Вызначаны прэтэндэнты конкурсу на саісканне прэміі ўрада Рэспублікі Беларусь за дасягненні ў галіне якасці
Якасць з'яўляецца вызначальным фактарам канкурэнтнай устойлівасці і эфектыўнай эканомікі кожнага прадпрыемства і краіны ў цэлым. Займаць стабільнае становішча на ўнутраным і знешніх рынках — задача не з простых. Але тыя кампаніі, якія выбудоўваюць стратэгію свайго развіцця на аснове якасці ва ўсіх сферах дзейнасці, дасягаюць найлепшых вынікаў.
І такія прадпрыемствы-лідары ў рэспубліцы ёсць. З 1999 года лаўрэатамі конкурсу на суісканне прэміі ўрада Рэспублікі Беларусь за дасягненні ў галіне якасці, які праводзіцца штогод, сталі 189 лепшых арганізацый, прычым некаторыя з іх — неаднаразова.
Далучыцца да іх сёлета імкнуцца яшчэ 30 арганізацый.
«З нашага пункту гледжання, вельмі важна, каб уся прамысловасць краіны займалася якасцю, і гэтая задача павінна быць вырашана паўсюдна, практычна на кожным прамысловым прадпрыемстве, у кожнай арганізацыі сферы паслуг і іншых галін», — лічыць старшыня Дзяржстандарта Беларусі Віктар Назаранка.
Найбольш вострая барацьба за званне лаўрэата ў гэтым годзе чакаецца па такіх кірунках дзейнасці, як вытворчасць харчовых тавараў і сельскагаспадарчай прадукцыі, а таксама аказанне паслуг і выкананне работ.
Цяпер эксперты разглядаюць дакументы, прадстаўленыя прэтэндэнтамі, пасля чаго яны наведаюць гэтыя прадпрыемствы.
Арганізацыі, прызнаныя лепшымі ў галіне якасці, будуць аб'яўлены ў канцы года. Лаўрэатам уручаць дыпломы і сімвалы прэміі, а таксама дадуць права выкарыстоўваць у маркіроўцы прадукцыі, дакументацыі і ў рэкламных матэрыялах выяву эмблемы прэміі. Акрамя гэтага, спіс пераможцаў будзе размешчаны на інтэрнэт-сайце Дзяржстандарта Рэспублікі Беларусь, уключаны ў штогадовы ілюстраваны каталог лаўрэатаў конкурсу, які перадаецца ў прадстаўніцтвы нашай краіны за мяжой.
Дар'я ШОЦІК.
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».