна. Для іх у маім запасніку іншыя парады. Рабіце свята ў міні-стылі. Калі штогод вы ставілі вялікую ёлку ў традыцыйным убранні, пастаўце цяпер маленькую, штучную, і ўладкуйце на яе што-небудзь, зробленае сваімі рукамі. Прыстасуйце хоць бы пустыя фанцікі ад цукерак або невялікія кавалачкі ваты (такая ёлка, між іншым, можа стаць самай запамінальнай). Не гатуйце тыя стравы, якія ўжо былі на вашым стале летась і пазалетась. Дый навінкі з ананасамі не гатуйце. Пастаўце на стол сухое шампанскае ды дзве талеркі з нарэзкай — адну з агуркамі-памідорамі-лісцем салата, другую з фруктамі. Адмоўцеся ад торта. Купіце крыху тых цукерак, што вельмі любілі ў дзяцінстве. Нашай вытворчасці. Нашы вядомыя «цукерачныя» вытворцы па-ранейшаму выпускаюць некаторыя віды тых самых цукерак, па той самай, савецкай, рэцэптуры.
І парада для ўсіх. Пастарайцеся забяспечыць сябе добрай пітной вадой. Не кампотам, не сокам, а менавіта вадой. Бутыляванай ці фільтраванай — ваша справа. Галоўнае, каб была. Пастарайцеся не гатаваць адразу на тыдзень. Гатуйце і стаўце на стол не больш, чым можаце з'есці. Памятайце пра вядомы жарт медыкаў: «Калі б у печані былі рукі, яна б задушыла страўнік».
А з новага года можна пачынаць новае жыццё. Канец чагосьці аднаго азначае пачатак нечага іншага.
Святлана БАРЫСЕНКА
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».