Асуан. Астанкіна. ГЭС на Нёмане. Іншыя знакамітыя будоўлі.
Сёння — удзел у будаўніцтве Беларускай АЭС і ГЭС на Заходняй Дзвіне...
Адкрытае акцыянернае таварыства «Краснасельскбудматэрыялы» гэтымі днямі адзначае стагадовы юбілей. За сваю векавую гісторыю завод ператварыўся ў сучаснае шматпрофільнае прадпрыемства, стаў найбуйнейшым вытворцам будаўнічых матэрыялаў у Беларусі, сваю прадукцыю выпускае ў асноўным з уласнай сыравіны.
Напярэдадні юбілею суразмоўцамі карэспандэнтаў «Звязды» сталі з генеральны дырэктар акцыянернага таварыства Валянцін Алегавіч ВЕРАЦІЛА, кіраўнікі філіялаў, работнікі праслаўленага калектыву.
— Паважаны Валянцін Алегавіч, ваш калектыў цікавы тым, што ў яго жыцці пастаянна адбываецца нешта вартае ўвагі. То новае будаўніцтва, то прынцыпова новыя тэхналогіі... Што ў калектыве адбываецца сёння? Чым ён жыве, якімі клопатамі?
— Калектыў сёння рыхтуецца да знамянальнай падзеі — 100-годдзя
з дня пачатку работы цэментнага завода і вытворчасці цэменту на тэрыторыі на той час Паўночна-Заходняга краю Расійскай імперыі. Прайшоў сур'ёзны гістарычны перыяд — 100 гадоў. І ўсе гэтыя доўгія дзесяцігоддзі выпуск цэменту працягваўся, праводзілася мадэрнізацыя вытворчасці і ўдасканальвалася структура, умацоўваліся пазіцыі на рынках. У разы павялічылася колькасць персаналу. На аснове цэменту наладжана вытворчасць іншых відаў надзвычай патрэбных краіне будаўнічых матэрыялаў — шыферу, труб, сухіх будаўнічых сумесяў, блокаў з ячэістага бетону... Пройдзеным шляхам можна ганарыцца, таму мы сёння збіраемся годна адзначыць стагоддзе, запрасіць нашых ветэранаў і партнёраў па бізнесе, гасцей з замежных краін, з якімі мы працуем і ў якія паступае наша прадукцыя.
Паралельна працуем над удасканаленнем тэхналогіі вытворчасці клінкеру сухім спосабам, каб мінімізаваць вытворчыя страты і знізіць сабекошт гатовага прадукту. З тым, каб мы працягвалі паспяхова канкурыраваць па цэменце не толькі на ўнутраным рынку, але і ў суседніх дзяржавах — Польшчы, краінах Балтыі, у Калінінградскім рэгіёне Расійскай Федэрацыі. Для нас гэта важны рэгіён, хоць ён і не валодае надзвычай вялікімі магчымасцямі для спажывання цэменту (за год недзе 400 тысяч тон). Але на іх рынку гандлююць сваім цэментам Швецыя, Польшча, Літва, і прысутнасць нашага прадукту дае магчымасць канкурыраваць з сусветна вядомымі кампаніямі па вытворчасці цэменту, што рашуча падштурхоўвае нас да таго, каб мы і далей удасканальвалі ўласную вытворчасць.
Стараемся замацавацца не толькі на гэтых, але і на іншых рынках. Актыўна працуем з Цэнтральнай Расіяй: гэта Паўночна-Заходняя федэральная акруга — Санкт-Пецярбург і Ленінградская вобласць; гэта Цэнтральная федэральная акруга — Масква, Смаленск. Прычым працуем з кампаніяй Еўрацэментгруп — найбуйнейшай кампаніяй па вытворчасці цэменту не толькі ў Расіі, але і ў свеце, бо яна выпускае сёння каля 40 мільёнаў тон цэменту і ўваходзіць у групу найбольш моцных сусветных пастаўшчыкоў. Што таксама прымушае нас быць заўсёды на вышыні. Бо той жа Санкт-Пецярбург — адзін з найбуйнейшых гарадоў Расіі. Там таксама шмат кампаній, якія жадаюць пастаўляць цэмент для будаўніцтва тых ці іншых аб'ектаў. Тое ж самае ў Маскве, Смаленску і вобласці.
Таму цяпер ёсць шанц павялічыць аб'ём экспарту цэменту, і мы стараемся гэты шанц не ўпусціць.
Сёння ёсць і магчымасці рэалізаваць цэмент у Беларусі на найбольш буйных будоўлях. Мы ганарымся тым, што ў стагадовай гісторыі ААТ «Краснасельскбудматэрыялы» ёсць факты выкарыстання нашага цэменту пры ўзвядзенні Асуанскай гідраэлектрастанцыі і Астанкінскай тэлевежы, на іншых знакамітых будоўлях. Мы захавалі свае традыцыі, мы іх замацавалі — тым, што ў Беларусі з нашым удзелам пабудавана гідраэлектрастанцыя на Нёмане. Сёння будуецца гідраэлектрастанцыя на Заходняй Дзвіне, таксама з нашым непасрэдным удзелам. Што датычыць такога значнага для ўсёй краіны аб'екта, як Беларуская атамная станцыя ў Астраўцы, то для прыгатавання бетону пад рэактарную залу ідзе толькі наш цэмент, не кажучы ўжо пра інфраструктуру. Пры адборы цэментаў для вытворчасці бетонаў для АЭС галіновы навукова-даследчы інстытут — НІІСМ — правёў выпрабаванні і аддаў перавагу нашаму прадукту.
