___________________________________________________________________________
Выстаўка аднаго дня кітайскага мастака У Цзіньляна прайшла ў Нацыянальным мастацкім музеі. Ва ўрачыстай цырымоніі адкрыцця ўзялі ўдзел міністр культуры Беларусі Барыс Святлоў, Надзвычайны і Паўнамоцны Пасол КНР у Рэспубліцы Беларусь Цуй Цымін, знакаміты калекцыянер Ліу Гуанцын, які арганізаваў 11 выставак кітайскіх мастакоў у Беларусі, прадстаўнікі міністэрстваў і ведамстваў.
У Цзіньлян спалучае ў сваіх творах традыцыі старажытнага і сучаснага мастацтва, піша ў стылі “малюнкі вадой і тушшу” (разнавіднасць больш агульнага стылю “гохуа”), працуе ў жанрах “горы і вада”, “кветкі і птушкі”, “бамбук”. Кітайскі мастак шырокавядомы як “Кароль птушак”, таму што выдатна іх малюе: яны сімвалізуюць сямейнае шчасце і радасць.
Кітайскі нацыянальны жывапіс “гохуа” бярэ свой пачатак у глыбокай старажытнасці. Па матэрыяле, тэхніцы і мастацкіх сродках ён адрозніваецца ад еўрапейскага. Выконваецца пры дапамозе пэндзля тушшу і фарбамі на спецыяльнай паперы або на шоўку. Адлюстраванні ствараюцца з дапамогай лінейнага малюнка, у той час як у еўрапейскім жывапісе — пры дапамозе аб’ёмаў і форм, колеру і святлаценю. Пейзаж у “гохуа” скіраваны на перадачу настрою, пры гэтым асаблівую ролю адыгрывае кампазіцыя. Жанры “горы і вада”, “птушкі і кветкі” — найбольш папулярныя ў кітайскім жывапісе.
У традыцыйным пейзажы Кітая горы лічыліся ўвасабленнем мужчынскага светлага пачатку “ян”, а вада — жаночага цёмнага пачатку “інь”, з узаемадзеяння якіх, паводле старажытных паданняў, узнікае сусвет. Горы — косці зямлі, патокі вады — вены, кроў, што пульсуе і нясе жыццё і рух.
У кітайскім жывапісе злучаюцца свет вады, свет каменя і свет дрэва. Іх аб'ядноўвае асаблівая жывапісная арганізацыя часу і прасторы, якая з’яўляецца адлюстраваннем чацвёртага, найважнейшага свету. Да свету вады далучаюцца і аблокі — “нябесныя горы”. Свет каменя спускае нас з неба на зямлю, бо камяні таксама ўтрымліваюць нябесны пачатак. Камяні лічыліся “касцяком Неба і Зямлі, манастыром духаў”. Жанр “кветкі і птушкі” таксама традыцыя ў мастацтве Кітая. Мастакі злучаюць густую туш з лёгкай, цёмную фарбу са светлай, і з-пад іх пэндзляў выходзяць чарадзейныя абрысы птушак і кветак.
У Цзіньлян скончыў Цэнтральную акадэмію мастацтваў, праходзіў навучанне ў вядомых кітайскіх каліграфаў. Член Кітайскай асацыяцыі дзеячаў мастацтва, член Кітайскай асацыяцыі каліграфаў, член Асацыяцыі вядомых людзей КНР, старшыня Саюза кітайскіх і замежных дзеячаў мастацтва. Неаднаразова ўдзельнічаў у выстаўках у Кітаі і за мяжой, яго працы ўручаліся ў якасці падарункаў кітайскімі кіраўнікамі кіраўнікам дзяржаў і важным палітычным дзеячам замежных краін, у тым ліку прэзідэнтам і шматлікім кіраўнікам ЗША, Вялікабрытаніі, Карэі, Зімбабве, Францыі, Германіі і г. д. Творы мастака ўпрыгожваюць дзяржаўную рэзідэнцыю КНР “Чжунаньхай”, маўзалей Маа Цзэдуна, будынак Усекітайскага сходу народных прадстаўнікоў, яны прадстаўлены ў “Каталогу вядомых сучасных кітайскіх мастакоў” і ў даведніку “100 кітайскіх мастакоў”.
Арганізатарамі выстаўкі У Цзіньляна выступілі Міністэрства культуры Рэспублікі Беларусь,
Канфедэрацыя творчых саюзаў Беларусі, рэдакцыя кітайскага часопіса «Форум Азіі» і Рэспубліканскі інстытут кітаязнаўства імя Канфуцыя БДУ.
Таццяна ШЫМУК
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
