У Валожынскім раёне для беларускіх і замежных турыстаў падрыхтавалі прыемны сюрпрыз. Велатур па «Валожынскіх гасцінцах» можна будзе здзейсніць, пачынаючы з мая.
— Ідэя стварэння асобнага веламаршруту па Валожынскіх гасцінцах лунала даўно, — распавядае старшыня праўлення грамадскага аб'яднання «Адпачынак у вёсцы» Валерыя Кліцунова.
— Першы невялікі размечаны кальцавы веламаршрут працягласцю 20 кіламетраў з'явіўся ўжо ў 2010 годзе вакол сядзібы «Марціновы Гусь». А ў 2013-м уладальнікі некалькіх аграсядзіб, прадстаўнікі БГА «Адпачынак у вёсцы» пры падтрымцы Мінскага веласіпеднага таварыства і Валожынскага райвыканкама вырашылі пракласці веламаршрут ад станцыі Багданаў праз увесь Валожынскі раён да станцыі Радашковічы.
Гэтая ініцыятыва стала развівацца дзякуючы праекту «Развіццё турыстычных кластараў у Беларусі». Працягласць маршруту — каля 150 кіламетраў. Стваральнікі маршруту пастараліся ўключыць у яго самыя цікавыя месцы Валожынскага краю: экамузеі, аграсядзібы, прыродныя і гістарычныя славутасці. Валанцёры-веласіпедысты размецілі трасу. Усталяваны альтанкі для адпачынку і інфармацыйныя стэнды. «Валожынскія гасцінцы» — гэта першы і пакуль адзіны мадэльны турысцка-экскурсійны маршрут па сельскім турызме ў Беларусі. Ён, спадзяецца Валерыя Кліцунова, паслужыць прыкладам для стварэння іншых падобных маршрутаў.
Надзея ДРЫЛА.
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.