Зараз усё больш упэўнена гаворыцца пра тое, што цэмент будзе прымяняцца для бетонаў дарожнага пакрыцця, як гэта робіцца ў такіх найбольш развітых краінах, як Германія, ЗША і іншых. Мы ўдзельнічаем у цікавым эксперыменце: на другой Мінскай кальцавой аўтамагістралі праводзяцца работы па будаўніцтве кантрольнага ўчастка дарогі з прымяненнем бетону як пакрыцця, а не асфальтабетону, як дагэтуль. Інстытут БелдарНДІ загадзя правёў даследаванні прадукцыі трох цэментных заводаў рэспублікі і рэкамендаваў дарожна-будаўнічаму трэсту № 5 выкарыстаць для вытворчасці бетоннага пакрыцця менавіта наш цэмент.
Работы павінны завяршыцца на працягу месяца, а затым будзе праведзены разлік кошту гэтага кіламетра. Калі высветліцца, што сабекошт эксперыментальнага кіламетра ніжэйшы за сабекошт традыцыйных тэхналогій пры ўзвядзенні дарог, то цэмент пачнуць шырока выкарыстоўваць на гэтай дастаткова важнай будоўлі, а затым ён наогул атрымае новую перспектыву ў дарожным будаўніцтве ў краіне. У тым ліку, як вы разумееце, і наш цэмент.
Сёння, як я зазначыў, мы актыўна займаемся асваеннем і ўдасканаленнем тэхналогіі сухога спосабу. Мы не ўтойваем, што, маючы такі багаты вопыт эксплуатацыі прадпрыемства — стагадовы, тым не менш сустрэліся з пэўнымі складанасцямі. Сухі спосаб вытворчасці з'яўляецца абсалютна новым для нас — для спецыялістаў, для ўсяго калектыву. У пэўнай ступені сітуацыю можна параўнаць з той, якая была сто гадоў таму, калі малады калектыў толькі пачынаў вытворчасць «хлеба індустрыі». Выкарыстоўваецца няпростая новая тэхналогія, і калектыву трэба набірацца вопыту, практычных ведаў, каб паспяхова эксплуатаваць новую вытворчасць з яе зусім іншым абсталяваннем, якое там зманціравана.
Такія вось задачы і праблемы вырашаем сёння, напярэдадні значнай і прыемнай даты.
— Калі можна, пракаментуйце вынікі пяці месяцаў.
— Я ўжо магу ацэньваць і вынікі паўгоддзя. Скажу так: побач з відавочнымі дасягненнямі існуюць і праблемы. Заключаюцца яны ў тым, што ў гэты перыяд мы адгружалі цэмент для суб'ектаў гаспадарання Рэспублікі Беларусь, галоўным чынам, будаўнічых арганізацый, сельскагаспадарчых прадпрыемстваў, якія выконвалі дзяржаўную задачу па ўзвядзенні комплексаў для гадоўлі жывёлы, будаўніцтве жылля, іншых важных аб'ектаў. Сёння існуе дэбіторская запазычанасць за адгружаную прадукцыю. Адчуваючы па гэтай прычыне недахоп абаротных сродкаў, прыцягвалі пад бягучую дзейнасць крэдыты. Разлікі па крэдытах не дазвалялі да апошняга часу мець чысты прыбытак, хоць прыбытак ад рэалізацыі ёсць. За 6 месяцаў ён атрыманы значна вышэйшы, чым за аналагічны леташні перыяд, дзякуючы чаму сітуацыя пачала выпраўляцца, і чэрвень мы завяршылі з чыстым прыбыткам.
Ёсць і некаторыя іншыя праблемы фінансавага характару. Да нас далучаны два прадпрыемствы — «Смаргоньсілікатабетон» і Гродзенскі камбінат будматэрыялаў. На момант далучэння яны былі стратнымі, і трэба было ажыццяўляць шэраг тэрміновых захадаў, якія адцягвалі нашы рэсурсы. Але вынікі цяпер такія: калі летась у жніўні прадпрыемства «Смаргоньсілікатабетон» было стратным і мела праблемы з выплатай зарплаты і аплатай энерганосьбітаў, а таксама ў абслугоўванні крэдытных рэсурсаў, то сёння яно з'яўляецца прыбытковым, нават завяршыла паўгоддзе з чыстым прыбыткам. Яны сёння датэрмінова пагасілі ўсе тыя крэдыты, якія, згодна з бізнес-планам, павінны былі пагашацца на працягу года.
Гродзенскі камбінат будматэрыялаў знізіў сумы страт, выйшаў на прыбытак па выніках работы за чэрвень, але па выніках паўгоддзя пакуль прыбытку не мае. Там крыху больш праблем, мы вырашаем іх разам.
Хачу зазначыць, што значную падтрымку ў зніжэнні крэдытнай нагрузкі на прадпрыемства нам аказвае дзяржава, за што ўвесь наш калектыў удзячны. Сумесна праводзіцца работа па пагашэнні дэбіторскай запазычанасці. Адным з важных момантаў з'яўляецца рашэнне ўрада аб зніжэнні цаны на газ. Калі да 1 чэрвеня гэтага года мы мелі цану на газ 275 долараў за 1000 метраў кубічных, то сёння маем 210. Адчувальная розніца дае магчымасць знізіць выдаткі па выпуску прадукцыі, а значыць, знізіць яе сабекошт, што паспрыяе ўмацаванню нашага эканамічнага становішча. Мы разлічваем, што да кастрычніка акцыянернае таварыства цалкам, з улікам і прадпрыемстваў, якія да нас далучаны, выйдзе на бясстратную работу. Няхай сабе чысты прыбытак будзе пакуль не вельмі вялікім, але ён будзе.
Адкуль такая ўпэўненасць? Мы бачым попыт на цэмент на ўнутраным рынку. Мы бачым павелічэнне попыту на яго на знешнім рынку. Усяго адзін прыклад для нагляднасці. Калі мы разлічвалі, што наш экспарт цэменту ў Літву сёлета складзе прыкладна 20 тысяч тон, то па факце за паўгоддзе адгрузілі 48 тысяч тон, і попыт павялічваецца. Нягледзячы на тое, што ў Літве на буйным прадпрыемстве «Акмянцэментас» таксама ўведзена ў эксплуатацыю лінія па вытворчасці клінкеру сухім спосабам.
