Прадстаўнікі Мексікі раней не выступалі на конкурсе маладых выканаўцаў. Тым не менш спявак, які прыехаў на «Славянскі базар» з гэтай краіны, набраў балаў больш, чым яго канкурэнты.
Учора падчас цырымоніі ўзнагароджвання абаяльны Радрыга дэ ла Кадэна (на фота) атрымаў Гран-пры (20 тысяч долараў). І прэмію (15 тысяч долараў) журы прысудзіла спеваку з Малдовы Віталіе Негруца. ІІ прэмію (10 тысяч долараў) — падзялілі ўкраінка Вераніка Дораш і выканаўца з Харватыі, які выступае пад творчым псеўданімам Дзіна; ІІІ прэмію (5 тысяч долараў) — Дыяна Голбі з Ізраіля і Мархаба Сабіева з Казахстана. Прадстаўнік Беларусі, 23‑гадовы Артур Міхайлаў, стаў уладальнікам спецыяльнага прыза Парламенцкага Сходу Беларусі і Расіі. Такую ж узнагароду атрымаў і расійскі выканаўца Злат, у якога, дарэчы, учора нарадзілася дачка.
Безумоўна, талент з далёкай Мексікі годны «галоўнага слана». Дзве песні, выкананыя ў фінале, — руская «Калинка» і мексіканскі хіт «Besame Mucho», пакарылі як журы, так і гледачоў.
Пасля выканання «Besame Mucho» Радрыга на сцэне амфітэатра, адказваючы на пытанні вядучых конкурснай праграмы, сказаў, што ён, хоць знешне і падобны да Санча Панса, але з душой Дон Кіхота.
У свае 26 гадоў талент з Мексікі дасягнуў многага. Ён — спявак, кампазітар, аранжыроўшчык, музычны прадзюсар, тэле-і радыёвядучы. Восем гадоў быў арт-дырэктарам тэатра «Esperanza Іrіs». Да таго ж ён яшчэ і мастацкі кіраўнік і ўладальнік забаўляльнага клуба «La Cueva». Піша музыку і вершы. Дзякуючы супрацоўніцтву з радыёканаламі Мексікі спрыяе захаванню і распаўсюджванню музычнага жанру балеро, а таксама рамантычнай музыкі залатога стагоддзя.
Выступаў на фестывальных і конкурсных пляцоўках краін Амерыкі і Еўропы. Радрыга — двойчы уладальнік «Залатога мікрафона» Нацыянальнай асацыяцыі радыёвяшчання Мексікі. Па версіі выдання «The Mexіcan Sun» прызнаны «Персонай года-2010». Мае медаль урада Эквадора за артыстызм, медаль Аўгустына Лара і Нацыянальную ўзнагароду радыёвяшчання Мексікі. Запісаў аж сем студыйных альбомаў.
Паводле слоў Кіма Брэйтбурга, старшыні журы конкурсу, заслужанага дзеяча мастацтваў Расіі, кампазітара, прадзюсара, каб перамагчы ў конкурсе, трэба не толькі валодаць добрым голасам:
— У мяне ёсць сваё меркаванне, стаўленне да канкурсантаў. Я ацэньваю іх па некалькіх параметрах: не толькі за голас, але і за артыстызм, тэмперамент. Конкурсаў шмат у свеце праводзіцца, але адзінкі з тых, хто атрымаў нейкія месцы, прызы, дыпломы, становяцца сапраўднымі артыстамі. І я лічу, што задача журы, асабліва на такіх буйных міжнародных фестывалях, — дапамагчы рэалізавацца найбольш таленавітым, перспектыўным. Конкурс у нас не спартыўны. І мне не важна, якую ноту сёння ўдала ўзяў канкурсант, наколькі гучна выканаў. А вось ці здолеў ён зрабіць уздзеянне на мяне на эмацыянальным узроўні, калі выступаў на сцэне, — іншае пытанне. Калі не зачапіў, не магу яму паставіць высокую ацэнку, для мяне пустое месца ўсе яго вакальныя даныя. Галоўнае — сукупнасць якасцяў: інтэлект, высокая культура (адразу відаць па чалавеку, хто перад намі, ці знайшоў кантакт з залай), уменне мець зносіны, абаянне, адкрытасць.
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».