Ці аддадуць беларусы перавагу сажалкавай рыбе?
«За год у краіне гадуецца 25 тысяч тон прэснаводнай рыбы, з якіх рэалізуецца толькі 13—15 тысяч тон, — паведаміў намеснік дырэктара НАН Інстытута рыбнай гаспадаркі Рэспублікі Беларусь Уладзімір КАСТАВУСАЎ. — На наступны год плануецца павялічыць продаж да 18 тысяч тон».
Ад агульнага аб'ёма прэснаводнай рыбы, якая гадуецца, 75% складае карп, каля 11% — белы амур і таўсталобік, карась і шчупак. У асартымент «нешырокага спажывання» трапілі вясёлкавая стронга, асятровая сцерлядзь, бялуга, сом. Сёлета запланавана вырасціць агулам да 3,8 тоны такой рыбы. Што датычыцца з'яўлення на прылаўках айчыннай ікры — пакуль гэтая задумка не зможа ажыццявіцца, хоць распрацаваны праекты па вытворчасці ікры сцерлядзі. На экспарт у Маскву і Беласток рэалізавана 640 тысяч тон рыбы, сёлета мяркуецца выканаць план у 800 тысяч тон.
Беларускія пастаўшчыкі прэснаводнай рыбы — адны з найбуйнейшых у Еўропе. Цяпер рыбгасы зацікаўлены менавіта ў рэалізацыі жывой рыбы, хоць некаторыя прадпрыемствы церпяць страты. У першую чаргу гэта звязана з малым попытам насельніцтва на прэснаводную рыбу. «Людзі не ведаюць пра карысць і якасць беларускага карпа і па звычцы купляюць больш дарагую марскую рыбу», — заўважыла галоўны спецыяліст па маркетынгу ДА «Белвадгас» Міністэрства сельскай гаспадаркі і харчавання Вікторыя ШЫНКЕВІЧ. Яна таксама дадала, што ў Кітаі, дзе вытворчасць карпа складае каля 45,5 мільёна тон за год, яго называюць «рыбай шчасця». Стравы з карпа сталі традыцыйнымі на кітайскіх сталах, чаго не скажаш пра беларусаў, якія набываюць замарожаную марскую рыбу сумніўнай якасці. Спажыўцы адмаўляюцца ад «сваёй» рыбы з-за... непрыемнага паху.
«Гэта распаўсюджаны міф, што прэснаводная рыба горшая за марскую, — пацвердзіла ўрач-дыетолаг Рэспубліканскага клінічнага медыцынскага цэнтра Кіраўніцтва па справах Прэзідэнта Ларыса МУЗЫЧУК. — Насамрэч у ёй змяшчаюцца ўсе неабходныя амінакіслоты і вітаміны, толькі ў меншай колькасці, чым у марской. Да таго ж арганізм беларусаў генетычна больш адаптаваны да спажывання прэснаводнай рыбы. Увогуле, свежая рыба павінна стаць абавязковым кампанентам у меню, бо яна багатая на неабходныя для арганізма амега-3 і амега-6 тлустыя кіслоты».
Спецыялісты падзяліліся парадамі, як адрозніць свежую рыбу ад нясвежай. У свежай жабры шчыльна прыціснуты да цела і маюць цёмна-чырвоны колер, луска добра трымаецца, вочы не западаюць і не чырванеюць.
Дарэчы, традыцыйныя сезонныя рыбныя кірмашы пачнуць сваю работу з 13 верасня. Кошт на карпа новага ўраджаю будзе трымацца ў раёне 40 тысяч рублёў за кілаграм. Для параўнання: па цане кілаграма асятра можна будзе набыць 2 кілаграмы стронгі альбо 3—4 кілаграмы карпа.
Кацярына РАДЗЮК
Мерапрыемства праводзіцца на добраахвотнай аснове.
Не выявіць ні секунды абыякавасці.