Мы рэзка нарасцілі экспарт цэменту ў Калінінградскі рэгіён Расіі. У свой час ААТ «Краснасельскбудматэрыялы» пайшло з гэтага рэгіёна па той простай прычыне, што наша прадукцыя была патрэбна на ўнутраным рынку, і гэта правільна. Тады краіна вырашала праблему будаўніцтва жылля, што заўсёды было прыярытэтам дзяржавы. Сёння мы вяртаемся на свае старыя рынкі, і нарасціўшы экспарт, разлічваем на больш устойлівую ўласную работу. І на тыя перспектывы па выніках работы за 10 месяцаў, пра якія я гаварыў трохі вышэй.
— У інтарэсах шырокага чытача ўдакладніце, калі ласка. Калі мы гаворым пра сухі метад вытворчасці клінкеру, то размова ідзе пра новую лінію, якая была запушчана параўнальна нядаўна, ці вы збіраецеся пераводзіць на прагрэсіўную тэхналогію і іншыя лініі?
— Не, размова пра новую лінію. Перавод дзеючых магутнасцяў на новую тэхналогію мы не планавалі. Тэхнічна гэта магчыма, але эканамічна немэтазгодна. Таму трэцюю і чацвёртую тэхналагічныя лініі па вытворчасці цэменту, што ўзведзены ў 2000 і 2002 гг., перавялі на вугальнае паліва, як і было прадугледжана праектам будаўніцтва лініі па сухім спосабе. Вугальнае паліва дазволіла зменшыць затраты на вытворчасць «хлеба індустрыі», захаваўшы яго якасць.
Мы і не плануем работы, звязаныя з пераводам гэтых дзвюх ліній на сухі спосаб. Думаем, што калі давядзём да дасканаласці эксплуатацыю лініі па сухім спосабе, то забяспечым неабходныя аб'ёмы цэменту для ўнутранага і знешняга рынкаў, знізім яго сабекошт і такім чынам па-ранейшаму будзем канкурэнтаздольнымі — і па якасці, і па цанавым фактары.
Уласна кажучы, сёння па якасці мы і не канкурыруем, бо якасць гарантавана сертыфікатамі краін ЕС, якія мы маем і пацвярджаем. А вось па цанавым фактары, можна сказаць, шмат работы. Тым больш што аналагічныя тэхналогіі ёсць у краінах далёкага і блізкага замежжа, тых жа Польшчы, Літве, Латвіі. Яны не толькі маюць сухі спосаб, але і выкарыстоўваюць больш таннае паліва. Калі браць спажыванне паліва на адзінку прадукцыі за 100 працэнтаў, то 60 працэнтаў з іх складае вугаль, а 40 працэнтаў — паліўныя брыкеты з цвёрдых бытавых адыходаў. Такім чынам сабекошт цэменту істотна зніжаецца, што ўплывае на цану. І канкурыраваць з імі зусім не проста.
— У такім выпадку скажыце: новая лінія па сухім метадзе ўзмацніла запас вашай моцнасці? Ці пытанне крыху заўчаснае?
— Пытанне як пытанне. Проста трэба разумець, што ідзе стараннае, карпатлівае асваенне новай тэхналогіі, якой мы раней ніколі не займаліся, асваенне новага абсталявання, якое працуе пад «наглядам» камп'ютара. Калі адна новая печ выпускае клінкеру столькі, колькі чатыры старыя, то можаце сабе ўявіць маштаб задачы, якую нам трэба вырашыць, каб запрэгчы гэтага «гарачага каня».
Нельга патрабаваць ад малога дзіцяці, каб яно, як толькі нарадзілася, адразу ўстала на ножкі і пайшло, нават пабегла... На ўсё патрэбны час. Тым больш на асваенне абсалютна новай для нашых спецыялістаў тэхналогіі. Мы многага не ведаем. Іншы раз сустракаемся з праблемай, для нас зусім нечаканай. І трэба падумаць, як да яе падступіцца. Нам патрэбны вопыт.
Мы маглі не пераходзіць на рэвалюцыйны для сябе сухі спосаб вытворчасці і не мучыцца са «ста невядомымі». Але за новай тэхналогіяй будучыня. І сухі спосаб у хуткім часе забяспечыць патрэбы спажыўцоў у цэменце і на ўнутраным, і на знешнім рынках. А праблемы — яны ёсць, як і ў любой новай справе. Але калі б мы не пайшлі шляхам далейшай рашучай мадэрнізацыі, наша прадукцыя вельмі хутка стала б неканкурэнтаздольнай па цане ў параўнанні з партнёрамі. І што тады?
Намі не менш напружана вядуцца работы і на новай устаноўцы па вытворчасці вапны сухім метадам, каб забяспечыць яе ўстойлівае функцыянаванне. Гэта таксама прарыў у сваёй сферы. Дапрацоўваем тэхналогію з улікам рэкамендацый кампаніі «Эфельшміт», якая рэалізуе падобны праект і ў Маларыце. Думаю, што ў бліжэйшы месяц правядзём патрэбны аб'ём работ і атрымаем тыя вынікі, на якія разлічваем.
Такім чынам, для нас мадэрнізацыя, асваенне ўсяго новага, перадавога — даўняя, і нават можна сказаць, векавая традыцыя. І кожны раз, распачынаючы абнаўленне вытворчасці, мы спадзяёмся на высокапрафесійны, дружны, лёгкі на пад'ём калектыў. І ён ніколі не падводзіў. Калектыў у нас дастойны. Таму верым, што новым працоўным перамогам — быць. І свята будзем адзначаць дастойна.
