Як у сталіцы змагаліся з пешаходамі-парушальнікамі і лавілі рабавальнікаў
18 жніўня сталічная міліцыя адзначыць сваё 70-годдзе. Напярэдадні святкавання сваімі ўспамінамі аб працы ў сталічных праваахоўных органах са «Звяздой» шчыра падзяліўся Віктар ПІСКАРОЎ, былы міністр унутраных спраў БССР, які да таго ж на працягу 12 гадоў узначальваў Упраўленне ўнутраных спраў Мінскага гарвыканкама.
— Віктар Аляксеевіч, ці добра памятаеце тыя часы, калі ўпершыню трапілі ў Мінск?
— Гэта адбылося ў сярэдзіне 50-х, а пачалася мая кар'ера ў міліцыі яшчэ на Палессі. У 1951 годзе мяне, камсамольца, накіравалі на службу і прызначылі памочнікам начальніка палітчасці ўпраўлення міліцыі Палескай вобласці. У той час праваахоўныя органы былі ўкамплектаваны былымі франтавікамі, партызанамі. Зразумела, без вопыту і адукацыі, — але мелі яны вялікую волю. Напрыканцы 50-х большасць супрацоўнікаў міліцыі ўсё ж такі атрымала сярэднюю адукацыю. Аддзяленні сталічнай міліцыі спачатку пераважна месціліся ў драўляных бараках, а ўжо пасля былі пераведзены ў больш камфортныя памяшканні.
Калі да нас прыязджалі журналісты з ЗША, я ім прыводзіў статыстыку: з 1962 па 1982 год насельніцтва сталіцы Беларусі павялічылася ў два разы, а злачыннасць зменшылася ў тры разы! Хаця, як усе добра ведаюць, рост злачыннасці абумоўлены ростам насельніцтва. У той час, дзякуючы намаганням Кірыла Мазурава, Панцеляймона Панамарэнкі, Пятра Машэрава атрымалася ператварыць Беларусь у адну з самых развітых савецкіх рэспублік і ў прамысловасці, і ў сельскай гаспадарцы.
— Цікава, а як у той час жылося міліцыянерам?
— Заробак у міліцыі ніколі не быў высокім. Аднак былі пэўныя льготы. Напрыклад, міліцыянеры аплочвалі толькі 50 працэнтаў ад усіх камунальных плацяжоў. Таксама нашы супрацоўнікі мелі права на бясплатныя пуцёўкі на адпачынак, бясплатны праезд у грамадскім транспарце. Дарога да санаторыя, між іншым, таксама аплочвалася. З часам льготы ў міліцыянераў зніклі, а заробак так і застаўся ранейшым.
— Вы, напэўна, добра памятаеце, што было бічом мінскай злачыннасці?
— Злачыннасць у Мінску характарызавалася крадзяжамі. Яны складалі 70-75 працэнтаў ад агульнай колькасці злачынстваў. На ўсё жыццё ў памяці засталася адна гісторыя. Аднойчы ў горадзе пайшла серыя крадзяжоў матэрыяльных каштоўнасцяў. Кожную пятніцу мы атрымлівалі па два-тры рабаванні! Мы паразважалі, прыкінулі, што дзейнічаць можа шайка, якая ў выхадныя з'язджае і збывае нарабаванае. Мяне нават пераканалі паставіць пост каля вялікага дома на вуліцы Прытыцкага, але нават з ім мы ўсё роўна былі вымушаны зафіксаваць яшчэ адзін крадзеж. Урэшце іх затрымалі — у рэстаране «Патсдам». Злачынцамі аказаліся хлопцы з даволі гаваркімі прозвішчамі — Чалпанаў і Варганаў.
Што тычыцца забойстваў, большасць з іх мелі бытавую глебу. Таксама быў пэўны перыяд, калі паміж людзьмі актыўна распаўсюджвалася вера ў пагалоскі. У раёне камвольнага камбіната аднойчы судзілі злачынцу за згвалтаванне дзяўчыны. А па горадзе пайшлі чуткі пра яго вызваленне. У выніку натоўп акружыў суд, крычаў, завязалася бойка, і мы ледзь паспелі вырвацца адтуль і вывезці асуджанага.
