Дайджэст навін у айчыннай кінагаліне
Усё змяшалася на «Беларусьфільме». Будынак кінастудыі вось ужо які год знаходзіцца ў стадыі капітальнага рамонту. Зносяць сцены, замуроўваюць выхады, абнаўляюць інтэр'еры, праводзяць цэнтральнае ацяпленне — раней кінастудыя карысталася ўласнай кацельняй. Плануюць нават зрабіць адмысловыя вучэбныя студыі, якімі б маглі карыстацца як навучэнцы Акадэміі мастацтваў, так і іншыя рэжысёры-дэбютанты, якія здымаюць на студыі.
Але капітальны рамонт патрэбен, здаецца, не толькі будынкам, але і самому працэсу кінавытворчасці ў Беларусі. І пра гэта гавораць кожны год. Прычым апошнім часам амаль кожны год у кінагаліну ўводзіліся нейкія наватарствы.
— Спачатку вырашылі звярнуцца да сістэмы конкурсу, па выніках якога размяркоўваліся дзяржаўныя сродкі на кінавытворчасць, — тлумачыць генеральны дырэктар Нацыянальнай кінастудыі «Беларусьфільм» Алег СІЛЬВАНОВІЧ.
— Потым ад конкурсу адмовіліся. Потым уступіў у сілу закон аб дзяржаўных закупах, які зрабіў немагчымым аб'яўленне ніякіх тэндараў…
Словам, галоўная асаблівасць сітуацыі ў беларускім кіно ў тым, што няма ніякай стабільнасці, устойлівага мэтанакіраванага развіцця. Ёсць толькі суцэльная непрадказальнасць. І ў гэтай непрадказальнасці ўсе развіваюцца самі па сабе. Чыста тэхнічна кіно сёння зрабіць прасцей, чым калі-небудзь дагэтуль. Усё часцей чуваць пра незалежныя эксперыменты маладых беларусаў, якія едуць вучыцца кінематографу за мяжу. І не здзіўлюся, калі ў бліжэйшай будучыні менавіта яны будуць ствараць моду ў беларускім кіно. Вось акурат напрыканцы студзеня кінакампанія Nonstop Medіa нарэшце пачне здымаць меганацыянальны праект «Авель». У галоўнай ролі мусіць здымацца беларускі акцёр Руслан Чарнецкі. Але стваральнікі фільма абяцаюць у Мінску вялікую колькасць галівудскіх каскадзёраў і наогул нябачаныя дагэтуль у беларускім кіно трукі. Галоўныя сцэны рэжысёр фільма «Авель» Уільям Дэ Віталь плануе здымаць на Кастрычніцкай плошчы, куды будзе прыцягнута каля 4 тысяч чалавек масоўкі.
«Беларусьфільм» тым часам працягвае абяцаць праект з Эмірам Кустурыцам. І нібыта сюжэтная канва ўжо ўзгоднена. Гаворка пойдзе пра інтэрнацыянальны партызанскі атрад, які прайшоў усю Беларусь і палову Еўропы падчас Другой сусветнай вайны.
Завершана праца над 12‑серыйным тэлесерыялам «Ой, мамачкі!» (рэж. Іван Паўлаў), пра які «Звязда» пісала раней. І цяпер серыял плануюць прадаць на расійскае тэлебачанне.
У лютым абяцаюць нарэшце завяршыць фільм «Белыя Росы. Вяртанне» (рэж. Аляксандра Бутар). І, магчыма, нават паспрабуюць прапанаваць яго для адбору на конкурс маладых рэжысёраў Канскага кінафестывалю.
Дарэчы, на Канскі кінафестываль у «Беларусьфільма» сёлета таксама вялікія спадзяванні. Будзе пашыраны павільён беларускага дакументальнага і анімацыйнага кіно. Толькі вось усё адно без па-еўрапейску высакаякаснай працы ў павільёне наўрад ці беларускае кіно прыцягне шмат увагі на канскім кінарынку. Хіба што фармальна беларускае кіно папрысутнічае на самай буйной і прэстыжнай кінападзеі свету.
Студыя анімацыйных фільмаў «Беларусьфільма» сёлета плануе выпусціць 7 мультфільмаў (летась выпусціла пяць). Ірына Кадзюкова працуе над фільмам «Шапэн» з нізкі «Казкі старога піяніна». Абяцаюць скончыць працу і над шостай часткай анімацыйнага фільма «Аповесць мінулых гадоў». Выйдуць мультфільмы Аляксандра Ленкіна «Рыбка па імені Нельга 5», «Песня жаўрука» Таццяны Кубліцкай, «Ронда Капрычыёза» Ігара Воўчака, «Пра вала» Яўгена Надточая, «Дзюдзя» («Хрюша») Уладзіміра Пяткевіча.
Падрабязней пра сітуацыю з дакументальным кіно на студыі «Летапіс» чытайце неўзабаве на старонках нашай газеты.
Вольга ЧАЙКОЎСКАЯ
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.