ШТРЫХІ ДА БІЯГРАФІІ КАЛЕКТЫВУ
Гісторыя прадпрыемства пачалася ў жніўні 1914 года, калі акцыянерным таварыствам «Валынь» каля вёскі Краснае Сяло быў пабудаваны цэментны завод. Цікава, што сыравіна з кар'ера дастаўлялася сюды... паветрам. Дакладней, па паветрана-канатнай дарозе. А першы паравы экскаватар быў атрыманы ў 1928 годзе.
Да 1925 года цэмент адпраўлялі спажыўцам у спецыяльных драўляных бочках умяшчальнасцю да 200 кілаграмаў (іх рабілі ва ўласнай бандарнай майстэрні).
Ужо ў новыя часы першым дырэктарам пасляваеннага прадпрыемства быў прызначаны Іван Мікалаевіч Хамчукоў. За самаадданую працу калектыву Савет Народных Камісараў БССР у верасні 1945 года прысвоіў Ваўкавыскаму цэментнаму заводу найменне «Перамога». Пазней на яго базе было створана вытворчае аб'яднанне «Ваўкавыскцэментнашыфер», першым генеральным дырэктарам якога стаў Алег Іванавіч Ставер.
Прадпрыемства развівалася, мяняла назвы, праходзіла праз рэарганізацыі і зліццё, пазней наогул пераехала ў новыя сцены, калі былая «Перамога» вычарпала свой рэсурс. Вялікі ўклад у развіццё калектыву ўнёс Юрый Яўгенавіч Данешчык. А з 2000 года адным з пастаянных лідараў працоўнага саперніцтва галіны паспяхова кіруе Валянцін Алегавіч Вераціла.
Сёння прадпрыемства выпускае цэмент, будаўнічую вапну, дробнагрануляваны мел, блокі з ячэістага бетону, сухія будаўнічыя сумесі, асбестацэментныя лісты і хрызатылцэментныя трубы, керамічную прадукцыю, пячную кафлю, плітку тратуарную, поліэтыленавую плёнку.
Калектыў — неаднаразовы лаўрэат прэміі ўрада Рэспублікі Беларусь за высокую якасць прадукцыі і шматгадовы лаўрэат конкурсу «Лепшыя тавары Рэспублікі Беларусь». Што цалкам зразумела, бо сучаснае абсталяванне і высокі прафесіяналізм работнікаў дазваляюць выпускаць прадукцыю, якая адпавядае як нацыянальным, так і еўрапейскім нормам і мае права маркіравацца знакам CE. Яе пастаянным спажыўцом з'яўляюцца найбуйнейшыя будаўнічыя карпарацыі Польшчы, Літвы, Латвіі, Расіі, Малдовы і іншых краін.
ДЫНАСТЫЯ, ЯКАЯ НАПРАЦАВАЛА 785 ГАДОЎ
Уцэнтры ўсеагульнай увагі сёння — філіял № 1: цэментны завод з яго небывалай па сваёй высокапрадукцыйнасці новай лініяй. Таму па рэкамендацыі генеральнага дырэктара мы наведалі гэты калектыў. І наступным нашым суразмоўцам стаў дырэктар цэментнага завода Аляксандр Вяселік.
— Асаблівы настрой напярэдадні юбілею надае той факт, што з нашага цэменту ўзводзяцца ўсе аб'екты дзяржаўнай важнасці, — з гонарам расказвае Аляксандр Міхайлавіч. — Гэта сведчыць, што наш прадукт — добрай якасці і карыстаецца вялікім попытам. Імкненне калектыву захоўваць традыцыі высокай якасці, якія ўстанавіліся з 1914 года, сёння пацвярджаецца цалкам, на ўсе 100 працэнтаў.
Стылем жыцця стала пастаянная мадэрнізацыя. Цяпер ушчыльную прыступілі да больш шырокага выкарыстання альтэрнатыўных відаў паліва. Вядуцца адпаведныя праектныя работы.
Людзі настроены канструктыўна, усе нацэлены на поспех, бо разумеюць, што за новай тэхналогіяй, якую сёння асвойваем — наша будучыня. І людзі самі дабіваюцца выніку, не чакаюць, што нехта прыйдзе (напрыклад, кітайскія спецыялісты) і за нас зробіць. Для нас ужо зроблена многае. Нам пабудавалі не проста новую высокапрадукцыйную лінію, а цэлы завод. Давесці яго да ідэальнага стану, выйсці на праектную магутнасць — наша задача. І мы з ёю справімся. Невыпадкова замежныя партнёры вельмі часта адзываюцца пра нашых спецыялістаў як пра людзей, якія дасягнулі высокага ўзроўню кваліфікацыі і добрасумленна ставяцца да абсталявання і тэхналагічнага працэсу.
Пачыналі асваенне новай лініі дастаткова складана. Спачатку выпускалі дзесяць, дваццаць тон клінкеру за месяц. І вось за апошнія паўгода выйшлі на сто тысяч. Гэта моцны скачок.
У нас народ наогул падабраўся працавіты, старанны. Тым не менш ёсць людзі, якіх варта вылучыць, назваць у газеце. Гэта слесар-рамонтнік цэха перапрацоўкі сыравіны Віктар Каладзінскі, майстар змены цэха перапрацоўкі сыравіны Галіна Манчынская, драбільшчык цэха паліва Валерый Целеш, абпальшчык цэха абпальвання клінкеру вытворчасці клінкеру сухім спосабам Мікалай Вераціла, машыніст крана цэха памолу цэменту Наталля Іванова, слесар-рамонтнік гэтага цэха Сяргей Вераціла, слесар-рамонтнік параводасілавога цэха Ігар Фядосаў, электраманцёр электрарамонтнага цэха Іосіф Тышкевіч, слесар-рамонтнік цэха перапрацоўкі сыравіны вытворчасці клінкеру сухім спосабам Віктар Касіла, насыпальшчыкі пылападобных матэрыялаў цэха чыгуначнага транспарту, пакавання і адгрузкі цэменту Іван Раміковіч і Валянцін Дзямешчык.
