Якое гэта прыгожае відовішча, калі грацыёзны алень раскідвае капытам снег і дастае адтуль зялёныя галінкі азімага рапсу! Глядзець можна доўга, можна здымаць на відэа, калі пашанцуе. А мы вось не паспелі нават сфатаграфаваць: як толькі машына дырэктара ААТ «Роўбіцкае» спынілася насупраць маленькага статку аленяў, чуллівыя жывёліны адразу адбеглі да бліжэйшага ўзлеску і схаваліся за дрэвамі.
Стратная экзотыка
— Як знарок пахаваліся, — здзіўляецца дырэктар роўбіцкай гаспадаркі Мікалай Пстыга. — Бывае, едзеш па гэтай дарозе — ледзь не з-за кожнага дрэва то зубры выглядваюць, то алені з казулямі...
Тут жа спрактыкаваным вокам дырэктар заўважае на краю лесу лісу, але я паспяваю ўбачыць толькі рыжы хвост.
Што тут скажаш? Насельнікі Белавежскай пушчы жывуць сваім жыццём, галоўным складнікам якога з'яўляецца здабыванне ежы. Асабліва гэта актуальна студзеньска-лютаўскімі маразамі, калі звычайная кармавая база пад снегам.
Цікава ўсё апісанае назіраць старонняму чалавеку альбо зацікаўленаму турысту, а вось гаспадарнікам гэтая экзотыка нічога, акрамя галаўнога болю, не прыбаўляе.
— Каля вёскі Чадзель увесь рапс летась з'елі, — працягвае Мікалай Іванавіч. — Кукурузу звычайна псуюць дзікі. Зубры, праўда, у апошнія гады сталі наведвацца да нас значна радзей. Жывуць нейкія шэсць адзіночак-пустэльнікаў у тутэйшых лясах. А статкі хадзіць перасталі, бо побач Нацыянальны парк праводзіць арганізаваныя паляванні. Як толькі сталі пастрэльваць, зубры пачалі абыходзіць гэтыя мясціны. Зубр, як аказалася, звер асцярожны.
А вось больш дробныя «суседзі па пушчы» на блізкасць чалавечага жытла нават не зважаюць. Георгій Шымчык паказвае нам свае няхітрыя прыстасаванні для адпужвання аленяў. Рапсавае поле пачынаецца адразу за агародам Георгія Антонавіча. Сюды надвячоркам кожны дзень прыходзяць папасвіцца алені. Тады гаспадар бярэ жалезны прут і з усяе сілы ляпае ім па металічнай восі агароднай тачкі. Потым выходзіць памахаць кіем, пакрычаць, каб няпрошаныя госці адбеглі далей. Яго сабаку Шарыка яны ўжо даўно не баяцца. Дварняк сам пабойваецца лясных звяроў. Ён бяжыць і ўпэўнена брэша толькі побач з гаспадаром, а калі той паварочвае дадому, хуценька разварочваецца і Шарык. Такая няхітрая «метода» дзейнічае звычайна некалькі гадзін. На досвітку і вечарам лясныя госці вяртаюцца на аблюбаванае поле.
Георгію Шымчыку 76 гадоў, але ён яшчэ працуе брыгадзірам у Чадзелі. Таму ад калгасных пасеваў рапсу адганяе звяроў па абавязку службы. «Некалі, бацькі-дзяды расказвалі, яшчэ да рэвалюцыі, калі лясны звер людзям якую патраву рабіў, гаспадару кампенсавалі ўрон з казны, — гаворыць Георгій Антонавіч. — А цяпер усе нашы страты — толькі наша праблема».
