З наступнага тыдня гледачоў «Беларусь 1» на рыбалку запрашае... дзяўчына
Новы праект, падрыхтаваны дырэкцыяй інтэрнэт-навін АТН, мае назвы «Атрымай ляшча!» і выйдзе ў эфір з 25 жніўня. Яго стваральнікі абяцаюць тройчы на тыдзень (па панядзелках, серадах і пятніцах) не толькі расказваць пра рыбалку ў Беларусі, але і прайсціся па правераных «рыбных месцах» і даць карысныя парады пачаткоўцам.
Запрасіць здымачную групу ў госці можна праз суполкі праекта «Атрымай ляшча!» у сацыяльных сетках «ВКонтакте», «Facebook» і «Аднакласнікі». Што самае прыемнае, увесь улоў ад такой гасцявой рыбалкі будзе разыграны паміж удзельнікамі суполак — пераможцы атрымаюць свой прыз, ужо ў сушаным або вяленым стане, па пошце. У тых жа сацыяльных сетках мяркуецца праводзіць і рэгулярны розыгрыш прызоў ад партнёраў праекта, таму найбольш актыўныя падпісчыкі змогуць абнавіць свае рыбалоўныя снасці.
Але, бадай, галоўная «фішка» праекта — гэта яго вядучая, Юлія Дзявончык. Нягледзячы на ўсе стэрэатыпы і міфы вакол стасункаў жанчын з рыбалкай, дзяўчына пераканана сама і пераконвае іншых: навучыцца лавіць можа кожны! Юля ўжо збіраецца ў падарожжы як па самых папулярных, так і па самых «цяжкадаступных», платных і бясплатных, вадасховішчах і пастараецца не ўступіць вопытным рыбакам у майстэрстве лоўлі.
Паглядзець праграму «Атрымай ляшча!» кожны ахвотны зможа як у тэлевізійнай версіі (у межах «Добрай раніцы, Беларусь!»), так і ў інтэрнэце, на афіцыйным сайце Белтэлерадыёкампаніі www.tvr.by.
Вікторыя ЦЕЛЯШУК
Канцэрт для дзяцей і моладзі, пластычны спектакль Ягора Дружыніна і «Рок-панарама».