Што рухае маладымі людзьмі, якія паступаюць на педагагічныя спецыяльнасці? Чаму ў настаўнікі не ідуць лепшыя вучні? Да чаго павінны быць падрыхтаваныя будучыя педагогі? Ад чаго залежыць імідж настаўніка ў грамадстве? І, нарэшце, як затрымаць маладых спецыялістаў у сістэме адукацыі? Усе гэтыя пытанні абмяркоўваліся падчас «круглага стала», які прайшоў у рамках фестывалю «Педагог-майстар — маладому настаўніку». Да дыскусіі былі запрошаны як прадстаўнікі Міністэрства адукацыі, кіраўнікі ўстаноў адукацыі, педагогі, якія рыхтуюць будучых настаўнікаў, так і самі маладыя спецыялісты. Але ці пачулі яны адзін аднаго?
Журналісты ўжо прызвычаіліся да таго, што... менавіта іх абвінавачваюць у падзенні прэстыжу ў грамадстве прафесіі педагога. Маўляў, навошта вы топчаце нашу прафесію? Замест таго, каб рабіць героямі дня Педагогаў з вялікай літары, фарміраваць пазітыўнае бачанне школы, падкрэсліваць выключнасць місіі настаўніцкай прафесіі, засяроджваеце ўвагу толькі на праблемах: на нізкай «якасці» абітурыентаў, якія паступаюць на педагагічныя спецыяльнасці, іх дрэннай матываванасці, маленькіх заробках настаўнікаў і гэтак далей. Без такіх абвінавачанняў не абышлося і на гэты раз. Але менавіта згаданыя праблемы ў выніку і аказаліся ў цэнтры ўвагі ўдзельнікаў дыскусіі. Гэта лішні раз пераканала — шукаць адказы на пастаўленыя пытанні ўсё ж давядзецца.
Прафесія ці дыплом?
Першы прарэктар Беларускага дзяржаўнага педагагічнага ўніверсітэта імя Максіма Танка Аляксандр АНДАРАЛА ўпэўнены, што настаўнік «пачынаецца не з педуніверсітэта» — «гадаваць» будучых педагогаў павінны яшчэ ў школе.
— Асноўныя «пастаўшчыкі» абітурыентаў для нашага ўніверсітэта — сталіца і Мінскі рэгіён. Між іншым, толькі ў Мінску налічваецца больш як 200 школ. Плюс каля 500 агульнаадукацыйных устаноў працуюць у Мінскай вобласці. І калі б кожная школа накіравала да нас хоць аднаго свайго выпускніка, то ў нас быў бы сур'ёзны конкурс сярод прэтэндэнтаў. Самастойна педагагічны ўніверсітэт проста фізічна не ў сілах дайсці да кожнай школы. Каб прапагандаваць педагагічную прафесію, мы выступаем на тэлебачанні, у друкаваных сродках масавай інфармацыі, арганізуем «Зорныя паходы»: падчас зімовых канікул нашы студэнты і выкладчыкі праводзілі прафарыентацыйную работу ў шасці раёнах у розных абласцях, дзе выступалі перад школьнікамі, расказвалі ім аб жыцці педуніверсітэта, студэнцкім жыцці, агітавалі за сваю прафесію.... Але ж і настаўнікі павінны думаць над тым, хто прыйдзе ім на змену. Школы павінны хварэць за гэта душой!
На жаль, даводзіцца канстатаваць, што да нас прыходзяць сёння не самыя падрыхтаваныя і матываваныя абітурыенты. Летась мы прынялі 84 чалавекі на «фізіку», але на працягу года па розных прычынах адлічылі з першага курса 40 чалавек. Як той казаў, з дрэннага сукна добры шынель не пашыеш — вучыць далей студэнтаў, якія не разбіраюцца ў элементарных рэчах, мы не можам,
— падкрэслівае Аляксандр Андарала.
— У кожнага чалавека ў жыцці ёсць людзі, якіх ён лічыць сваімі настаўнікамі. Мае настаўнікі падштурхнулі мяне да выбару прафесіі, і пра свой выбар я ніколі не пашкадаваў, — прызнаецца намеснік міністра адукацыі Васіль БУДКЕВІЧ. — Лічу, што сваім стаўленнем і да работы, і да жыцця настаўнік павінен быць для маладога пакалення прыкладам. Настаўнік — гэта не проста прафесія. Нельга быць настаўнікам з 8 гадзін раніцы да 17-ці. Гэта работа 24 гадзіны на суткі і 365 дзён на год. І я лічу, што гэта вялікі грэх, калі настаўнік не арыентуе, не агітуе сваіх вучняў за прафесію педагога.