Бабінецкая «чупакабра»
Амаль у самім лесе схавалася вёска Бабінец. Цяпер там засталося дзве хаты, дзе ўвечары запальваецца святло. У адной жыве Настасся Пакала, у другой — Уладзімір Купраш з жонкай. Настасся Міхайлаўна прывыкла да суседства з дзікай прыродай. Кажа, што раней, калі ў іх вёсцы было шмат людзей, усе трымалі кароў, то зубры нярэдка пасвіліся разам з імі. Паводзілі сябе, як прыстойныя суседзі, ніколі ніякай шкоды не рабілі. Ну хіба калі зімой каторы падыдзе да стажка пажаваць сена. Таму пільныя вяскоўцы стараліся не трымаць кармы адкрытымі. А вось хто страціў усялякае «сумленне», на думку бабулек, дык гэта куніцы. У суседа летась за адну ноч 29 курэй і індыкоў задушыла шкодніца. Ды і ў Настассі Міхайлаўны больш за дзясятак свойскіх птушак звяла. «Па тэлевізары нейкай чупакабрай людзей палохалі, — смяецца пушчанская жыхарка. — Хай прыедуць да мяне, я ім гэтую «чупакабру» пакажу. У вышыню яна меншая за кошку, але ўмелы драпежнік. Суседу ў пастку папалася летась пасля таго, як нарабіла шкоды ў куратніку».
Лісты без адказаў
Вясковыя жыхары даўно прызвычаіліся да існавання ва ўмовах лесу. А вось гаспадарнікі вымушаны лічыць грошы, а таму абурэнне дырэктара «Роўбіцкага» Мікалая Пстыгі цалкам зразумелае. Мікалай Іванавіч згадвае, як колькі гадоў таму Нацыянальнаму парку перадалі сотні гектараў зямлі для стварэння так званай буфернай зоны. Мелася на ўвазе, што парк будзе засяваць гэтыя землі тым жа рапсам, іншымі азімымі культурамі для падкормкі лясных звяроў. Менавіта ў раёне згаданай вёскі Бабінец ніхто ні разу былыя калгасныя землі не засяваў — так і стаяць яны, дзічэюць, зарастаюць бур'яном. А лясным звярам не раскажаш, дзе можна хадзіць, а дзе нельга: яны ходзяць, дзе хочуць. І наносяць гаспадарцы матэрыяльны ўрон, які вымяраецца канкрэтнымі лічбамі. Некалькі гадоў запар спрабавала кіраўніцтва сельгас-
прадпрыемства выстаўляць рахунак Белавежскай пушчы, нават за подпісам тагачаснага старшыні Пружанскага райвыканкама лісты накіроўвалі. Яны, тыя лісты, і сёння застаюцца без адказу.
Яшчэ большай бядой, чым для «Роўбіцкага», сталі патравы для ААТ «Мурава». На землях гэтай гаспадаркі практычна штодзённа пасвіцца... статак зуброў прыкладна ў сто галоў. Ноччу звяры прыходзяць да сянажнай ямы, раскідваюць бурт, ірвуць плёнку, якой закрыты корм, і дабіраюцца да травы, што летам назапашана для калгасных кароў. Галоўны аграном Міхаіл Гаўра расказаў, што ў гаспадарцы складзены графік дзяжурства спецыялістаў. Мінулую ноч якраз і дзяжурыў Міхаіл Міхайлавіч.
Зубрыныя патравы
— Тры разы ганяў зуброў, апошні — а пятай раніцы. Нават не таго корму шкада, які яны з'ядуць, — гаворыць галоўны аграном. — Уявіце сабе, што будзе з азімымі ці любой іншай культурай, калі патопчуцца па полі сто галоў такіх «гмахаў». А ходзяць яны тут пастаянна. Усяго ў ваколіцы — тры зубрыныя чарады, і ўсе яны не супраць патаптацца па палях сельгаспрадпрыемства. А каля памянёнай сянажнай ямы ўсё поле пакрыта «бясплатным арганічным угнаеннем» — горка пажартавала галоўны эканаміст сельгаспрадпрыемства Раіса Кандрукевіч.
Зубры тут зусім асвоіліся. Тыдні паўтара-два таму зубрыца ацялілася ледзь не ля самай фермы Навасёлкі. І апошняе насцярожыла спецыялістаў «Муравы». А раптам статак, які ганяюць работнікі штоноч, аднойчы затопча нованароджанае зубраня... Да крымінальнай справы можа дайсці... У адказ на прэтэнзіі гаспадаркі ў Белавежскай пушчы прызвычаіліся адмоўчвацца. Эканаміст гаворыць, што і летась выстаўлялі суседзям рахунак на 120 мільёнаў рублёў за патравы. Ніякай рэакцыі.
