Падчас правядзення чэмпіянату свету па хакеі важна, каб арганізацыі грамадскага харчавання забяспечылі высокую якасць абслугоўвання жыхароў краіны і замежных гасцей, каб іх паслугі былі даступнымі і прыцягальнымі. У канчатковым выніку гаворка ідзе пра стварэнне станоўчага іміджу краіны, таму Міністэрства гандлю выступіла з рэкамендацыямі адносна таго, якія патрабаванні да аб'ектаў грамадскага харчавання павінны быць выкананы.
У прыватнасці, гаворка ідзе пра веданне замежнай мовы персаналам у межах размоўнага мінімуму. Пры адсутнасці работнікаў залы з такімі ведамі дапускаецца наяўнасць на аб'екце хаця б аднаго спецыяліста з веданнем замежных моў. У рэстаране ці кавярні павінны быць размоўнікі «Гутарковая замежная мова (англійская)». Меню — на дзяржаўнай беларускай (рускай) і адной замежнай мове. У самім меню павінен быць прадстаўлены разнастайны асартымент страў, у тым ліку не менш за 10 страў беларускай нацыянальнай кухні (асарці сялянскае, селядзец па-старабеларуску, грыбная поліўка, дранікі, пячыста са свініны, верашчака, збіцень і інш). Міністэрства гандлю таксама рэкамендуе выключыць неабгрунтаванае павялічэнне цэн на прадукцыю грамадскага харчавання, захаваўшы на перыяд правядзення чэмпіянату ўзровень цэн, якія будуць дзейнічаць да мая.
Апроч іншых рэкамендацый — наяўнасць магчымасці разліку спажыўцамі за прадастаўленыя паслугі банкаўскімі карткамі ўнутранай плацежнай сістэмы БелКарт і міжнароднай плацежнай сістэмы Vіsa і MasterCard. Павінен быць у наяўнасці бесправадны інтэрнэт, магчымасць прагляду спартыўных і іншых тэлепраграм. Міністэрства гандлю раіць мець у рэстаранах і кавярнях карты, схемы руху транспарту ў гарадах, а для прыдарожнага сэрвісу — на аўтамабільных дарогах краіны. Вядома, у наяўнасці павінна быць сувенірная прадукцыя і інфармацыйныя матэрыялы пра гісторыка-культурныя славутасці Беларусі, паслугах тураператараў. Для ўдзельнікаў дарожнага руху трэба прапанаваць разнастайныя віды паслуг: камплектаваць наборы ў дарогу, даць магчымасць падзарадзіць мабільныя тэлефоны, скарыстацца факсам і інш.
Залішне казаць, што пра сам аб'ект грамадскага харчавання павінна быць інфармацыя ў інтэрнэце, а сам ён — мець шыльду і інтэр'ер, аформлены ў адпаведнасці з канцэпцыяй рэстарана ці кавярні. Гучыць, магчыма, банальна, але айчынным уладальнікам такіх аб'ектаў нагадалі пра неабходнасць працаваць згодна з зацверджаным рэжымам работы, падтрымліваць належны санітарна-гігіенічны стан, а работнікаў забяспечыць адзіным фірменным адзеннем і нагруднымі знакамі для абслуговага персаналу.
Сяргей РАСОЛЬКА
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».