— Каб выпускнік пайшоў на педагагічную спецыяльнасць, важна, каб яшчэ ў школе ён аказаўся ў акружэнні высакакласных педагогаў, — падзяліўся сваімі думкамі намеснік старшыні ЦК Беларускага прафсаюза работнікаў адукацыі і навукі Раман ДАПІРА. — Але калі дзіця бачыць, што настаўнік адчувае сябе непаўнацэнным, то ён, безумоўна, у гэту прафесію ніколі не пойдзе. Настаўнік не павінен адчуваць сябе аўтсайдарам у грамадстве!
— А ці не лічыце вы, што мы рыхтуем зашмат педагогаў? — пацікавіўся Васіль Будкевіч меркаваннем першага прарэктара БДПУ. — Мы ўжо забяспечылі педагогамі і вакзалы, і аэрапорты, і турыстычныя фірмы. Можа, трэба рыхтаваць менш ды лепш? Упор рабіць не на колькасць, а на якасць? У савецкія часы нашы ўстановы адукацыі выпускалі крыху больш за 4 тысячы педагогаў, а школьнікаў у краіне было ўдвая больш. Летась выпуск склаў 9 200 чалавек. З іх размеркаваныя былі 6 283 маладыя спецыялісты. За дваццаць гадоў у краіне з'явілася вялікая колькасць людзей з дыпломамі аб вышэйшай адукацыі, але без вышэйшай адукацыі! Я асабіста вельмі хвалююся за тое, што ў школы прыйдуць выпускнікі платнай формы навучання, для якіх педагагічная спецыяльнасць была «запасным варыянтам» і якія не змаглі знайсці сябе прымяненне ў іншых сферах. А добра падрыхтаваныя выпускнікі пасля двух гадоў адпрацоўкі па размеркаванні знойдуць сабе работу, дзе ім будуць плаціць «крышачку больш», чым у школе.
— Сапраўды, у савецкія часы маладыя людзі ішлі вучыцца для таго, каб атрымаць прафесію, а не дыплом. А пазабюджэтнікі ў пераважнай сваёй большасці прыходзяць да нас не па прафесію, а па вышэйшую адукацыю. І толькі адзінкі з іх выказваюць жаданне працаваць па атрыманай спецыяльнасці. Што тычыцца лічбаў, то тут усё залежыць ад таго, як весці падлікі. Раней мы выпускалі толькі настаўнікаў-прадметнікаў, а цяпер рыхтуем і псіхолагаў, і сацыяльных педагогаў. Для таго, каб не забяспечваць педагогамі ўсе іншыя сферы, трэба ўзяць на ўзбраенне досвед Масквы. У расійскай сталіцы колькі гадоў таму была катастрафічная сітуацыя з педагагічнымі кадрамі, затое сёння, каб уладкавацца ва ўстанову адукацыі, трэба прыкласці шмат намаганняў. А ўсё таму, што заробак у педагогаў не можа быць меншым, чым сярэдні заробак па Маскве. Вось вам і адказ на ваша пытанне. Калі б нашым педагогам паднялі заробкі і ўсе настаўнікі, якія былі вымушаны адмовіцца ад прафесіі, зноў вярнуліся ў сістэму адукацыі, то мы б не думалі, як закрыць вакансіі ў дзіцячых садках ці дзе ўзяць настаўнікаў фізікі і матэматыкі...
Са студэнцкай лаўкі — адразу ў «бой»?
— Ідэя падцягнуць заробкі педагогаў да сярэдняга заробку ў рэгіёне мне падабаецца, — падхапіў настаўнік фізікі сярэдняй школы № 26 г. Гродна Сяргей ФАДЗІН, дарэчы, малады спецыяліст. — Хачу расказаць, з якімі праблемамі давялося сутыкнуцца асабіста мне пасля таго, як прыйшоў у школу. На мяне звалілася вялікая колькасць нарматыўных дакументаў, у якіх трэба было разабрацца, каб прымяняць іх на практыцы. Прабелы адчуваліся і ў псіхалагічнай падрыхтоўцы. Псіхалогія ва ўніверсітэце быццам бы і вывучаецца, хоць і непрацяглы час, але да работы з «жывымі людзьмі» мы не зусім падрыхтаваны. Таму і ўзнікалі шматлікія пытанні. А калі табе яшчэ адразу даюць класнае кіраўніцтва, то трэба наладжваць стасункі ўжо не толькі з дзецьмі, але і з іх бацькамі.