— А ці былі ў сталіцы раёны, якія вызначаліся высокім узроўнем злачыннасці?
— Такіх не было. У нас наогул па ўсім горадзе быў вельмі добры ўзровень узаемадзеяння жыхароў з міліцыяй.
А вось чым далей мы адыходзілі ад вайны, тым больш яскрава мяняўся тып злачынцы. У сталіцы ў савецкія часы былі і крадзяжы, і забойствы, і хуліганствы. Не было толькі нарказлачынстваў. Неяк з прапановай навесці парадак з пешаходамі на дарогах сталіцы да мяне звярнуўся Мікалай Слюнькоў, тагачасны першы сакратар Мінскага гаркама партыі. На асабліва «баявых» пераходах мы выстаўлялі да 10 інспектараў! Штрафавалі за год па паўмільёна чалавек. Памятаю, як тэлефануе мне адзін з міністраў і ледзь не крычыць у слухаўку: «Маю жонку аштрафавалі!». А я яму адказваю: «Няхай дзякуе Богу, што жывая засталася! Маю тройчы штрафавалі. Няхай ходзіць на зялёны, а стаіць на чырвоны. Больш мне не звані!» А цяпер мне прыемна ад таго, што ідзеш па вуліцы, людзі паводзяць сябе дысцыплінавана і прапускаюць машыны. А калі нехта і перабягае дарогу, дык гэта хутчэй выключэнне з правілаў.
— Віктар Аляксеевіч, у агульным плане Мінск быў крымінагенным горадам?
— Не! І па супрацоўніках, і па сітуацыі наш горад быў узорным у маштабе Міністэрства ўнутраных спраў СССР. Па барацьбе са злачыннасцю нам атрымалася зрабіць яго адным з лепшых у Саюзе, што пацвярджалі міністры Мікалай Шчолакаў, Віталь Федарчук, Аляксандр Уласаў, якія наведвалі сталіцу.
— На якія рэчы вы рабілі ўпор у рабоце ў міліцыі?
— На непасрэднай працы з супрацоўнікамі. Я імкнуўся, каб кожны начальнік клапаціўся пра сваіх падначаленых, шукаў для службы людзей, якія ў цяжкіх абставінах здолеюць «захаваць твар». Пры мне з гарадской міліцыі выйшлі больш за 20 генералаў! Гэта цэлая плеяда людзей, якія ўкладвалі сваю душу ў агульную справу. Але пытанне камплектацыі як стаяла раней, так і стаіць сёння перад намі. На жаль, не так шмат людзей, у тым ліку і ў міліцыі, якія глыбока разумеюць цяжкасць і адказнасць службы міліцыянера. Раней як адбіралі ў праваахоўныя органы? Разважалі: «Гэты не мае судзімасцяў, у міліцыю не дастаўляўся, а значыць — падыходзіць»! Але гэта ўсё фармальна, знешнія фактары, а іх не толькі недастаткова, яны наогул не характарызуюць чалавека, яго здольнасць служыць у міліцыі. Тым больш міліцыя часта мае справу з так званымі адкідамі грамадства: хуліганамі, рабаўнікамі, наркаманамі... І вельмі важна міліцыянеру вытрымаць перад спакусай, праявіць характар і паўплываць на сітуацыю. Любы супрацоўнік міліцыі павінен мець багаты жыццёвы вопыт. У іншым выпадку што малады ўчастковы здолее зрабіць для людзей? Так, тэарэтычна ён будзе падрыхтаваны, але ж гэта не ўсё... Што тычыцца камплектавання прававых класаў, неабходна бачыць не толькі жаданне самога вучня, а ўяўляць сабе яго ўнутраную гатоўнасць да такой адказнай працы. Бо ёсць тыя рысы характару, якія закладваюцца нам толькі татам і мамай.
Тарас ШЧЫРЫ
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.