Муж прадпрымальніцы зможа ўзяць водпуск па доглядзе дзіцяці да 3 гадоў, а спартсмена можна будзе звольніць пры недасягненні спартыўных вынікаў
25 ліпеня ўступіць у сілу Закон «Аб унясенні змяненняў і дапаўненняў у Працоўны кодэкс Рэспублікі Беларусь». «Звязда» паспрабавала разабрацца ў асноўных навацыях, якія нас чакаюць.
Новаўвядзенні, што тычацца працоўных правоў і гарантый работнікам
Наймальніку пры размяшчэнні аб'явы аб працаўладкаванні забаронена ўказваць узрост і месца жыхарства ў якасці крытэрыю для адбору работніка. Калі работнік лічыць, што адмова ў прыёме на працу або звальненне былі абумоўлены менавіта гэтымі абставінамі, напрыклад, калі чалавека звальняюць з працы ці не прымаюць на працу па прычыне дасягнення пенсійнага ўзросту, ён мае права адстойваць свае інтарэсы ў судзе.
Пашырана катэгорыя асоб, якія маюць права на водпуск па доглядзе дзіцяці да дасягнення ім трох гадоў.
Закон дае такое права працуючаму бацьку або іншаму сваяку не толькі замест маці, якая працуе па працоўным дагаворы, але і калі яна з'яўляецца індывідуальным прадпрымальнікам, прыватным натарыусам, адвакатам, творчым работнікам, ажыццяўляе рамесніцкую дзейнасць, дзейнасць у сферы аграэкатурызму. Права на перадачу водпуску ў гэтых жанчын узнікае, калі іх дзейнасць не прыпыняецца ў сувязі з доглядам дзіцяці да трох гадоў. Пры гэтым пры наяўнасці ў сям'і дваіх і больш дзяцей ва ўзросце да трох гадоў водпуск прадастаўляецца адной асобе.
Водпуск па доглядзе дзіцяці да дасягнення ім трох гадоў перарываецца ў выпадку прадастаўлення маці водпуску па цяжарнасці і родах і працягваецца па яго заканчэнні.
Графік працоўных водпускаў зацвярджаецца наймальнікам і ўзгадняецца прафсаюзам, калі гэта прадугледжана калектыўным дагаворам. Пры складанні графіка водпускаў наймальнік павінен улічваць меркаванне работніка, калі гэта не перашкаджае нармальнай дзейнасці арганізацыі, а таксама рэалізацыі права на адпачынак іншых работнікаў.
Работнікам, якія атрымліваюць па накіраванні наймальніка сярэднюю спецыяльную або вышэйшую адукацыю, незалежна ад таго, якая яна па ліку — першая або другая — прадастаўляецца аплачаны вучэбны водпуск.
Запаўняць камандзіровачныя пасведчанні будзе неабавязкова, за выключэннем выпадкаў, калі камандзіровачнае пасведчанне з'яўляецца дакументам, які гарантуе дадатковыя правы (гэта тычыцца супрацоўнікаў сістэмы МУС, КДБ, пракуратуры і інш.). Вырашаць, выпісваць камандзіроўку работніку ці не, будзе сам наймальнік.
Вітаюцца гнуткія формы занятасці
Індывідуальныя прадпрымальнікі або мікраарганізацыі змогуць заключаць з работнікамі па пагадненні бакоў тэрміновы працоўны дагавор без уліку характару працы, якая прадастаўляецца, ці ўмоў яе выканання. Іншымі словамі, можна будзе заключаць тэрміновы працоўны дагавор для выканання работы пастаяннага характару. Гэта дасць малому бізнесу магчымасць мабільна рэагаваць на змены эканамічнай сітуацыі на рынку працы. Да таго ж, гэтая норма стане стымулам да таго, каб індывідуальныя прадпрымальнікі і мікраарганізацыі афармлялі адносіны з работнікамі на законных падставах, забяспечваючы тым самым ім сацыяльна-працоўныя гарантыі.
Штодзённая працягласць працоўнага часу ва ўліковым перыядзе не павінна перавышаць 12 гадзін у сярэднім за ўліковы перыяд (квартал, паўгоддзе, год). Гэта азначае, што працу работнікаў можна будзе планаваць у асобныя дні працягласцю больш за 12 гадзін, а ў асобныя дні — менш за 12 гадзін. Пры гэтым павінна быць выканана абмежаванне па працягласці рабочага часу за ўліковы перыяд — у сярэднім не больш за 12 гадзін.
Максімальная норма звышурочнай працы павялічана да 180 гадзін (гэта на 60 гадзін больш за норму, што дзейнічае зараз). Таксама вызначана, што звышурочныя работы для кожнага работніка не павінны перавышаць 10 гадзін у працоўны тыдзень, а працягласць штодзённай працы з улікам звышурочных работ — 12 гадзін. Пры гэтым прыцягненне да звышурочных работ па-ранейшаму павінна ажыццяўляцца на добраахвотнай аснове, акрамя выключных выпадкаў, калі работнікі могуць прыцягвацца да гэтых работ без іх згоды.
