Хроніка апошніх падзей

Мірную канферэнцыю па Сірыі перанясуць з-за выставы дарагіх гадзіннікаў

Прадстаўнікі ААН афіцыйна пацвердзілі, што мірная канферэнцыя «Жэнева-2» пройдзе не ў Жэневе, а ў швейцарскім горадзе Мантрэ. Прычынай пераезду стала адсутнасць гасцінічных нумароў — з-за штогадовай выставы дарагіх гадзіннікаў.

Сноўдэн папрасіў палітычнага прытулку ў Бразіліі

У абмен на яго прадастаўленне былы супрацоўнік ЦРУ прапануе аказаць ураду краіны дапамогу ў расследаванні сачэння з боку ЗША і абяцае раскрыць новыя сакрэты амерыканскай разведкі.

Ангела Меркель у трэці раз абрана канцлерам Германіі

Бундэстаг у трэці раз выбраў Ангелу Меркель федэральным канцлерам Германіі. За кандыдатуру старшыні блока ХДС/ХСС прагаласавалі 462 дэпутаты з 631. Нагадаем, 59-гадовая Ангела Меркель узначальвае ўрад Германіі з 2005 года, у другі раз яна абіралася ў 2009 годзе. Сёлета ў верасні кансерватыўны блок Меркель ХДС/ХСС набраў больш за 41,5% галасоў на ўсеагульных парламенцкіх выбарах.

Клічко запатрабаваў правядзення прэзідэнцкіх выбараў у 2014 годзе

Выбары прэзідэнта Украіны павінны адбыцца ў сакавіку 2014 года, гэта значыць на год раней за ўстаноўлены Канстытуцыяй тэрмін. Пра гэта, як перадае УНІАН, заявіў лідар апазіцыйнай партыі УДАР Віталь Клічко. «Мы ведаем, што сёння адзінае выйсце з палітычнага крызісу, у якім знаходзіцца краіна, — гэта датэрміновыя парламенцкія і прэзідэнцкія выбары», — падкрэсліў ён. Дзейны кіраўнік дзяржавы Віктар Януковіч, па словах Клічко, раней сцвярджаў, што не баіцца такога развіцця падзей. «Дык няхай дакажа гэта на сумленных выбарах», — падсумаваў апазіцыянер.

Заява Клічко прагучала на наступны дзень пасля таго, як ён адмовіўся ад тытула чэмпіёна свету па боксе ў цяжкай вазе па версіі WBC. Спартсмен матываваў гэтае рашэнне неабходнасцю сканцэнтраваць сваю ўвагу на палітычных падзеях ва Украіне.