Возьмем Валянціна Дзямешчыка. Валянцін Яўгенавіч у акцыянерным таварыстве 15 гадоў. За змену праз рукі (няхай сабе і з дапамогай тэхнікі) праходзіць не адна сотня тон. У брыгадзе пяць чалавек, і Валянцін Яўгенавіч выконвае абавязкі брыгадзіра. Ва ўсім любіць парадак. Гаворыць так: «Калі ўсё ладзіцца, усё нармальна, то і працуецца ў ахвоту. Цэмент ідзе, работа ёсць, зарплата нармальная. Чакаем юбілею».
Альбо зменны аператар цэнтральнага пункта кіравання завода Мікалай Вераціла. На прадпрыемстве Мікалай Мікалаевіч 18 гадоў. Пачынаў памочнікам абпальшчыка яшчэ на старых лініях. Цяпер на новым абсталяванні сам выконвае гэтую адказную функцыю. На прадпрыемстве, у лабараторыі, працуе і жонка. Бацькі спадзяюцца, што па іх шляху пойдзе дачка: яна скончыла ўніверсітэт, па адукацыі — інжынер-хімік-тэхнолаг.
Мікалай Вераціла і яго калегі з ЦПУ кантралююць тэхналагічны працэс, вядуць пастаянны кантроль за тэмпературай і разрэджваннем, расходам паліва і іншымі важнымі параметрамі. У кожнага на стале камп'ютар з тэхналагічнай схемай участка ці аперацыі, за якія ён адказвае. І перад вачыма, на сцяне — пяць вялікіх манітораў. На іх выводзіцца «жывая карцінка» паступлення сыравіны, гарэлкі печы, перамяшчэння гатовага прадукту, клінкеру, у халадзільнік — фактычна ўвесь працэс.
У нас працуе шмат дынастый — і Верацілы, і Апановічы, і іншыя. І ў мяне, як высветлілася, дынастыя таксама вялікая. У сувязі з падрыхтоўкай да юбілею было падлічана, што, пачынаючы ад майго дзеда, разам з усімі ўнукамі і праўнукамі (калі скласці адпрацаваныя гады ў агульны стаж), Вяселікі шчыравалі на цэмзаводзе 785 гадоў. За сто гадоў — амаль 800. У свой час сюды прыходзілі на змену мае маці і бацька (ён з'яўляўся начальнікам транспартнага цэха на заводзе АЦІ). І калі браць толькі па лініі бацькі, а разам з братамі і сёстрамі іх у сям'і было пяцёра, і ўсе — цэментнікі.
Сёння таксама працуюць прадстаўнікі некалькіх пакаленняў адначасова. Калі гаварыць канкрэтна пра мяне, то разам са мной прыходзяць на завод таксама жонка, брат, яго сын і жонка. І так вельмі ў многіх. А як вядома, нічога так не мацуе працоўны калектыў, як дынастыя, як традыцыя, любоў і павага да свайго калектыву, сфарміраваныя на працягу цэлага стагоддзя.
Гэта праўда, што калектыў акцыянернага таварыства любіць і ўмее працаваць. Тым не менш вялікая заслуга ва ўсіх нашых набытках (я кажу тое, што думаю і што думаюць іншыя) генеральнага дырэктара. У нас каля штурвала стаіць той капітан, які сапраўды вядзе наш карабель у патрэбным кірунку. Як бы складана ні было, усе пытанні вырашаюцца. Ёсць падтрымка ад міністэрства, наогул ад дзяржавы. У выніку агульных старанняў калектыву, яго кіраўніцтва, мясцовай і цэнтральнай улад няма больш таго разумення цэментнай вытворчасці, якое існавала раней. Усё навокал зялёнае, нават побач з высокапрадукцыйным вугальным млынам чысціня. Нашы госці часта фатаграфуюць ружы на тэрыторыі прадпрыемства — сёння гэта яго сімвал. Як і сямейка лебедзяў, што плавае ў невялікім рукатворным вадаёме. Спадзяемся, што ў іх таксама атрымаецца свая лебядзіная дынастыя, і штогод будуць прылятаць да нас і сяліцца тут усё новыя пакаленні прыгажуноў-шыпуноў.
ХРОНІКА АБНАЎЛЕННЯ
ВЫТВОРЧЫХ МАГУТНАСЦЯЎ
Факты апошняга дзесяцігоддзя
Красавік 2004 года — уведзены ўчастак па выпуску каляровай тратуарнай пліткі.
Май 2005 г. — пуск цэха сухіх будаўнічых сумесяў.
Студзень 2006 г. — пуск цэха па вытворчасці гідратнай вапны.
Снежань 2007 г. — пуск устаноўкі па спальванні зношаных аўтапакрышак на адной з ліній абпальвання клінкеру.
Люты 2009 г. — увод у эксплуатацыю міні-ЦЭЦ, якая забяспечвае электраэнергіяй завод асбестацэментных вырабаў і вапнавы завод.
Лістапад 2009 г. — пуск лініі блокаў з ячэістага бетону.
Красавік 2012 года — пуск новай тэхналагічнай лініі па вытворчасці клінкеру сухім спосабам. Яе будаўніцтва ажыццёўлена дзякуючы рэалізацыі беларуска-кітайскага
інвестыцыйнага праекта.
«АТАКА» НА ЎПАРТЫЯ 75 ПРАЦЭНТАЎ
Слова — дырэктару філіяла № 3 «Вапнавы завод» Віталю Наско.
— Вапнавы завод уключае ў сябе пяць тэхналагічных ліній па вытворчасці вапны, агульная магутнасць — 500 тысяч тон.
Сёння працуюць чатыры лініі, адна з якіх знаходзіцца ў стадыі пераводу на сухі метад вытворчасці. Што дазволіць значна скараціць і спажыванне паліўна-энергетычных рэсурсаў, якія ў сабекошце прадукцыі складаюць прыкладна 75 працэнтаў.
