Вось што 95 гадоў дапамагае знаходзіць Магілёўская грамадская арганізацыя інвалідаў па зроку
Калі сустрэнеш гэтую жанчыну на вуліцы, ніколі не падумаеш, што яна яшчэ год таму адчувала сябе самым нешчаслівым на зямлі чалавекам. Прыгожая, падцягнутая, з прычоскай. Але гэта толькі звонку. Па начах ёй яшчэ сняцца кашмары аб тым, што нядаўна адбылося ў яе жыцці. З'явіліся праблемы са зрокам, а лячэнне, на якое яна ўскладала вялікія спадзяванні, аказалася няўдалым. Пасля аперацыі яна цалкам страціла вока, якое дагэтуль дрэнна, але ж бачыла. Цяпер на яго месцы пластмасавая накладка, пад якой жанчына хавае жахлівую рану.
«Сярод тых, хто бачыць, ты ўжо чужы»
Людміла Марчанка кажа, што тыя людзі, якія зрабілі яе інвалідам, цалкам адмовілі сваю віну. Яна на іх не крыўдуе, але тады здавалася, што ўвесь свет адвярнуўся ад яе. Жанчына і цяпер плача, калі ўспамінае гэтую сумную гісторыю. Ёй, вядома, цяжка. Але ўжо не так, як было тады. Проста пашчасціла знайсці тых, хто дапамог перажыць боль.
— Я і раней чула, што ёсць арганізацыя, якая курыруе сляпых, але, калі самой спатрэбілася дапамога, не ведала, дзе яна знаходзіцца і як дакладна называецца, — кажа яна. — Патэлефанавала ў даведку, і мне падказалі нумар. Але набраць яго адважылася не адразу. Вельмі баялася страціць апошнюю надзею. І толькі тады, калі зусім адчаялася, зняла тэлефонную трубку. Ужо праз паўгадзіны пасля майго «крыку аб дапамозе» пачуўся званок у дзверы...
Старшыня Магілёўскай абласной арганізацыі грамадскага аб'яднання «БелТІЗ» Наталля Панцялеева — першая, хто падтрымаў яе і дапамог вярнуць упэўненасць у сабе. З гэтай сустрэчы, па сутнасці, і пачалося новае жыццё Людмілы Марчанкі. З тых знаёмых, каго Людміла ведала раней, засталіся адзінкі. І для такога публічнага чалавека, як яна (у мінулым выкладчыца аднаго з магілёўскіх ВНУ), страта была вельмі адчувальная. Яна і не ведала, што паміж відушчымі людзьмі і тымі, хто страціў зрок, такая прорва.
— Стан дарослага чалавека, які адчуваў сябе самастойнай асобай, а потым у адно імгненне стаў чымсьці накшталт бездапаможнага дзіцяці, нельга ўявіць так востра да таго моманту, пакуль сам у ім не апынешся, — дзеліцца яна. — Паспрабуйце завязаць сабе вочы і займацца звыклымі справамі. Нават даведацца, колькі гадзін, без радыё немагчыма. Калі мне расказалі, колькі існуе разумных рэчаў для сляпых людзей, я не пераставала здзіўляцца. Як яны потым аблегчылі мне жыццё! Уявіце, нават існуе градуснік, які размаўляе. Пачуццё дыстанцыі са звычайным светам, у якім я жыла раней, на жаль, засталося, але цяпер я не адчуваю сябе нікчэмнай. Займаюся грамадскай працай, рукадзеллем.
Тыя праблемы, з якімі сутыкнулася, хвалююць шмат каго. Але па сабе ведаю, як цяжка зрабіць першы крок і вынесці самае патаемнае на грамадскае абмеркаванне. Трэба праявіць да сябе нейкую жорсткасць, прызнаць: сярод тых, хто бачыць, ты ўжо чужы. Трэба шукаць сабе падобных і мяняць свае зносіны ў соцыуме. Калі ведаеш, што ты не адзін, адчуваеш, як спадае напруга. І ты супакойваешся.