Праблемы застаюцца
Аб прэтэнзіях суседзяў-аграрыяў аўтарцы гэтых радкоў давялося гутарыць з генеральным дырэктарам Нацыянальнага парку «Белавежская пушча» Аляксандрам Бурым год таму. Аляксандр Васільевіч сказаў, што папуляцыя зубра ў пушчы даўно перавысіла норму. Прыйшоў час шукаць шляхі аптымізацыі колькасці валадароў лесу. А справа гэтая, па ўсім відаць, доўгая, бо пра банальны адстрэл чырванакніжнікаў гаворка нават не вядзецца. Праўда, дырэктар запэўніў тады, што пушча значна пашырае пасяўныя плошчы для падкормкі звяроў для таго, каб трымаць іх пад кантролем.
Як бачым, праблему прынятыя захады не вырашылі. Але ж гэта не азначае, што яе ўсё роўна не давядзецца вырашаць. Нацыянальны парк даўно ўжо прапаноўваў гаспадаркам агарадзіць свае палеткі. Ды ў Мураве гэта лічаць нездзяйсняльным праектам. І сапраўды: як можна абнесці агароджай 4200 гектараў зямлі па перыметры? Дарогі ж пры гэтым не абгародзіш. Ды і самі жэрдкі для зубра — не перашкода. Тады які сэнс гарадзіць наогул? Не абнясеш жа жалезабетонным мурам вышынёй у два метры сярэднестатыстычны калгас, нібы сярэднявечную крэпасць! Тады і гаварыць няма пра што.
Даводзілася чуць і такую думку: маўляў, каля пушчы наогул не патрэбны сельгаспрадпрыемствы. Прыйшла пара расфарміраваць іх і ператварыць у лесапаляўнічую зону, а палі — у кармавую базу для жывёлы. А куды тады загадаеце падзець фермы, іншыя вытворчыя аб'екты, працаўнікоў гаспадарак, якія кормяць свае сем'і? Дарэчы, не горшыя гаспадаркі. Тая ж «Мурава» мае сучасныя малочнатаварныя комплексы, вырошчвае элітнае насенне, плаціць зарплату, значна вышэйшую за сярэднюю па галіне. Разваліць такое сельгаспрадпрыемства, згадзіцеся, не вялікая заслуга.
Трэці варыянт уяўляецца самым цывілізаваным: неабходна прымусіць пушчу стварыць кармавую базу самастойна або плаціць па рахунках. Толькі ў суседніх з пушчай гаспадарках даўно ў гэта не вераць. Усе ў адзін голас кажуць, што для гэтага патрэбна рашэнне на самым высокім узроўні. А пакуль усё застаецца, як было. Сумы страт вісяць у паветры. Шматлікія правяральшчыкі фінансавай і гаспадарчай дзейнасці сельгаспрадпрыемстваў разводзяць рукамі і з разуменнем спачуваюць. Як на тым семінары, які цяпер у Мураве ўспамінаюць амаль што з усмешкай.
Гады два таму ўрадзіла кукуруза на полі, як нідзе ў раёне. Зазірнуў сюды старшыня райвыканкама і адразу прыняў рашэнне правесці семінар-вучобу для ўсіх аграрыяў раёна. Дырэктар «Муравы» Пётр Білецкі напярэдадні вечарам быў на полі, яшчэ раз з задавальненнем агледзеў пасевы, абдумаў прамову. Хто ж мог ведаць, што да ранку тое поле недажыве, што яго спляжаць дзікі. Раніцай дырэктар прыехаў сюды разам з гасцямі, каб не без гонару падзяліцца вопытам з калегамі. Узняў руку з указкай, і... усё ўбачыў. Далей, як сказана ў вядомай п'есе, была нямая сцэна.
Святлана ЯСКЕВІЧ.
Пружанскі раён.
Мерапрыемства праводзіцца на добраахвотнай аснове.
Не выявіць ні секунды абыякавасці.