Вытворчыя планы паўгоддзя выконваюцца. Вапна адгружаецца не толькі спажыўцам Беларусі, але і на экспарт — у Расію, Прыбалтыку, Польшчу. Асноўныя спажыўцы — заводы па вытворчасці газасілікатных вырабаў: блокаў з ячэістага бетону і сілікатнай цэглы.
Шэраг прадпрыемстваў у сваёй вытворчасці прымяняе вапну для нейтралізацыі шкодных прымесяў, перапрацоўкі скур.
Ёсць у нас і вытворчасць дробнагрануляванага мелу. Асноўны спажывец — прадпрыемствы, якія выпускаюць камбікармы для АПК.
Асаблівым попытам карыстаецца гідратная вапна, якая шырока прымяняецца пры вытворчасці сухіх будаўнічых сумесяў. Сёння разглядаецца пытанне аб тым, каб павялічыць выпуск гідратнай вапны шляхам устаноўкі дадатковага гідратара з сістэмай упакоўкі ў мяхі ці бігбегі.
Калі ўлічыць, што ў нас ёсць будынак з інфраструктурай, ёсць месца для ўстаноўкі дадатковага гідратара, то спатрэбяцца толькі сродкі на само гэтае абсталяванне.
На заводзе працуе 278 чалавек. Кадры кваліфікаваныя, вытворчасць бесперапынная, і складана выдзеліць нейкую брыгаду.
Тым не менш сёння можам назваць лепшых з лепшых. Перш за ўсё начальніка цэха памолу Барыса Чырвоніка, начальніка цэха абпальвання Андрэя Кішкуна, транспарцёршчыка цэха абпальвання вапны Ірыну Васілеўскую, абпальшчыка гэтага цэха Аляксандра Дзенісюка, чысцільшчыка з таго ж вытворчага падраздзялення Сяргея Смірнова, машыніста пнеўмакамерных помпаў цэха па вытворчасці і адгрузцы вапны і дробнагрануляванага мелу Паўла Болдака, слесара-сантэхніка з гэтага цэха Аляксандра Бясько, басейншчыка з таго ж цэха Галіну Марко, электраманцёра па рамонце і абслугоўванні электраабсталявання электрарамонтнага цэха Дзмітрыя Дзедзюна.
ТЭХНАЛОГІЯ — ПЕРАДАВАЯ
Дырэктар філіяла № 2 — завода асбестацэментных вырабаў Юрый Дамавідаў:
— Цэх па вытворчасці блокаў з ячэістага бетону і кампазіцыйных матэрыялаў дасягнуў сваёй максімальнай прадукцыйнасці: сёлета выходзім на 250 тысяч «кубоў». За першае паўгоддзе палову ўжо зрабілі. Рэнтабельнасць пакуль 10 працэнтаў, але пры асваенні новай прадукцыі гэта нармальны паказчык. 90 працэнтаў блокаў выпускаем першай катэгорыяй — гэта вышэйшы гатунак для такіх блокаў. Сезон пачаўся, павысілася актыўнасць пакупнікоў, і перш за ўсё будаўнікоў, якія займаюцца ўзвядзеннем жылля. Значыць, у нас павялічыўся збыт. У суткі адгружаем 1000 — 1200 «кубоў» пры сутачнай прадукцыйнасці на гэтым этапе 700 — 750 куб.м.
Цэх працуе ў аўтаматычным рэжыме. У змену заняты 8 чалавек — больш не патрэбна.
Тэхналогія вытворчасці блокаў самая перадавая, вібраўдарная. Крыху нават удасканалілі яе ў тым сэнсе, што выкарыстоўваем і так званы падразны слой, які раней ішоў у адходы. Цяпер мы яго перапрацоўваем — здрабняем і дабаўляем у млыны пры памоле пяску. Эканомім да 5 працэнтаў ад масы сухога пяску — а гэта салідныя грошы. Такім чынам, сёння ў нас практычна безадходная вытворчасць. Ёсць і іншыя напрацоўкі, каб зрабіць прадукцыю больш таннай, але для іх укаранення давядзецца крыху пачакаць, пакуль вапнавы завод запрацуе на поўную магутнасць па сухім спосабе.
Перадавікі нашы — людзі тэхнічна падкаваныя. Гэта наладчык абсталявання цэха па вытворчасці асбестацэментных вырабаў Вадзім Агей, змешвальнік гэтага цэха Ганна Пракопчык, аператар пульта кіравання цэха па вытворчасці блокаў з ячэістых бетонаў і кампазіцыйных матэрыялаў Таццяна Кудрыцкая, машыніст абсталявання канвеерных і паточных ліній гэтага цэха Аляксандр Апановіч, сушыльшчык цэха па вытворчасці сухіх будаўнічых сумесяў Сяргей Берташ і дазіроўшчык таго ж цэха Леанід Суслін. А таксама электраманцёрцы па рамонце і абслугоўванні электраабсталявання электрарамонтнага цэха Мікалай Глебік і Міхаіл Палуйчык, слесар-сантэхнік параводасілавога цэха Віктар Дудзінскі, апаратчык хімводаачысткі гэтага цэха Святлана Белая, грузчык цэха пагруза-разгрузачных работ Сяргей Грушэвіч, кранаўшчык гэтага цэха Іна Колесава. Спіс можна прадоўжыць.
На цэмзаводзе — свой цэх чыгуначнага транспарту, упакоўкі і адгрузкі прадукцыі. Тлумачэнні дае яго начальнік Яўген Мазец.
— Адгрузка вядзецца на працягу светлавога дня, адразу з некалькіх кропак. У сярэднім грузім цэментам каля 60 хапроў, прыкладна 300 тон у мяхах па 50 кілаграмаў на аўтатранспарт (і ў мяшках па 25 кілаграмаў таксама). У змену загружаем і адпраўляем гандлю 5-6 крытых вагонаў, за суткі — 10-12. Акрамя таго, насыпам грузяцца цэментавозы.
