У Віцебску адбылася нарада міжведамаснай рабочай групы, створанай па даручэнні Прэзідэнта, якая займаецца маніторынгам за ходам рэалізацыі інвестыцыйных праектаў на прадпрыемствах дрэваапрацоўкі. Аляксандр ЯКАБСОН, старшыня Камітэта дзяржкантролю Рэспублікі Беларусь, асабіста азнаёміўся з тым, як ідуць справы на ААТ «Віцебскдрэў».
Тут інвестыцыйны праект коштам 75 мільёнаў еўра рэалізуецца, пачынаючы з 2011 года. Вялікія грошы ўкладваюцца для засваення вытворчасці пліт сярэдняй, высокай шчыльнасці і ламініраваных падлогавых пакрыццяў. Згодна з планам, праект трэба было рэалізаваць на працягу 25-26 месяцаў. Але запуск новай вытворчасці неаднаразова пераносіўся.
Каля гадзіны Аляксандр Якабсон, а таксама асобы, якія былі запрошаны на нараду, аглядалі тэрыторыю прадпрыемства. У тым ліку хадзілі па шпалах чыгункі, неаднаразова патрапіўшы ў бруд. Гутарылі з рабочымі. Дарэчы, высокакваліфікаваныя спецыялісты на гэтым прадпрыемстве ў дэфіцыце.
— Працягваецца маніторынг мадэрнізацыі дрэваапрацоўчых прадпрыемстваў краіны. На жаль, даводзіцца канстатаваць, што на прадпрыемствах выяўляецца шмат парушэнняў. У частцы навядзення парадку на віцебскім прадпрыемстве зроблена дастаткова шмат. Але да неабходнага ўзроўню яшчэ далёка. Хаця ёсць разуменне ў кіраўнікоў, і думаю, з гэтай задачай яны могуць справіцца. Што тычыцца рэалізацыі інавацыйнага праекта, будзе дадзена ацэнка дзеянням службовых асоб, — падвёў вынікі «экскурсіі» кіраўнік дзяржкантролю.
Але не можа не здзіўляць наступнае: чаму адзін з цэхаў гатовы да эксплуатацыі ўжо 1,5 года, абсталяванне набылі за валюту, але выпусцілі толькі пробную партыю прадукцыі?
— На жаль, гэта не адзінкавы факт, тое ж самае і на прадпрыемстве «Рэчыцадрэў», — дадаў Аляксандр Якабсон.
Дарэчы, кошт рэалізацыі праекта, у параўнанні з першапачатковым, падаражэў за гэты час амаль у два разы.
Высветлілася, што будаўнікі на «Віцебскдрэве» працавалі доўгі час толькі ў адну змену, усяго да трыццаці чалавек. Генеральны падрадчык — мясцовы будаўнічы трэст № 9 — быў у такім жа статусе яшчэ на прыкладна 50(!) новабудоўлях. Правяраючых турбуе і недахоп на прадпрыемстве кадраў: каму даверыць сучаснае абсталяванне? Паводле інфармацыі на пачатак лістапада, у штаце новай вытворчасці толькі 22% ад неабходнай колькасці работнікаў. Не хапае інжынерна-тэхнічных спецыялістаў і высокакваліфікаванага персаналу па абслугоўванні абсталявання. Будуць праблемы і са збытам новай прадукцыі, бо аналагічныя вытворчасці функцыянуюць у Расіі, Еўропе. Таму збыт павінен быць адпрацаваны як мага раней: заключаны дагаворы, вызначаны аб'ёмы паставак. Але сёння ёсць толькі папярэднія дамоўленасці, а патэнцыяльныя пакупнікі чакаюць узораў прадукцыі, якіх яшчэ няма.
Аляксандр ПУКШАНСКІ.
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