«Дыплом атрымала, але зрок пагоршыўся»
Але хапае людзей, якія яшчэ не знайшлі сваіх аднадумцаў. Сёння ў арганізацыі 1600 чалавек. Але іх значна больш, лічыць яе кіраўнік. Асабліва шмат тых, хто страціў зрок у сталым узросце.
— Для іх гэта самы страшны прысуд, — кажа Наталля Панцялеева. — Яны саромеюцца шукаць дапамогі, чапляюцца за нейкія зусім не зразумелыя прычыны. Гэтыя комплексы перашкаджаюць жыць на поўную моц. Штосьці не дае падзяліцца сваім горам — ім прасцей схавацца ў нейкую абалонку. Такія людзі страчваюць веру ў сябе, становяцца азлобленымі і агрэсіўнымі.
Чалавек — істота сацыяльная, таму застацца сам-насам са сваёй праблемай заўсёды страшна. Са стратай зроку з'яўляецца шмат забарон, папярэджанняў, складанасцяў. «Я сама ў дзяцінстве вельмі саромелася таго, што бачу дрэнна, — успамінае Наталля Панцялеева. — Вельмі баялася, што гэта перашкодзіць мне паступіць у тэхналагічны інстытут, і я нават папрасіла сяброўку схадзіць замест мяне да акуліста. Дыплом я атрымала, але зрок яшчэ больш пагоршыўся. Трэба было рабіць шмат чарцяжоў, а гэта вялікая нагрузка на вочы».
Насамрэч, спецыяльнасцяў, якія маюць магчымасць атрымаць сляпыя (асабліва тыя, хто не бачыць зусім), вельмі мала. Найбольш запатрабаваныя з іх — музыканты і масажысты. Але ж не ўсім Бог дае талент. І як тады жыць далей, чым зарабляць на жыццё?
— Вось Паша Міхайлаў з Клімавічаў марыць аб радыётэхнічнай ВНУ, хоча стаць праграмістам, — кажа Наталля Панцялеева. — Не хочацца расчароўваць хлопца, але ж яго туды ніхто не возьме. Там розныя мікрасхемы, чарцяжы, а для чалавека з праблемным зрокам — гэта прысуд свайму здароўю. Адна дзяўчына з Клімавічаў, нягледзячы на тое, што ў яе дрэнны зрок, насуперак усяму паступіла ў медыцынскую ВНУ, але праз год вымушана была сысці. Падала дакументы ў медыцынскі каледж на фармацэўта, але праз паўтара года забрала іх і адтуль. Звярнулася да нас толькі тады, калі амаль цалкам страціла зрок.
У канцы навучальнага года арганізацыя праз дзіцячыя паліклінікі вобласці шукала маладых людзей, якія маюць праблемы са зрокам. Каля 30 паштовак было накіравана па розных адрасах з прапановай звяртацца па дапамогу. Асабліва запатрабаванай аказалася інфармацыя па навучальных установах, дзе створаны ўмовы для сляпых. Напрыклад, калі ёсць музычныя здольнасці, можна адправіцца ў Курск — там знаходзіцца спецыялізаванае вучылішча для невідушчых. Усім ахвотным арганізацыя дапамагае зрабіць запыты ва ўстановы адукацыі, дае карысныя парады.
Не адмаўляюць тут і тым, хто шукае сабе працу. Адна дзяўчынка са Шклова такім чынам працаўладкавалася адміністратарам у Мінску. Калі няма ніякай спецыяльнасці, падабраць нешта будзе цяжэй.
Вельмі вялікія спадзяванні кіраўніцтва арганізацыі ўскладае на тое, што ў Магілёве на базе эканамічнага прафесійна-тэхнічнага каледжа будзе створана група аператараў ПЭВМ для зусім невідушчых. Дзякуючы спецыяльным праграмам сёння можна асвоіць камп'ютар, нават не маючы зроку. Як высветлілася, дырэктар адукацыйнай установы Алег Бахановіч не супраць такога супрацоўніцтва. Справа добрая: гэта дасць магчымасць невідушчым падлеткам прыносіць карысць грамадству ў якасці дыспетчараў з веданнем асноў ЭВМ. Але пакуль гэта будзе пілотны праект. Каб рыхтаваць такіх спецыялістаў, трэба, каб рашэнне было адобрана на дзяржаўным узроўні і ўзгоднена паміж рознымі зацікаўленымі міністэрствамі. Інакш у маладых спецыялістаў могуць узнікнуць праблемы з працаўладкаваннем.
