Прэзідэнт Аляксандр Лукашэнка ставіць задачу актывізаваць работу па аднаўленні аб'ёмаў вытворчасці свініны ў краіне.
На гэтым ён акцэнтаваў увагу на нарадзе аб мерах, якія прымаюцца па аднаўленні аб'ёму вытворчасці свініны ў існуючых ветэрынарных умовах, паведамляе БЕЛТА.
Кіраўнік дзяржавы перакананы, што для вырашэння гэтай задачы ёсць усе ўмовы. Ва ўсіх рэгіёнах Беларусі пабудаваны і функцыянуюць магутныя свінагадоўчыя комплексы, прадукцыя якіх не толькі паступае на ўнутраны рынак, але і экспартуецца. Ёсць прапановы вучоных, як аднавіць аб'ём вытворчасці свініны ва ўмовах ветэрынарнай нестабільнасці.
«Аднаўленне аб'ёмаў вытворчасці свініны — у ліку пытанняў эканамічнай і харчовай бяспекі краіны», — заявіў Прэзідэнт. Перад урадам і мясцовымі органамі ўлады пастаўлена задача зрабіць гэта да 1 красавіка 2015 года. Аляксандр Лукашэнка падкрэсліў, што неабходна цалкам укамплектаваць комплексы, пабудаваныя ў 2013-2014 гадах. Паводле яго слоў, недаўкамплектаванне гэтых комплексаў блізкае да злачынства. Ёсць і праблема тэрытарыяльнай раз'яднанасці, калі ў адной гаспадарцы няма памяшканняў для адкорму парасят, а дзесьці комплексы пустуюць. Кіраўнік дзяржавы акцэнтаваў увагу на неабходнасці павысіць эфектыўнасць дзейных комплексаў за кошт строгага выканання тэхналогій гадоўлі, каб атрымліваць добрае прыбаўленне ў вазе.
Прэзідэнт запатрабаваў паскорыць завяршэнне будаўніцтва новых комплексаў. Месцы для адкорму, якіх не хапае, можна атрымаць за кошт будаўніцтва каркасна-тэнтавых ангараў, якія хутка ўзводзяцца. Прычым вырашаць гэту задачу трэба цяпер, пакуль не настала зіма. «Таму неадкладна, калі вы прынялі рашэнне, пачынайце аднаўляць, прытым за капейкі, ніхто вам вялікіх грошай на гэта не дасць, такія свінагадоўчыя комплексы або фермы», — сказаў Прэзідэнт. Ён адзначыў, што вучоныя прапрацавалі варыянты паскоранага ўзнаўлення племянных свіней. Гэтая тэма таксама абмяркоўвалася на нарадзе.
«Што датычыцца эпізаатычнай сітуацыі ў свінагадоўлі, то прайшло крыху больш за год з дня правядзення нарады, на якой мы яе разглядалі і выпрацоўвалі захады па барацьбе з вірусным захворваннем свіней, — нагадаў кіраўнік дзяржавы. — Тады вызначыліся, што і як трэба рабіць. У прыватнасці, ліквідаваць ачагі гэтай заразы і крыніцы захворвання ў дзікай прыродзе. Прычым, зачышчаючы ачагі, трэба па-чалавечы ставіцца да людзей, чые інтарэсы гэта закране». Павінна быць таксама беражлівае стаўленне да прыроды. Прэзідэнт перасцярог ад бяздумных адносін у гэтым пытанні.
У ліку важных захадаў — забеспячэнне няўхільнага выканання тэхналагічнай дысцыпліны і санітарных патрабаванняў як на жывёлагадоўчых аб'ектах, так і на асабістых падворках. Прэзідэнт звярнуў увагу на неабходнасць узважанага падыходу ў пытанні знішчэння свіней на асабістых падворках. У прыватнасці, трэба больш праводзіць растлумачальную работу, а не знішчаць усё пагалоўе.
«Што датычыцца жывёлагадоўчых комплексаў і памяшканняў, то там павінен быць ідэальны парадак. Яны павінны быць агароджаны, там павінны дакладна выконвацца санітарныя патрабаванні, чаго цяпер пакуль няма», — заявіў Прэзідэнт.
Аляксандр Лукашэнка звярнуў увагу на тое, што нельга завозіць кармы для свіней з-за межаў краіны, паколькі ёсць рызыка, што яны могуць быць заражаны ўзбуджальнікамі захворвання, тым больш што ў краіне вырабляюцца айчынныя грануляваныя кармы, якія праходзяць тэрмаапрацоўку.
Падводзячы вынікі нарады, Аляксандр Лукашэнка падкрэсліў, што ў будучым годзе неабходна атрымаць 700 тыс. — 1 млн парасят, адкарміць іх, аднавіць пагалоўе і аб'ёмы вытворчасці свініны. «Рынак паступова будзе запаўняцца. Ніхто нас там чакаць не будзе. Але калі мы першымі паспеем на рынак са сваёй свінінай, мы будзем мець вялікія грошы», — адзначыў кіраўнік дзяржавы. «Тое, што мы будзем жыць у гэтых умовах яшчэ доўга, — гэта факт. Самае рэальнае тое, што ў гэтых умовах мы павінны спакойна працаваць», — сказаў Прэзідэнт.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».