Кожны з нас прыходзіць у гэты свет, захоўваючы ў сабе калі не ўвесь эвалюцыйны шлях чалавецтва, то, прынамсі, генетычную спадчыну многіх пакаленняў. Немаўля ўжо мае пэўную групу крыві, колер вачэй, форму галавы і іншыя антрапалагічныя прыкметы, якія шмат што скажуць дасведчаным людзям. Разам з тым кожны чалавек непаўторны, што знайшло адлюстраванне ў выключна важнай асаблівасці нашага імя.
Навукоўцы сцвярджаюць, што імёны з'явіліся ў групах неандэртальцаў паміж 50‑м і 12‑м тысячагоддзямі да н. э. Старажытныя людзі выкарыстоўвалі імёны, каб адрозніваць адно аднаго. Ужо тады яны верылі, што праз слова чалавеку можна перадаць уласцівасці і якасці, закладзеныя ў яго значэнні. Нашы продкі называлі сваіх дзяцей словам ці спалучэннем слоў, якія, на іх думку, маглі прынесці шчасце, поспех, сілу, славу. Паспрабуем сабраць разам правілы, якімі кіраваліся, выбіраючы імя дзіцяці.
1.У славян быў шырока развіты культ ушанавання продкаў. Таму часта дзіця называлі імем дзядулі ці бабулі, г. зн. імя пераходзіла праз пакаленне. Прычым першы сын атрымліваў імя дзеда па бацькаўскай лініі, другі — па матчынай. Гэтак жа рабілі пры выбары імён дзяўчатак.
2.Адсюль і строгая забарона называць дзіця ў гонар бацькі ці маці. Бо лічылася, што скарачаецца жыццё бацькоў, якія «перадалі» сваё імя.
3.Лічылася: калі дзіцяці даць імя каго-небудзь з вядомых людзей (умелых, дабрадзейных, удачлівых, гаспадарлівых), то да яго пяройдуць станоўчыя якасці, уласцівыя гэтаму чалавеку. І наадварот, дзецям ніколі не давалі імё-
ны сваякоў, якія рана памерлі ці загінулі, самазабойцаў, людзей, якія мелі прыхільнасцю да спіртнога, прыдуркаватых і да т. п.
4.З прыходам хрысціянства пачалі даваць дзецям імёны ў адпаведнасці з царкоўнымі святцамі. Такім чынам існавала падвойнае імя: адно давалася пры хрышчэнні па святцах (гэта значыць, у гонар святога, які ўшаноўваецца ў гэты дзень), другое — паводле мясцовых традыцый. На Беларусі гэтая традыцыя жыла аж да пачатку ХХ ст., але паступова народныя імёны Багдан, Вярнігара, Вярнідуб, Жыўка, Здраўка, Любава, Забава, Пакацігарошак «саступілі» старажытнарымскім і старажытнагрэчаскім імёнам Андрэй, Мікалай, Пётр, Міхаіл, Ксенія, Кацярына і г. д.
5.І сёння захавалася вераванне: назваць дзіця імем праведніка (прападобнага, свяціцеля, евангеліста) — добра, а імем мучаніка значыць асудзіць на пакуты ў жыцці.
6.З царкоўных традыцый узнікла і сямейна-родавае свята імянін. Напрыклад, чалавек нарадзіўся 10 сакавіка, а святы заступнік, у гонар якога яго хрысцілі, шануецца па царкоўным календары 19 сакавіка. Гэта і ёсць дзень «святых імянін». Духоўнае нараджэнне лічылася важнейшым за цялеснае, і ад таго дзень нараджэння заставаўся незаўважаным, а дзень анёла, ці імяніны, усё жыццё святкаваліся кожным, каму дазваляла багацце. Імяніннік ці імянінніца рассылалі гасцям імянінныя пірагі рознай велічыні, у залежнасці ад ступені пашаны чалавека. Госці ж прыходзілі на імяніны з падарункамі.
7.Зазвычай імя дзіцяці ў святцах выбіралі ў межах 10–15 дзён пасля дня яго нараджэння, бо раілі «ісці па ходу Сонца». Па славянскіх павер'ях, названае «назад» дзіця (г. зн. у адпаведнасці са святам, якое папярэднічала дню нараджэння) не будзе расці; таму аддавалі перавагу напрамку «наперад», які заўсёды сімвалізаваў развіццё і рост.
(Працяг будзе.)
Аксана Катовіч, Янка Крук.
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.