Настаўнік гісторыі Бабініцкай сярэдняй школы Віцебскага раёна Аляксандр ПРОХАРАЎ падтрымаў свайго калегу:
— Хацелася б акцэнтаваць увагу на вялікай колькасці папер, якія даводзіцца афармляць і запаўняць настаўніку. Малады спецыяліст прыступае да работы 15 жніўня. З вучнямі ён знаёміцца толькі 1 верасня. А акт абследавання сем'яў усіх сваіх навучэнцаў класны кіраўнік павінен здаць ужо да 10 верасня. Да таго ж у сельскай мясцовасці ёсць свае нюансы. Адлегласць ад школы да месца пражывання аднаго з маіх вучняў — 15 кіламетраў. Да таго ж мы павінны не менш чым раз на тыдзень наведваць сем'і, што знаходзяцца ў сацыяльна-небяспечным становішчы і складаць адпаведныя акты. Робім мы гэта ў свой асабісты час. У маім класе такіх вучняў двое. У іншых — тры-чатыры. Вяртаюся дадому ў цемры. Да таго ж і за прыгарадныя аўтобусы даводзіцца плаціць з уласнай кішэні.
Праз паўгода я страчу даплату як малады спецыяліст — сёння гэта 260 тысяч. І нават прысваенне другой кваліфікацыйнай катэгорыі гэтую даплату не кампенсуе.
Што тычыцца прадмета, які я выкладаю, то скажу, што вельмі складана спачатку паўгода выкладаць пэўны перыяд курса сусветнай гісторыі, а потым паўгода, забыўшыся пра сусветную гісторыю, праводзіць заняткі па гісторыі Беларусі. Невялікая колькасць гадзін, прадугледжаных на вывучэнне гісторыі Беларусі, прывядзе да таго, што гісторыю роднай краіны мы хутка забудзем. Да таго ж і замежная мова выкладаецца ў школе ў разы больш, чым родная. Яшчэ адна праблема — выкладанне гісторыі Беларусі на рускай мове. Я скончыў школу ў 2007 годзе. Гісторыю Беларусі мы вывучалі на беларускай мове. Ва ўніверсітэце гісторыя Беларусі таксама выкладалася на беларускай мове. А ў школе немагчыма гэта рабіць, паколькі падручнікі ёсць толькі на рускай мове.
Час на адаптацыю
Васіль Будкевіч кажа, што не разумее, на якую «кіпу папер» скардзяцца маладыя настаўнікі, а вось з тым, што маладым спецыялістам трэба даць час для адаптацыі, а не кідаць іх на класнае кіраўніцтва як у вір з галавой, пагаджаецца:
— Педагогам-пачаткоўцам трэба даць год—два, каб яны ўвайшлі ў прафесію і адчулі сябе не студэнтамі на практыцы, а педагогамі. Каб асэнсавалі і зразумелі гэты стан. Калі я прыйшоў у школу, мне не далі адразу класнае кіраўніцтва. Паказалі чацвёрты клас і сказалі, што ў наступным годзе я буду працаваць у ім класным кіраўніком. Я прысутнічаў у гэтым класе на працягу года на многіх мерапрыемствах, дзеці і бацькі мяне бачылі і ведалі. І я з радасцю чакаў 1 верасня, каб стаць у дзяцей класным кіраўніком.
Між іншым, у Акадэміі паслядыпломнай адукацыі (АПА) на працягу васьмі гадоў вядзецца даследаванне па вывучэнні цяжкасцяў, якія ўзнікаюць у працэсе работы маладых настаўнікаў. У ім удзельнічаюць не толькі педагогі, якія прыступілі да работы, але і кіраўнікі ўстаноў адукацыі.
— У многім думкі маладых педагогаў і кіраўнікоў супадаюць. І моладзь, і кіраўнікі дастаткова высока ацэньваюць кампетэнтнасць маладых настаўнікаў у прадметнай галіне — ад 60 да 80% у розныя гады, — расказала начальнік аддзела сацыялогіі адукацыі і павышэння кваліфікацыі Вераніка РЭУТ. У чым сёння малады педагог, на яго думку, недастаткова сфарміраваны? Недастаткова сфарміраваныя ўменні ў галіне выхаваўчай работы — уменні працаваць з бацькамі, з дзецьмі з дэвіянтнымі паводзінамі, праводзіць інавацыйную дзейнасць.
