Інтэграваныя класы для першакласнікаў з аўтызмам будуць дзейнічаць у новым навучальным годзе адразу ў пяці сталічных установах адукацыі. У Заводскім раёне — у сярэдніх школах № 5 і № 18. У Фрунзенскім — у СШ №81, Савецкім — у СШ № 187, Партызанскім — СШ № 108 і Цэнтральным — у школе № 104.
Першы інтэграваны клас для дзяцей з аўтызмам быў створаны год таму ў сярэдняй школе №5. А 1 верасня тут адкрыўся ўжо другі такі клас.
— Дырэктар сталічнай школы №5, якая з асцярогай прымала летась такое рашэнне, зараз канстатуе, што дзеці з аўтызмам за год паказалі каласальную сацыялізацыю. Яны не баяцца іншых дзяцей, харчуюцца разам з усімі ў школьнай сталовай, удзельнічаюць у сумесных святах і мерапрыемствах. Звычайныя равеснікі кантактуюць з імі і ва ўсім ім дапамагаюць, — расказала журналістам начальнік аддзела дашкольнай, агульнай сярэдняй і спецыяльнай адукацыі Камітэта па адукацыі Мінгарвыканкама Марына ЮРКЕВІЧ. — Няма нараканняў і з боку бацькоў звычайных дзяцей.
Суправаджалі адукацыйны працэс дзяцей з асаблівасцямі цьютары — педагогі, якія працуюць з дзіцем індывідуальна. Была праведзена вялізная работа. Спецыялісты-дэфектолагі, настаўнікі пачатковых класаў — усе прайшлі праз семінары, майстар-класы, кансультаванне праз супрацоўніцтва з маскоўскімі арганізацыямі, якія ўжо маюць больш багаты вопыт работы з такімі дзецьмі.
А інтэграваны клас, які адкрыўся 1 верасня ў 187-й мінскай школе, — гэта чарговы крок наперад у сацыялізацыі дзяцей з аўтыстычнымі расстройствамі. Акрамя асноўнага класа, для асаблівых дзяцей тут створаны яшчэ і рэсурсны клас, дзе ёсць спецыяльна вырабленая мэбля для заняткаў, зоны адпачынку і карэкцыйных заняткаў па сэнсарнай інтэграцыі. Як вядома, дзецям з аўтызмам уласцівая павышаная сэнсарная адчувальнасць, таму ім трэба паступова прызвычайвацца да шумных школьных мерапрыемстваў і ўвазе да іх з боку вялікай колькасці незнаёмых людзей.
— Мы вядзём сваіх дзяцей у школу з упэўненасцю, што ім там будзе добра, — кажа старшыня міжнароднай дабрачыннай грамадскай арганізацыі «Дзеці. Аўтызм. Бацькі», маці першакласніка Ільі Таццяна Якаўлева. — Мы, бацькі, гатовы і далей укладваць сілы і сродкі ў навучанне спецыялістаў найноўшым методыкам работы з дзецьмі з аўтызмам, у стварэнне для іх камфортнай атмасферы ў школе, у распаўсюджванне нашага досведу на іншыя школы і рэгіёны Беларусі.
Спадзяёмся, што наш інтэграваны клас стане першым крокам да стварэння першай у краіне інклюзіўнай школы. І мы ўжо гатовы зрабіць наступны крок: ёсць група актыўных бацькоў дзяцей больш старэйшага ўзросту, якія гатовы прывесці сваіх вучняў на сярэднюю школьную ступень і ў супрацоўніцтве з установай адукацыі ствараць умовы для іх паспяховай вучобы.
Пакуль што ў сярэдніх класах мінскіх школ не было дзяцей з аўтызмам. У гэтым узросце яны аказваліся, як правіла, на хатнім навучанні або ў спецшколах. На жаль, але ў беларускай сістэме адукацыі не было такіх паняццяў як «цьютар», «паводзінскі падыход», «сэнсарная зона» і, самае галоўнае, «інклюзія». Але зараз сітуацыя мяняецца...
Надзея НІКАЛАЕВА.
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.