Яшчэ адзін варыянт адгрузкі — на паддоны і еўрападдоны пад тэрмаўсадачную плёнку. Дапамагае тое, што ў нас плёнка — уласнай вытворчасці, таўшчынёй 240 мікрон. Такую больш нідзе не выпускаюць (максімальна робяць 150 мікрон). Пры транспарціроўцы на любыя адлегласці яна трымае ўсю піраміду мяхоў надзейна, тая не развальваецца.
Якраз сёння ў начную змену тарыравалі паддоны з мяхамі на экспарт, у Польшчу. Укладкай на паддоны таксама займаецца аўтаматычная лінія. У крытыя вагоны ці ў аўтатранспарт мы падаём іх пагрузчыкамі, а спажыўцы потым такім жа чынам і разгружаюць, без ручной працы.
У гаспадарку цэха ўваходзяць цеплавозы, чыгуначныя краны і дзве ўпаковачныя лініі — гаспадарка даволі складаная. Мы з вамі знаходзімся побач з дзесяцімодульнай упаковачнай лініяй фірмы «Мюлерс». З яе дапамогай адпускаем машыны, якія ноччу прыехалі да нас з розных куткоў Беларусі. Дапамагае і другая лінія, каб машыны спажыўцоў менш часу знаходзіліся ў чарзе. І ёсць дзве лініі для расфасоўкі ў бігбегі — поліпрапіленавыя кантэйнеры па тоне вагой кожны. Насычанасць тэхнікай дазваляе аператыўна пераключацца на тую аперацыю, якая ў гэты час найбольш патрэбна, на любы фронт работ, і паспяхова з ім спраўляцца.
ПАМЯТАЕМ АБ ПРАЦОЎНЫМ ПОДЗВІГУ
Аб тым, як будзе адзначацца стагадовы юбілей, распавядае намеснік генеральнага дырэктара па ідэалагічнай рабоце і сацыяльных пытаннях Генадзь Найдзюк.
— Адзначаць будзем даволі шырока. Па-першае, скажу, што да юбілею зняты фільм і падрыхтавана кніга пра гісторыю завода. Калі яе пісалі, то знайшлося шмат цікавага. Напрыклад, калі ўчыталіся ў загады 1944 і 1945 гадоў, адчулі, наколькі цяжкім было аднаўленне таго, што разбурыла вайна.
Ваўкавыскі раён і пасёлак былі вызвалены 14 ліпеня 1944 года. А ўжо ў лістападзе 1944-га першы эшалон пайшоў на Мінск для яго адбудавання і было дакладзена Сталіну, што завод пушчаны. У якіх жа ўмовах працавалі? Грошай, як можна было зразумець, не плацілі. Работніку, які працаваў на цэментным заводзе, выдавалася 500 грамаў хлеба ў суткі, служачы атрымліваў 400, а ўтрыманец і члены сям'і — па 300. І ўсё.
Згодна з пастановай Савета Міністраў, на завод былі накіраваны 500 чалавек — галоўным чынам, з вёсак рэгіёна. І выйшаў загад, згодна з якім быў уведзены 10-гадзінны рабочы дзень. Без выхадных і адпачынкаў. І людзі працавалі, пратэстаў не было, бо разумелі: без цэменту — як без хлеба. Усё разбурана, а адбудоўваць трэба. Вось так уздымалі завод. І аднавілі. У пачатку 1945 года прадпрыемства было пушчана цалкам, і за такую калектыўную працу заводу ўрадам рэспублікі было прысвоена званне «Перамога». Ён насіў гэтае гордае званне да таго моманту, пакуль у 2000 годзе не быў спынены і не перадаў эстафету новаму заводу...
Цяпер калектыў наш вялікі — амаль чатыры з паловай тысячы чалавек. 8 жніўня, напярэдані Дня будаўніка, адбудзецца агульны ўрачысты сход. Будуць узнагароджвацца лепшыя з лепшых. Прадугледжаны святочны «агеньчык», фотавыстава «Гістарычныя замалёўкі», конкурс сярод філіялаў «Нам ідэя тварыць дапамагае», іншыя разнастайныя культурныя і спартыўныя мерапрыемствы. І канцэрт майстроў беларускай эстрады. Завершым мерапрыемствы феерверкам.
А на Дзень будаўніка калектыў будуць віншаваць ужо нашы мясцовыя артысты пры падтрымцы Ваўкавыскага РДК і Краснасельскага ДК. Мастацкая самадзейнасць «Краснасельскбудматэрыялаў» у гэтым годзе заняла на раённым аглядзе першае месца, і народу, шчыра кажучы, іх выступленні падабаюцца больш за іншыя.
Так што гасцінна запрашаем на свята.
А ПРА ЗДАРОЎЕ ПАКЛАПОЦІЦЦА «ПРАЛЕСКА»
Гэты санаторый перасягнуў свой статус заводскай здраўніцы і фактычна стаў міжнароднай. Невыпадкова сёлета на яго базе праходзіў семінар ПРААН.
— «Пралеска» выконвае сваю асноўную функцыю па аздараўленні і лячэнні ў першую чаргу работнікаў і ветэранаў акцыянернага таварыства. Але займаемся і аздараўленнем грамадзян Беларусі і блізкага і далёкага замежжа, — сведчыць галоўны ўрач Віктар Кухарчык. — Супрацоўнічаем з фірмамі Масквы і Санкт-Пецярбурга. Яны прысылаюць расіян на адпачынак — іх цяпер да 40 працэнтаў сярод адпачывальнікаў. Але найбольш прадуктыўнае супрацоўніцтва — з беларускімі турфірмамі. І ў першую чаргу з фірмамі «Аўтаматызаваныя тэхналогіі турызму», «Топ-Тур» і іншымі. У іх інфармацыйна насычаныя сайты, з якіх можна пачарпнуць самую падрабязную інфармацыю пра наш санаторый. І пра колькасць дактароў, іх спецыялізацыю, час работы кабінетаў, пра віды і кошт працэдур, асаблівасці экскурсійнай інфраструктуры і гэтак далей.