У 2006—2007 гадах самымі праблемнымі для маладога настаўніка былі недастатковая метадычная падрыхтоўка, недасканаласць нарматыўна-прававой базы, у якой ён дрэнна арыентаваўся, аднастайныя формы і метады работы з маладымі педагогамі. У 2008—2009 гадах «праблемныя» акцэнты змясціліся ў іншы бок: арганізацыя настаўніцтва ва ўстанове адукацыі, валоданне інфармацыйна-камунікацыйнымі тэхналогіямі. Сёння маладыя педагогі адчуваюць патрэбу ў развіцці дыстанцыйнай сістэмы падтрымкі педагога, у арганізацыі цьютарства (кансультавання). Пераважная большасць педагогаў выступае з прапановай правядзення анкетавання ці тэсціравання на прафесійную прыдатнасць пры прыёме ў ВНУ...
Інтэрнатура для педагогаў
Дарэчы, у Расіі, дзе таксама заклапочаны нізкай матываванасцю абітурыентаў, якія ідуць на педагагічныя спецыяльнасці, і слабай падрыхтоўкай маладых педагогаў, каб зламаць гэту тэндэнцыю, вырашылі кардынальна перабудаваць сістэму педагагічнай адукацыі і распрацавалі канцэпцыю падтрымкі развіцця педагагічнай адукацыі. Згодна з гэтай канцэпцыяй, абітурыенты пры паступленні на педагагічныя спецыяльнасці будуць праходзіць псіхалагічнае тэсціраванне, паколькі педагогіка — прафесія не для кожнага.
— Мы як прафсаюз марым пра тое, каб для маладых педагогаў быў створаны інстытут накшталт інтэрнатуры ў медыцыне, г. зн., каб наш малады спецыяліст меў паўгода або некалькі месяцаў для адаптацыі, каб ён проста мог папрысутнічаць на ўроках і прыгледзецца, як працуюць больш вопытныя настаўнікі, — падкрэсліў Раман Дапіра. — А калі ў маладога педагога нагрузка 27 гадзін на тыдзень ці яшчэ большая, то ён, безумоўна, не будзе бачыць, як працуюць іншыя. І гэта не вельмі добра. Бо настаўніцтва пачынаецца там, дзе не проста замацавалі педагога за маладым спецыялістам, а дзе малады спецыяліст мае магчымасць паглядзець, як гэты настаўнік працуе.
Сёння наймальніку ў сістэме адукацыі вельмі складана падвесці матывацыйную базу пад тое, каб малады спецыяліст застаўся ў яго працаваць. Мы з Міністэрствам адукацыі адсочваем, як у рэгіёнах плануюцца сродкі на павышэнне заработнай платы педагагічным работнікам. Сёння наша ўвага прыкаваная да большай дыферэнцыяцыі аплаты працы паміж педагагічнымі работнікамі, якія маюць першую і вышэйшую кваліфікацыйную катэгорыю. Для нас гэта асноўная задача. Магчыма, яе вырашэнне і падштурхне маладых спецыялістаў паглядзець на школу і ўвогуле на сістэму адукацыі як на сістэму свайго доўгатэрміновага развіцця, сваёй доўгатэрміновай кар'еры.
Для таго, каб зацікавіць маладога педагога і падтрымаць яго матэрыяльна, нярэдка кіраўнікі даюць яму вялікую колькасць гадзін. Праўда, вялікую колькасць гадзін маладым «уручаюць» і па прычыне дэфіцыту ў школе педагогаў таго ці іншага профілю. Але пра якую якасць працы можа весціся гаворка, калі на нявопытнага педагога звальваюцца 30-36 гадзін на тыдзень плюс класнае кіраўніцтва?
Як прызнаўся адзін з маладых педагогаў падчас «круглага стала», калі ты ідзеш з дому а палове восьмай раніцы і прыходзіш а восьмай вечара, калі ў цябе няма «фортак» паміж урокамі, і ты вяртаешся дамоў пасля 12 гадзін бесперапынных зносін з дзецьмі, іх бацькамі і калегамі, а цябе дома чакае яшчэ падрыхтоўка да ўрокаў, напісанне планаў і розных справаздач, падрыхтоўка да шостага школьнага дня, пазакласных мерапрыемстваў, а ты бачыш, як іншыя людзі адпачываюць ці рыхтуюцца да свята, то думаеш толькі пра адно: «Навошта мне такое шчасце?»
Надзея НІКАЛАЕВА.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».