Айчынныя вытворцы ствараюць канкурэнтаздольны прадукт для замены імпарту
Кава, чай, марская рыба, цытрусавыя, рыс… Гэтыя і іншыя прадукты добра знаёмы кожнаму беларусу. Мы прызвычаіліся бачыць у крамах усё гэта і ніколі не задумваемся аб тым, што гэтыя прадукты ў нашай краіне не вырабляюцца. І, зразумела, вырабляцца не могуць. Дарэчы, летась у Беларусь з‑за межаў завезлі спажывецкіх тавараў на суму 7,7 млрд долараў (125,7% да 2012 года), а за першае паўгоддзе 2014‑га — 3,7 млрд долараў (105,5% да студзеня — чэрвеня 2013 года). Аднак не ўвесь імпарт можна замяніць. Ва ўмовах, калі ён займае вялікі сегмент рынку, на першы план выходзіць задача павелічэння долі айчыннай прадукцыі ўнутры краіны.
«У свеце ідзе пастаяннае развіццё. І без выпуску канкурэнтаздольнай імпартазамяшчальнай прадукцыі немагчыма, — лічыць Святлана Слінько, начальнік упраўлення спажывецкага рынку харчовых тавараў Міністэрства гандлю. — Гэта — эканамічная бяспека любой дзяржавы, у тым ліку і нашай. Самая галоўная задача — насычэнне ўнутранага рынку за кошт тавараў айчыннай вытворчасці. І нашы прамыслоўцы — вялікія малайцы. Яны прадстаўляюць вельмі шмат навінак. Безумоўна, без імпарту абысціся немагчыма, бо з‑за кліматычных фактараў, геаграфічнага становішча тавар крытычнага імпарту (тыя тавары, паслугі, якія не вырабляюцца ў краіне, але без якіх яна не можа абысціся; сыравіна, запасамі якой краіна не валодае або валодае ў абмежаванай колькасці. — Аўт.) абавязкова будзе. Гэта каля 20% харчавання. Сярод нехарчовых тавараў шэраг тых прадуктаў, якія ў нашай краіне не ствараюцца, нашмат большы».
Аднак размова не ідзе пра татальнае імпартазамяшчэнне і поўнае знікненне замежнага тавару. Безумоўна, развіццё новых вытворчасцяў павінна, перш за ўсё, быць эканамічна эфектыўным, а прадукт павінен быць накіраваны не толькі на ўнутраны, але і на знешні рынак. Галоўнае — умець разгледзець гэтую эфектыўнасць. Так, напрыклад, адбылося з вытворчасцю беларускіх дзіцячых падгузкаў. Шмат гадоў лічылася, што такое прадпрыемства не прынясе эканамічнага эфекту. Аднак два гады таму рызыкнулі. У выніку — айчынныя «памперсы» запатрабаваны не толькі ў Беларусі, але і за межамі краіны (нават у Кітаі).
І такіх прыкладаў вельмі шмат. Больш падрабязна чытайце пра імпартазамяшчальныя тавары ў наступным нумары «Звязды».
Уладзіслаў КУЛЕЦКІ
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».