У наступным навучальным годзе на старшай ступені школы ў сталіцы будуць дзейнічаць 194 класы, вучні якіх змогуць вывучыць асобныя прадметы на павышаным узроўні, і 189 базавых класаў. Аб гэтым расказала журналістам начальнік аддзела дашкольнай, агульнай сярэдняй і спецыяльнай адукацыі Камітэта па адукацыі Мінгарвыканкама Марына ЮРКЕВІЧ.
Як сведчыць практыка папярэдніх гадоў, звычайна навучанне на старшай ступені школы працягваюць у сталіцы прыкладна 67-68 працэнтаў выпускнікоў базавай школы. І хоць прыём ахвотных навучацца на трэцяй ступені школы яшчэ не завершаны, можна меркаваць, што профільным навучаннем у Мінску будзе ахоплены прыкладна кожны другі дзесяцікласнік.
Найбольш актыўна ў сталіцы ствараюцца профільныя класы філалагічнай накіраванасці: іх у новым навучальным годзе будзе дзейнічаць 86. Для прыхільнікаў дакладных навук адкрыты 74 класы фізіка-матэматычнай накіраванасці. А вось класаў хіміка-біялагічнай накіраванасці ў сталіцы не так ужо і шмат — усяго 10. Акрамя таго, у школах адкрыты 14 класаў грамадазнаўчага профілю і 10 класаў, у якіх будуць развівацца адразу 2-3 профільныя кірункі.
Між іншым, у некаторых мінскіх школах, дзе летась былі адкрыты профільныя класы, адмовіліся ад вывучэння прадметаў на павышаным узроўні, і гэтыя класы перайшлі ў разрад, так мы мовіць, звычайных, дзе ўсе прадметы будуць вывучацца на базавым узроўні. Як патлумачыла Марына Юркевіч, для функцыянавання профільных класаў патрабуецца не толькі наяўнасць развітай адукацыйнай інфраструктуры і высокакваліфікаваных педагагічных кадраў, але і зацікаўленасць з боку вучняў і іх бацькоў. Дзесьці або педагагічны калектыў пераацаніў свае магчымасці, або вучні пераканаліся ў тым, што павышаны ўзровень вывучэння тых ці іншых прадметаў не адпавядае іх магчымасцям і далейшым жыццёвым планам, таму адбылося пэўнае пераразмеркаванне профільных класаў па горадзе.
Таксама ў новым навучальным годзе ў сталічных установах адукацыі адкрыюцца яшчэ 6 першых інтэграваных класаў для дзяцей з расстройствамі аўтыстычнага спектра.
1 верасня да заняткаў прыступяць у беларускай сталіцы каля 165 тысяч навучэнцаў 1—11-х класаў. Чакаецца, што ў 807 першых класаў прыйдуць больш як 19,5 тысячы дзяцей. Дарэчы, дакументы ў першы клас бацькі могуць падаць да 28 жніўня ўключна. А дашкольныя ўстановы прымуць больш як 91 тысячу выхаванцаў.
Пашпарты гатоўнасці ўжо атрымалі ўсе 240 агульнаадукацыйных устаноў. Выдаткі з гарадскога бюджэту на правядзенне рамонтна-будаўнічых работ склалі 230 млрд рублёў. Сёння рыхтуюцца справіць наваселле педагогі і вучні 61-й сталічнай школы, якая гатова прыняць 880 чалавек. Яе адкрыццё прымеркавана да 1 верасня. А да канца каляндарнага года плануецца ўвесці ў строй яшчэ адну агульнаадукацыйную школу ў мікрараёне Каменная Горка. Гэтая ўстанова разлічана на 1020 вучнёўскіх месцаў.
Паводле слоў начальніка аддзела тэхнагляду за капітальным і бягучым рамонтам устаноў адукацыі Камітэта па адукацыі Галіны Харык, яшчэ летась па даручэнні Прэзідэнта ва ўсіх сталічных установах адукацыі былі ўстаноўлены агароджа і сістэмы відэаназірання.
— Мы з гэтай задачай справіліся, хоць выдаткі на забеспячэнне ўмоў бяспечнага знаходжання ва ўстановах адукацыі склалі летась каля 100 млрд рублёў. А ў гэтым годзе на прышкольных тэрыторыях устанаўліваліся антывандальныя трэнажорныя пляцоўкі. Усяго было абсталявана ў горадзе 13 такіх пляцовак і адна пляцоўка ў гарадскім адукацыйна-аздараўленчым цэнтры «Лідар». Займацца фізкультурай і спортам на гэтых пляцоўках змогуць не толькі навучэнцы школ, але і жыхары прылеглых мікрараёнаў, — падкрэсліла Галіна Харык. — На іх ўстаноўку з гарадскога бюджэту было выдзелена 26 мільярдаў рублёў.
Надзея НІКАЛАЕВА
Будзь у курсе!
У 2014/2015 навучальным годзе да выкарыстання ў адукацыйным працэсе дапускаюцца дзённікі навучэнцаў, выдадзеныя любымі тыпаграфіямі, на рускай ці беларускай мове. Галоўнае патрабаванне — гэта наяўнасць на дзённіку дзяржаўнай сімволікі Рэспублікі Беларусь. Ніякіх іншых абмежаванняў для выкарыстання дзённікаў няма.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».