«Можна наракаць на ўвесь свет, але што зменіцца?..»
На жаль, праблемы сляпых для відушчых не заўсёды зразумелы. Дакладней, некаторыя іх вельмі не жадаюць заўважаць. Колькі разоў арганізацыя звярталася да кіраўніцтва МДУ імя Куляшова, каб зрабілі разметку на прыступках, але воз і дагэтуль там. І гэта пры тым, што сярод студэнтаў ёсць і зусім невідушчыя. Наталля Панцялеева звярталіся нават у Міністэрства адукацыі, каб паспрыялі. Але год прайшоў — і ніякіх зрухаў.
Здараюцца нават кур'ёзы. На чыгуначным вакзале доўга адмаўляліся ад спецыяльнай разметкі, матывуючы тым, што будынак — архітэктурны помнік. Але калі мінскае кіраўніцтва параіла прыслухацца да зваротаў, жоўтыя палоскі на прыступках хуценька з'явіліся.
Нязручнасцяў у жыцці хапае, але ніколі не трэба апускаць рукі, лічаць у арганізацыі. Можна бясконца наракаць на ўвесь свет і плакаць аб сваім няўдалым лёсе, можна вінаваціць у сваіх няшчасцях усіх і ўся. Але што ад гэтага зменіцца? Жыць у цемры, вядома, вельмі цяжка, але можна. Захапляюся, іншага слова тут не падабраць, маладым хлопцам з Магілёва Паўлам Паўлавым, які дзеля сваёй мэты — стаць святаром — не пабаяўся паехаць у далёкі ўкраінскі горад Пачаева і паступіць у семінарыю. Сёння ён спасцігае багаслоўскую навуку ў Кіеўскай духоўнай акадэміі. Ці не прыклад для пераймання Саша Зорка з Касцюковічаў, які скончыў Мінскі лінгвістычны ўніверсітэт, а потым знайшоў сябе ў спорце і стаў паралімпійцам? І тое, што існуе такая грамадская арганізацыя, якая можа дапамагчы і падказаць шлях у будучыню, вельмі каштоўна. Сёлета яна адзначае сваё 95-годдзе. І тых, хто ёй у гэтыя дні кажа «дзякуй», вельмі шмат.
— Мы адкрыты для ўсіх, — запэўнівае Наталля Панцялеева. — Дапамагаем атрымаць адукацыю, знайсці работу, навучыцца нейкаму рамяству. А яшчэ даём кансультацыі, парады, сродкі рэабілітацыі, усталёўваем спецыяльныя праграмы на камп'ютар, забяспечваем сродкамі для агучвання літаратуры. Ведаем, як цяжка чалавеку, які страціў зрок, атрымаць паўнавартасную медыцынскую кансультацыю. Не адчайвайцеся — мы дапаможам, падкажам. Сёння вельмі шмат выпадкаў, калі чалавеку даюць трэцюю, працоўную, групу інваліднасці, хаця яму, па сутнасці, проціпаказана цяжкая праца. Наймальнікі не зацікаўлены ў такіх супрацоўніках і вельмі часта проста адмаўляюць ім. Мы ведаем, чым дапамагчы і гэтым людзям. Апошнім часам стала павялічвацца колькасць маладых людзей, якія маюць праблемы са зрокам, не кажучы пра пенсіянераў. Яны прыстасоўваюцца да жыцця, баяцца нават сабе прызнацца, што ў іх праблемы. А так быць не павінна. Прыходзьце да нас. Мы не проста супакоім вас, але і дапаможам вярнуцца да паўнацэннага жыцця.
Нэлі ЗІГУЛЯ. Фота аўтара.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».