Яшчэ адзін крок «Дынама»

Вікторыя Азаранка скончыла сезон з траўмай. Футбольнае «Дынама» разграміла «Гомель». А Уладзімір Самсонаў зноў гучна нагадаў пра сябе. «Звязда» ўспамінае самыя яркія спартыўныя падзеі мінулага тыдня.

1. За чатыры туры да заканчэння чэмпіянату Беларусі па футболе мінскае «Дынама» аддзяляе пяць ачкоў ад другога месца. У матчы 28 тура падапечныя Роберта Маасканта з буйным лікам перайгралі «Гомель» — 4:1. Уругвайскі форвард бела-сініх Эрнан Фігарэда, дарэчы, паражае вароты гамяльчан у пятым матчы запар. Пасля сустрэчы галандскі трэнер падсумаваў выступленне сваіх футбалістаў, а таксама выказаў нараканні наконт судзейства: «Чакалі, што «Гомель» будзе дзейнічаць агрэсіўна, таму зрабілі акцэнт на граматнай пазіцыйнай гульні. А хуткі гол Канцавога спрасціў задачу. Адзінае, чым незадаволены, — гол з пенальці. Думаю, пасля таго, як лік стаў 3:0, футбалісты трошкі расслабіліся і дазволілі саперніку стварыць некалькі момантаў. І зусім незразумела, чаму арбітры не рэагавалі на сітуацыі, калі гамяльчане былі ў афсайдзе. Менавіта ў такіх матчах і трэба забіваць больш, чым атрымліваецца... каб перастрахавацца».

Неблагія перспектывы мінчан на другое месца адкрыліся пасля пятага запар паражэння іх прамога канкурэнта — салігорскага «Шахцёра». У гасцявым матчы гарнякі саступілі «Тарпеда»-БелАЗу. Напрыканцы сустрэчы гол у вароты Эдуардаса Курскіса забіў Вячаслаў Глеб. А вось лідар турнірнай табліцы БАТЭ саступіў «Нёману». Перамогу гродзенцам прынёс камерунскі паўабаронца Гі Эсаме, паразіўшы вароты жоўта-сініх.

Адзначым астатнія вынікі 28-га тура: бабруйская «Белшына», якая ўжо гарантавала сабе месца ў вышэйшай лізе ў наступным сезоне, перайграла «Славію» — 1:0, «Днепр» разграміў брэсцкае «Дынама» — 3:0, а «Нафтан» аказаўся мацнейшым за «Мінск» — 2:1.

2. Хакейнае «Дынама» нарэшце адчула смак перамогі. У хатнім матчы «зубры» перайгралі хабараўскі «Амур» — 3:2. Менш чым за дзве хвіліны да заканчэння матча бела-сінія саступалі 1:2, але трапны кідок Аляксея Калюжнага перавёў высвятленне адносін паміж камандамі ў авертайм. Але і дадатковы час не выявіў пераможцу. Тым не менш, па серыі булітаў вікторыю святкавалі падапечныя Аляксандра Андрыеўскага. Вырашальную шайбу ў вароты хабараўцаў закінуў Збынек Іргл. З дваццацю ачкамі «зубры» па-ранейшаму займаюць перадапошняе месца ў заходняй канферэнцыі.

3. Не вельмі ўдала выступілі беларускія цяжкаатлеты на чэмпіянаце свету ў Польшчы. Па суме дваябор'я нашы спартсмены заваявалі два бронзавыя медалі. У вагавой катэгорыі да 69 кг вылучылася Дзіна Сазанавец, у катэгорыі звыш 75 кг — Кацярына Шкуратава. У мужчынскай частцы спаборніцтваў бліжэй усіх да п'едэстала аказаўся Аляксандр Макаранка. У вагавой катэгорыі да 94 кг беларус заняў чацвёртае месца, саступіўшы 6 кг бронзаваму прызёру з Казахстана.

4. У вырашальнай сустрэчы за выхад у паўфінал выніковага турніру, які праходзіў у Стамбуле, Вікторыя Азаранка саступіла кітайскай тэнісістцы На Лі — 2:6 1:6. У сярэдзіне першага сэта беларуска адчула боль у сцягне, але аніякія маніпуляцыі медыкаў не дапамагалі. Тым не менш спартсменка вырашыла не адмаўляцца ад працягу барацьбы і дагуляла матч фактычна «на адной назе». Сезон Вікторыя Азаранка скончыла на другім месцы ў рэйтынгу і з трыма тытуламі ў актыве — у Мельбурне (адкрытае першынство Аўстраліі па тэнісе), Досе і Цынцынаці. Прычым на апошніх двух турнірах у фінале беларуска перамагла Серэну Уільямс, якая сёлета праводзіла свой лепшы сезон у кар'еры.

5. Уладзімір Самсонаў стаў сярэбраным прызёрам розыгрышу Кубка свету па настольным тэнісе. У паўфінале беларускі спартсмен разграміў другую ракетку турніру, немца Ціма Боля — 4:0. А вось у вырашальным матчы Самсонаву ніякіх шанцаў не пакінуў кітаец Сю Сінь, які займае другое месца ў сусветнай класіфікацыі. Нагадаем, за сваю кар'еру Уладзімір Самсонаў тройчы выйграваў Кубак свету, дзе традыцыйна спаборнічаюць 20 лепшых тэнісістаў з усіх кантынентаў.

Дарына ЗАПОЛЬСКАЯ.