Работа па сумяшчальніцтве
Работнік зможа заключаць працоўныя дагаворы аб працы па сумяшчальніцтве з неабмежаванай колькасцю наймальнікаў. Пры гэтым пры прыёме работніка па сумяшчальніцтве (як пры ўнутраным, так і пры знешнім) з ім заключаецца асобны працоўны дагавор.
Будзе дазволена працаваць па сумяшчальніцтве на працягу поўнай нормы працоўнага часу работнікам, якія знаходзяцца ў водпусках без захавання або з частковым захаваннем зарплаты, прадастаўленых па ініцыятыве наймальніка.
Здымаецца забарона на працу па сумяшчальніцтве для кіраўнікоў камерцыйных арганізацый прыватнай формы ўласнасці. Але захоўваецца абмежаванне ў працы па сумяшчальніцтве для кіраўнікоў дзяржарганізацый, а таксама кіраўнікоў недзяржаўных арганізацый, у статутным фондзе якіх доля дзяржуласнасці складае не менш за 50% (гэта абмежаванне вызначана законам «Аб барацьбе з карупцыяй»).
Кампенсацыі за працу ў звышурочны час, у дзяржаўныя святы, святочныя і выхадныя дні
За працу ў звышурочны час, у дзяржаўныя святы, святочныя і выхадныя дні звыш зарплаты, налічанай за названы час, робіцца даплата, якая не можа быць ніжэйшай за здзельныя расцэнкі для работнікаў са здзельнай аплатай працы, ніжэйшай за гадзінныя тарыфныя стаўкі (аклады) — для работнікаў з пагадзіннай аплатай працы, а таксама для работнікаў, якія атрымліваюць службовыя аклады. Канкрэтны памер даплаты вызначаецца працоўным дагаворам і (або) лакальным нарматыўным прававым актам. Памер даплаты ў бюджэтных арганізацыях вызначаецца ўрадам або ўпаўнаважаным ім органам.
Праца на даму
Работнік-надомнік зможа працаваць не толькі на даму, але і ў любым іншым памяшканні па яго выбару, у тым ліку ў іншай мясцовасці — па-за месцам размяшчэння наймальніка. Надомнікам можна будзе працаваць як на сваім абсталяванні і выкарыстоўваць свае інструменты, матэрыялы, так і абсталяванне, інструменты, матэрыялы наймальніка.
У дачыненні да такіх работнікаў павінны выконвацца ўсе патрабаванні працоўнага заканадаўства (у прыватнасці, з імі павінен заключацца пісьмовы працоўны дагавор). Гэта забяспечыць работніку гарантыі па своечасовай аплаце працы, прадастаўленні водпуску, захаванню заработнай платы за перыяд часовай непрацаздольнасці.
Працоўныя адносіны ў прафесійным спорце
З'явіліся дадатковыя падставы для скасавання працоўнага дагавора са спартсменам: спартыўная дыскваліфікацыя; выкарыстанне допінгу ў спорце; недасягненне пэўных спартыўных вынікаў пры ўмове, што дасягненне гэтых вынікаў было прадугледжана працоўным дагаворам і спартсмену былі створаны наймальнікам неабходныя ўмовы для іх дасягнення.
У працоўным дагаворы замацаваны абавязак спартсмена, трэнера выплаціць наймальніку грашовую кампенсацыю ў выпадку скасавання працоўнага дагавора па прычыне недасягнення вынікаў, прадугледжаных працоўным дагаворам (калі наймальнік стварыў спартсмену неабходныя для гэтага ўмовы).
Скасаванне працоўных дагавораў з іншымі катэгорыямі работнікаў
Стане магчымым спыненне працоўнага дагавора па абставінах, не залежных ад волі бакоў. Гэта датычыцца выпадкаў, калі на падставе заканадаўства ўзнікаюць абмежаванні па выкананні работнікам яго працоўных функцый (напрыклад, пазбаўленне вадзіцельскіх правоў работніка, які працуе кіроўцам).
Дзяржаўная службовая асоба будзе вызваляцца ад займанай пасады ў выпадку непадпісання або парушэння ім абавязацельстваў па выкананні абмежаванняў, устаноўленых законам «Аб барацьбе з карупцыяй». Так, згодна з арт. 17 гэтага закона дзяржаўная службовая асоба не мае права, у прыватнасці, займацца прадпрымальніцкай дзейнасцю асабіста або праз давераных асоб, аказваць садзейнічанне блізкім сваякам у ажыццяўленні прадпрымальніцкай дзейнасці, выкарыстоўваючы службовае становішча, а таксама выконваць іншую аплатную работу, не звязаную з выкананнем працоўных абавязкаў па месцы асноўнай працы (акрамя выкладчыцкай, навуковай, культурнай, творчай дзейнасці і медыцынскай практыкі).
Святлана Бусько.
Канцэрт для дзяцей і моладзі, пластычны спектакль Ягора Дружыніна і «Рок-панарама».
Выбар саджанца для садавода — той момант, значнасць якога складана пераацаніць.
Актрыса НАДТ імя М. Горкага — пра шлях да сцэны і натхненне.
Тата і мама — два самыя важныя чалавекі ў жыцці кожнага дзіцяці.