І выніку санаторый вядомы не толькі ў нашай краіне. Некаторыя грамадзяне суседніх краін прыязджаюць да нас па 5-6 разоў, — працягвае Віктар Іванавіч. — З Падмаскоўя, з Ленінградскай вобласці, з Заходняй Сібіры прыязджаюць сем'ямі. Адпачываюць нават жыхары сонечнай Італіі, была група з Ізраіля. Геаграфія нашых гасцей самая разнастайная і даволі шырокая. Ім падабаецца высокапрафесійны медыцынскі калектыў, шырокі спектр і якасць медыцынскіх паслуг, перш за ўсё лячэбна-аздараўленчых працэдур. Тыя ж шматлікія ванны, крыятэрапія, міні-аквапарк і гэтак далей — усё дакладна распісана, няма чаргі на атрыманне працэдур.
І ўсім падабаецца беларуская кухня. У нас заказное меню, можна выбіраць на любы густ. Стараемся, каб ежа была разнастайнай, вітамінізаванай, якаснай. І даволі камфортныя ўмовы пражывання — у нумарах, якія аснашчаны тэлевізарамі, халадзільнікамі, печкамі СВЧ.
Варта таксама мець на ўвазе маляўнічасць кутка і прыродныя фактары — тое ж возера Лазурнае з лодкамі і катамаранамі, са сваім астраўком. А сілкуецца яно падземнымі ключамі. На беразе абсталяваны пляж з кабінамі для пераапранання і ценявымі навесамі. Пастаянна сочым за якасцю вады, бяруцца яе пробы, чысціцца дно. Гэта адзіны, бадай, такі абсталяваны ў раёне пляж.
На тэрыторыі «Пралескі» працуюць сучасная кавярня з жывой музыкай і ўласны магазін, ёсць інфакіёск і тэрмінал. Інакш — створаны ўсе ўмовы для таго, каб людзі атрымалі сапраўдную асалоду ад адпачынку.
Насычаная культурная праграма. У гэтым сэнсе дапамагаюць мясцовыя Дамы культуры Ваўкавыскага і суседніх раёнаў. Выступаюць фальклорныя калектывы. Напрыклад, учора цешыў слых ансамбль «Сваякі».
Мы ў сацыяльным плане абаронены, бо з'яўляемся адным з філіялаў акцыянернага таварыства, і адчуваем падтрымку яго кіраўніцтва і асабіста генеральнага дырэктара. Па ўсіх пытаннях. У прыватнасці, прадпрыемства дапамагае з фінансаваннем буйных закупак медыцынскага абсталявання. Гэта дазваляе нам планаваць у развіцці санаторыя новыя перспектыўныя кірункі.
Намесніка галоўнага ўрача санаторыя па медыцынскай частцы Валерыю Слівінскую просім расказаць, якія віды лячэння карыстаюцца большай папулярнасцю ў адпачывальнікаў.
— Імкнёмся, каб пацыенты санаторыя атрымлівалі максімальна насычаную праграму аздараўлення. І каб працэдуры суадносіліся з выкарыстаннем наяўных прыродных фактараў. Гэта не толькі насычанае водарам траў лясное паветра, не толькі гразе-і парафіналячэнне, але і выкарыстанне мінеральнай вады, фітачаёў, экстрактаў водарасцяў у выглядзе аплікацый на суставы, на вобласць пазваночніка. Плюс шырокае прымяненне сучасных апаратных метадаў. Іх база дастаткова шырокая: электрасвятлолячэнне, магніталячэнне, лазералячэнне, сухія вуглякіслыя ванны, баракамера, якая з'яўляецца адным з самых папулярных відаў карэкцыі здароўя. Вельмі падабаюцца пацыентам галатэрапія — наведванне салянога пакоя, інгаляцыя, міні-аквапарк — гэта для дзетак з пяці гадоў, якія адпачываюць тут з бацькамі. А таксама заняткі аквааэробікай, лячэнне ў спа-капсуле. І, безумоўна ж, класічны масаж. Па месцы жыхарства не ўсе лячэбныя ўстановы маюць водалячэбніцы, таму ў нас традыцыйна карыстаюцца папулярнасцю лячэбныя ванны, падводны душ-масаж, лячэбныя душы.
Існуе спецыяльны план па аздараўленні работнікаў акцыянернага таварыства і ветэранаў. Для пенсіянераў і ветэранаў таварыства прадугледжана спецыяльная льгота па аплаце пуцёвак, і мы гэтых людзей прымаем заўсёды, заўсёды ім рады. Як і ўсім астатнім сваім пацыентам.
Валерыя Уладзіміраўна знаёміць з водгукамі адпачывальнікаў. Як вядома, заўсёды самая патрабавальная публіка — гэта масквічы. Вось што напісалі жыхары Масквы Н.І. Калеснік і П.С. Дзёмчын.
— Усё вельмі добра. Медперсанал і наогул калектыў санаторыя цудоўна спраўляюцца са сваімі абавязкамі.
— Дзякуй за адпачынак, мяне ўсё задавальняе. Усё на вышэйшым узроўні. Так трымаць.
Выказваюцца падзякі канкрэтным дактарам і сёстрам, культарганізатару, масажысткам.
Давайце і мы назавём тых, хто клапоціцца пра здароўе людзей. Урач-кардыёлаг Алена Ношчык, урач-тэрапеўт Ала Каліноўская, урач-неўролаг Таццяна Клінчук, урач-стаматолаг Таццяна Дзёміна, урач ультрагукавой дыягностыкі (і яна ж урач-тэрапеўт) Валянціна Данешчык. Усе — урачы першай катэгорыі.
Карацей, лечаць у «Пралесцы» па першай катэгорыі.
Публікацыю падрыхтаваў Уладзімір Хількевіч.
Здымкі Яўгена Пясецкага
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.